១០:០៣
៥.៦.២០២២
- ពលរដ្ឋជាច្រើននាក់នៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានចេញទៅបោះឆ្នោត សម្រាប់ការបោះឆ្នោតជ្រើសតាំងក្រុមប្រឹក្សាឃុំសង្កាត់អាណត្តិទី ៥ នៅថ្ងៃទី ៥ ខែមិថុនា ឆ្នាំ ២០២២។
កម្រងរូបភាព៖ ពលរដ្ឋនៅសង្កាត់ភ្នំពេញថ្មី ខណ្ឌសែនសុខ ចេញទៅបោះឆ្នោតក្រុមប្រឹក្សាឃុំសង្កាត់
ពលរដ្ឋជាច្រើននាក់នៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានចេញទៅបោះឆ្នោត សម្រាប់ការបោះឆ្នោតជ្រើសតាំងក្រុមប្រឹក្សាឃុំសង្កាត់អាណត្តិទី ៥ នៅថ្ងៃទី ៥ ខែមិថុនា ឆ្នាំ ២០២២។ អ្នកបោះឆ្នោតមួយចំនួនដែលវីអូអេបានសម្ភាសន៍ បានឲ្យដឹងថា ពួកគេរីករាយនឹងចូលរួមការបោះឆ្នោតលើកនេះ ដែលមានការរៀបចំឡើងដោយមានរបៀបរៀបរយ។ ការបោះឆ្នោតនេះ មានន័យថា ពលរដ្ឋនឹងជ្រើសរើសផ្តល់អំណាចដល់ក្រុមមន្ត្រីមូលដ្ឋានដើម្បីឲ្យដឹកនាំមូលដ្ឋាន បម្រើ និងផ្តល់សេវាសាធារណៈដល់ពួកគេក្នុងរយៈពេល ៥ ឆ្នាំ គឺចាប់ពីឆ្នាំ ២០២២ ដល់ឆ្នាំ ២០២៧។ ការិយាល័យបោះឆ្នោត នឹងចាប់ដំណើរការរហូតដល់ម៉ោង ៣ រសៀល។ នៅកម្ពុជាពលរដ្ឋដែលមានអាយុចាប់ពី ១៨ ឆ្នាំឡើងទៅមានចំនួន ១០.៤៦៧.៩៦១ នាក់។ ក្នុងនោះពលរដ្ឋដែលបានចុះឈ្មោះបោះឆ្នោត ៩.២០៥.៦៧៥ (ឬ៨៧,៩៤%)៕
១០:០៥
៥.៦.២០២២
- លោក កឹម សុខា បានសម្រេចចិត្តមិនទៅបោះឆ្នោតឃុំ សង្កាត់នៅថ្ងៃអាទិត្យនេះទេ នេះបេីតាមមន្ត្រីជំនិតរបស់លោក គឺលោកមុត ចន្ថា។ លោក មុត ចន្ថាបានប្រាប់វីអូអេ តាមសារអេឡិចត្រូនិចថា៖ «ឯកឧត្តម កឹម សុខា មិនអញ្ជើញទៅបោះឆ្នោតទេ ព្រោះវាមិនមានជម្រើសសម្រាប់លោក ដើម្បីជ្រើសរើស»។
១២:១៧
៥.៦.២០២២
- នៅការិយាល័យបោះឆ្នោត នៃសង្កាត់បឹងកក់ទី២ ក្នុងបរិវេណវិទ្យាល័យឥន្រ្ទទេវី មានប្រជាពលរដ្ឋមកតម្រង់ជួរបោះឆ្នោតឃុំសង្កាត់អាណត្តិទី៥ នៅព្រឹកថ្ងៃអាទិត្យ ទី៥ ខែមិថុនា ឆ្នាំ២០២២ នេះ។ ចំណែកឯ លោក សុន ឆ័យ អនុប្រធានគណបក្សភ្លើងទៀន ក៏មានវត្តមាននៅការិយាល័យមួយនេះដែរ។
លោកថ្លែងប្រាប់ វីអូអេថា លោកកត់សម្គាល់ឃើញថា នាព្រឹកនេះនៅការិយាល័យដែលលោកបោះឆ្នោត មានពលរដ្ឋដែលចេញបោះឆ្នោតនៅមានចំនួនតិចនៅឡើយ ពោលគឺបានត្រឹមជាង ២០០ នាក់ ក្នុងចំណោមជាង ៧០០ នាក់ ក៏ប៉ុន្តែលោកនៅពុំទាន់អាចវាយតម្លៃនៅឡើយទេ ដោយរងចាំដល់ពេលបិទបញ្ចប់ដំណើរបោះឆ្នោត។ (ខាន់ សុគុំមនោ/វីអូអេ)
១៩:០៧
៥.៦.២០២២
- ការិយាល័យបោះឆ្នោតនៅទូទាំងប្រទេសកម្ពុជាបានបិទដំណើរការ កាលពីវេលាម៉ោង ៣ រសៀល ហើយការរាប់សន្លឹកឆ្នោត បានចាប់ផ្តើមដំណើរការជាបន្តបន្ទាប់ សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥។
កម្រងរូបភាព៖ ភ្នំពេញបានបិទបញ្ចប់ការបោះឆ្នោតឃុំសង្កាត់អាណត្តិទី៥
ដំណើរការនៃការបោះឆ្នោតឃុំសង្កាត់អាណត្តិទី៥នេះត្រូវបានបិទបញ្ចប់នៅរសៀលម៉ោង ៣ ថ្ងៃអាទិត្យនេះ។ មន្ត្រីនៅការិយាល័យរៀបចំការបោះឆ្នោត បានបើកហិបឆ្នោត ហើយរៀបចំរាប់សន្លឹកឆ្នោត និងបន្តការងាររាប់សន្លឹកឆ្នោតនៅមណ្ឌលមួយបោះឆ្នោតមួយ នៅសង្កាត់បឹងព្រលិត ខណ្ឌ៧មករា។ ប្រជាពលរដ្ឋមួយចំនួនដែលរស់នៅក្នុងសង្កាត់របស់ខ្លួន បានមកតាមដានការរាប់សន្លឹកឆ្នោតនេះ។ លទ្ធផលបឋមនិងត្រូវប្រកាសចាប់ពីល្ងាចនេះ។ លទ្ធផលផ្លូវការត្រូវបានគេរំពឹងថានឹងប្រកាសនៅថ្ងៃ២៦ ខែមិថុនាខាងមុខនេះ៕