លោក Emmanuel Macron ប្រធានាធិបតីបារាំងបានជំរុញសមាជិកសភាសហ រដ្ឋអាមេរិកកាលពីថ្ងៃពុធកុំឲ្យសហរដ្ឋអាមេរិកបោះបង់ចោលកិច្ចព្រមព្រៀងអន្តរជាតិជាមួយប្រទេសអ៊ីរ៉ង់ដើម្បីទប់ប្រទេសនោះកុំឲ្យអភិវឌ្ឍអាវុធនុយក្លេអ៊ែរ។
ក្នុងសុន្ទរកថាមួយទៅកាន់សភាទាំង២ លោកប្រធានាធិបតីម៉ាក្រុងបានប្រកាសថា អ៊ីរ៉ង់មិនត្រូវមានអាវុធនុយក្លេអ៊ែរទេ ក្នុងរយៈពេល៥ឆ្នាំ ឬ១០ឆ្នាំទៀតក៏ដោយ មិនត្រូវមានដាច់ខាត។
មេដឹកនាំបារាំងរូបនេះ មិនបាននិយាយឡើងវិញពីការជំទាស់ប្រឆាំងយ៉ាងខ្លាំងរបស់ប្រធានាធិបតី ដូណាល់ ត្រាំដល់កិច្ចព្រមព្រៀងឆ្នាំ២០១៥នៅពេលដែលលោកត្រាំបានថ្លឹងថ្លែងការសម្រេចនៅខែក្រោយថាតើដាក់ទណ្ឌកម្មថ្មីប្រឆាំងនឹងប្រទេសអ៊ីរ៉ង់ដែរឬទេ។
ក៏ប៉ុន្តែ ប្រធានាធិបតីម៉ាក្រុងបាននិយាយថា «យើងត្រូវធ្វើឲ្យប្រាកដថា មានស្ថិរភាព ហើយមិនលុបចោលកិច្ចព្រមព្រៀងនោះទេ ដោយនិយាយថា បារាំងបានចុះហត្ថលេខាលើកិច្ចព្រមព្រៀងនោះទៅតាមការផ្តួចផ្តើមរបស់សហរដ្ឋអា មេរិកដែលបានចរចាដោយអតីតប្រធានាធិបតីសហរដ្ឋអាមេរិក បារ៉ាក់ អូបាម៉ា ដែលជាអ្នកកាន់តំណែងមុនប្រធានាធិបតីត្រាំ»។
ប្រធានាធិបតីបារាំង ម៉ាក្រុង នៅពេលដែលលោកបានចរចាជាមួយប្រធានាធិប តីអាមេរិក ដូណាល់ ត្រាំនៅសេតវិមានកាលពីថ្ងៃអង្គារ បានអំពាវនាវឲ្យមានការចរចាកិច្ចព្រមព្រៀងថ្មីជាមួយអ៊ីរ៉ង់អំពីការសាកល្បងកាំជ្រួចបាល់លីស្ទិកនិងការទាក់ទិនខាងយោធារបស់រដ្ឋាភិបាលក្រុង Tehran ក្នុងប្រទេសស៊ីរី យេម៉ែន លីបង់ និងអ៊ីរ៉ាក់។ ក៏ប៉ុន្តែ ប្រធានាធិបតី Hassan Rouhaniនៃប្រទេសអ៊ីរ៉ង់កាលពីថ្ងៃពុធបានច្រានចោលគំនិតនៃកិច្ចព្រមព្រៀងថ្មីឬការផ្លាស់ប្តូរណាមួយនៅក្នុងកិច្ចព្រមព្រៀងនុយក្លេអ៊ែរដែលបានធ្វើឡើងបន្ទាប់ពីការចរចាយ៉ាងយូរជាមួយចក្រភពអង់គ្លេស អាល្លឺម៉ង់ រុស្ស៊ី ចិន បារាំងនិងសហរដ្ឋអាមេរិក៕
