ភ្ជាប់​ទៅ​គេហទំព័រ​ទាក់ទង

បុរស​ដែល​សង្ស័យ​ថា​បាន​​ដាក់​គ្រាប់​បែក​នៅ​ញូវយ៉ក​ត្រូវ​បាន​ឃុំខ្លួន​ក្រោយ​ពេល​បាញ់​តដៃ​ជាមួយ​ប៉ូលិស


រូបភាពី​វីដេអូទូរទស្សន៍ WABC ​បង្ហាញ​រូប​បុរស​ដែល​គេ​ជឿ​ថា​ជា​ជន​សង្ស័យ​ដាក់​គ្រាប់​បែកឈ្មោះ Ahmad Khan Rahami មាន​របួស​ក្រោយមាន​​ការ​បាញ់​តដៃ​ជាមួយ​ប៉ូលិស កាល​ពី​ថ្ងៃ​១៩ កញ្ញា។

បុរស​ម្នាក់​ដែល​ប៉ូលិស​បាន​រក​ចាប់​ខ្លួន​ក្នុង​ការ​ទាក់​ទិន​ជាមួយ​ការ​ដាក់​គ្រាប់​បែក​ឱ្យ​ផ្ទុះនៅ​ញូវយ៉ក​ និង ​New Jersey កាល​ពី​ថ្ងៃ​សៅរ៍​កំពុង​ឋិត​ក្នុងការ​ឃុំ​ឃាំងនៅ​ក្រោយ​ពេល​មាន​ការ​បាញ់ត​គ្នា​ជាមួយ​ពួក​ប៉ូលិស។​

ពួក​មន្ត្រី​ផ្នែក​ពង្រឹង​ច្បាប់​បាន​និយាយ​ថា ​ឈ្មោះ​ Ahmad Rahami ​អាយុ​២៨​ឆ្នាំ​ត្រូវ​បាន​ចាប់​ខ្លួន​ហើយ​ជាប់​ឃុំឃាំង​នៅ​ក្នុង​ក្រុង​ Linden ​រដ្ឋ​ New Jersey ​កាល​ពី​ព្រឹក​ថ្ងៃ​ចន្ទ។​

បណ្តាញ​ទូរទស្សន៍​ CNN ​បាន​បង្ហាញ​វីដេអូ​នៃ​បុរស​ម្នាក់​ដែល​ទូរទស្សន៍​នេះ​និយាយ​ថា​ជា​ឈ្មោះ ​Rahami ​ដែល​នៅ​ដឹង​ខ្លួន​ប៉ុន្តែ​ស្ថិត​នៅ​លើ​ស្នែង​សែង​អ្នក​ជំងឺ​មួយ​ ហើយ​ស្មា​ខាង​ស្តាំ​របស់​គាត់​ហាក់​ដូចជាមាន​ចេញ​ឈាម រួចត្រូវ​បាន​ដាក់​បញ្ចូល​ក្នុង​ឡាន​ពេទ្យ​មួយ​គ្រឿង។​

អាជ្ញាធរ​ក្នុង​មូលដ្ឋាន​បាន​និយាយ​ថា ​ប៉ូលិស​ពីរ​នាក់​ និង​ឈ្មោះ​ Rahami ផង​មាន​របួស​ តែ​របួស​នោះ​មិន​គំរាម​កំហែង​អាយុ​ជីវិត​ទេ​ នៅ​ក្នុងការ​បាញ់​តគ្នា​នោះ។

ពួក​ប៉ូលិស​កំពុង​ស្វែង​រក​ពួក​ជន​ជាប់​សង្ស័យ​ដែល​មាន​ទាក់ទិន​ជាមួយ​ឧប្បត្តិហេតុ​នៃ​គ្រឿង​ផ្ទុះ​បួន​គ្រាប់​កាល​ពី​បី​ថ្ងៃ​មុន​នេះ​ ដោយ​មាន​រួម​បញ្ចូល​ទាំង​ការ​ផ្ទុះ​មួយ​កាល​ពី​ថ្ងៃ​សៅរ៍​ដែល​បាន​បណ្តាល​ឱ្យ​មនុស្ស​២៩​នាក់​ត្រូវ​របួស​នៅ​ក្នុង​សង្កាត់ ​Chelsea ​នៃ​តំបន់ ​Manhattan ​នៃ​បូរី​ញូវយ៉ក។​

ពួក​ប៉ូលិស​ក្នុង​មូលដ្ឋាន​ និង​ពួក​ប៉ូលិស​សហព័ន្ធ​បាន​ប្រកាស​អំពី​ការ​ស្វែងរក​ឈ្មោះ​ Rahami ​កាល​ពី​ព្រឹក​ថ្ងៃ​ចន្ទ។​ ប៉ូលិស​និយាយ​ថា​ Rahami ដែល​ជា​ពលរដ្ឋ

ស.រ.អា.​មាន​ដើម​កំណើត​អាហ្វហ្គានីស្ថាន​ ​ត្រូវ​គេ​ដឹង​ថា​បាន​ទៅ​រស់​នៅកាល​ពី​ពេល​ថ្មីៗ​បំផុត​នេះ​ក្នុង​ក្រុង​ Elizabeth រដ្ឋ​ New Jersey នៅ​ចម្ងាយ​ប្រមាណ​៦គ.ម.​ពី​កន្លែង​ដែល​គាត់​បានត្រូវ​ចាប់​ខ្លួន​នៅ ​Linden។​ បណ្តាញ​ផ្សាយ​ព័ត៌មាន​ក្នុង​មូលដ្ឋាន​បាន​រាយការណ៍​ថា​ គ្រួសារ​គាត់​បាន​បើក​ភោជនីយដ្ឋាន​មួយ​នៅ​ជាន់​ទី​មួយ​នៃផ្ទះ​របស់​ពួក​គេ៕

XS
SM
MD
LG