១៨:៤៥
៦.៦.២០២២
- បើតាមការផ្សាយរបស់គណៈកម្មាធិការជាតិរៀបចំការបោះឆ្នោត (គ.ជ.ប) អំពីលទ្ធផលបោះឆ្នោតបឋម និងការអះអាងរបស់មន្រ្តីគណបក្សកាន់អំណាច គណបក្សប្រជាជនកម្ពុជាទំនងឈ្នះតំណែងមេឃុំចៅសង្កាត់ស្ទើរទូទាំងប្រទេស។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏បានប្រាប់វីអូអេនៅថ្ងៃចន្ទនេះថា លោកកត់សម្គាល់ថាគណបក្សប្រជាជនកម្ពុជានាំមុខគណបក្សដទៃទៀត ទាក់ទិននឹងលទ្ធផលបឋមនៃការបោះឆ្នោតក្រុមប្រឹក្សាឃុំសង្កាត់អាណត្តិទី ៥ នេះ បើទោះបីត្រូវរង់ចាំលទ្ធផលបញ្ជាក់ផ្លូវការពីស្ថាប័នរៀបចំការបោះឆ្នោត គ.ជ.ប ក៏ដោយ។
២៣:២៧
៥.៦.២០២២
- នៅក្នុងបទសម្ភាសន៍ជាមួយវីអូអេ លោក ថាច់ សេដ្ឋា អនុប្រធានគណបក្សភ្លើងទៀន បានថ្លែងថា ការបោះឆ្នោតក្រុមប្រឹក្សាឃុំសង្កាត់អាណត្តិទី ៥ នេះ បង្ហាញពីការតស៊ូរបស់គណបក្សភ្លើងទៀន ក្នុងការប្រកួតប្រជែងយកតំណែងក្រុមប្រឹក្សាឃុំសង្កាត់ដែលខ្លួនបាត់បង់ ក្រោយការរំលាយគណបក្សសង្រ្គោះជាតិ។ លោកចាត់ទុកការបោះឆ្នោតមួយនេះ «អាក្រក់ជាងពេលណាៗទាំអស់» ដោយសារមានការគំរាមកំហែងនៅមុនការបោះឆ្នោត និងភាពមិនប្រក្រតីនៅថ្ងៃបោះឆ្នោតផងដែរ។
២១:៤៩
៥.៦.២០២២
- ថ្នាក់ដឹកនាំរបស់គណបក្សភ្លើងទៀន បានចាត់ទុកការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់អាណត្តិទី ៥ ថា មិនបានប្រព្រឹត្តទៅដោយសេរី ត្រឹមត្រូវ និងយុត្តិធម៌។ នេះបើតាមលោក ថាច់ សេដ្ឋា ដែលបានប្រាប់ដល់សារព័ត៌មានវីអូឌី។
២១:២៩
៥.៦.២០២២
- សំឡេងអ្នកបោះឆ្នោត៖ អ្នកស្រីដានី អាយុ ៣៣ ឆ្នាំជាស្ត្រីមេផ្ទះរស់នៅសង្កាត់ភ្នំពេញថ្មី ខណ្ឌសែនសុខ ក្រុងភ្នំពេញទើបតែបោះឆ្នោតរួចបានឱ្យដែរថា អ្នកស្រីមិនប្រកាន់បក្សណានោះទេសំខាន់បុគ្គលណា ដែលបម្រីប្រជាពលរដ្ឋបានល្អប្រសើរអ្នកស្រីបោះឱ្យបុគ្គលនោះ។ អ្នកស្រីបានឲ្យដឹងដែរថា៖ «គាត់ហ្នឹងហើយដែលគេហៅថាមេបារបស់យើង ចង់និយាយថា យើងអាចពឹងពាក់បានអីចឹង យើងអត់គិតថាលើបក្សឬមិនលើបក្សទេ សំខាន់មើលបុគ្គលណា គាត់អភិវឌ្ឍភូមិឃុំយើងអត់ ពីព្រោះខ្ញុំមើលតែបុគ្គលមិនមើលលើបក្សទេ ខ្ញុំមើលលើបុគ្គលថា គាត់មិនមែនតែយើងទេអ្នកផ្សេងទៅពឹងពាក់អីចឹងបានឬអត់ យើងមិនមែនប្រកាន់បក្សណាបក្សណីទេ ក៏ប៉ុន្តែសំខាន់អ្នកណាយើងអាចពឹងពាក់បានយើងបោះឱ្យអ្នកហ្នឹង»។
