អង្គការ Amnesty International ដែលជាអង្គការឃ្លាំមើលសិទ្ធិមនុស្សអន្តរជាតិនាំមុខគេមួយបានឲ្យដឹងកាលពីថ្ងៃចន្ទ ថា ខ្លួននឹងដកពានរង្វាន់កិត្តិយសដ៏ខ្ពង់ខ្ពស់បំផុតរបស់ខ្លួនពីមេដឹកនាំមីយ៉ាន់ម៉ាវិញ គឺអ្នកស្រី អង់សាន ស៊ូជី ចំពោះការបរាជ័យរបស់អ្នកស្រីក្នុងការលើកឡើងឬផ្អាកការកាប់សម្លាប់ជនជាតិភាគតិចរ៉ូហ៊ីងយ៉ា ដែលកាន់សាសនាឥស្លាមនៅក្នុងប្រទេសរបស់អ្នកស្រី។
លោក Kumi Naidoo អគ្គលេខាធិការអង្គការ Amnesty International បានសរសេរលិខិតមួយច្បាប់ទៅកាន់អ្នកស្រី អង់សាន ស៊ូជី កាលពីថ្ងៃអាទិត្យ អំពីការសម្រេចរបស់អង្គការនេះថា «ក្នុងនាមជាឯកអគ្គរដ្ឋទូតមនសិការរបស់អង្គការ Amnesty International ការរំពឹងទុករបស់យើងខ្ញុំគឺថា អ្នកស្រីនឹងបន្តប្រើប្រាស់សមត្ថកិច្ចរបស់ខ្លួនដើម្បីនិយាយប្រឆាំងនឹងអំពើអយុត្តិធម៌ នៅទីណាដែលអ្នកស្រីបានឃើញអំពើនេះកើតឡើង យ៉ាងហោចណាស់ក៏ក្នុងប្រទេសមីយ៉ាន់ម៉ាដែរ។ យើងមានការខកចិត្តយ៉ាងខ្លាំងដែលអ្នកស្រីមិនមែនជាតំណាងឲ្យក្តីសង្ឃឹម ការលើកទឹកចិត្ត និងការពារសិទ្ធិមនុស្សតទៅទៀត»។
ពីឆ្នាំ១៩៨៩ដល់ឆ្នាំ២០១០ រដ្ឋាភិបាលដែលដឹកនាំដោយយោធានៅក្នុងប្រទេស មីយ៉ាន់ម៉ា តែងតែឃុំឃាំងអ្នកស្រី អង់សាន ស៊ូជី នៅក្នុងផ្ទះម្តងហើយម្តងទៀត ចំពោះតួនាទីជាមេដឹកនាំប្រឆាំងនយោបាយរបស់អ្នកស្រីនិងជាសកម្មជនគាំទ្រលទ្ធិប្រជាធិបតេយ្យ។ ក្នុងអំឡុងពេលនោះ រដ្ឋាភិបាលបស្ចិមប្រទេសនិងអង្គការការពារសិទ្ធិមនុស្ស ដោយរួមទាំងអង្គការ Amnesty International ផង បន្តតស៊ូមតិដើម្បីមានការដោះលែងអ្នកស្រី។
ក្នុងអំឡុងពេលឃុំខ្លួននោះ អ្នកស្រីត្រូវបានគេប្រគល់ពានរង្វាន់ណូបែលសន្តិភាពក្នុងឆ្នាំ១៩៩១។ នៅឆ្នាំ២០០៩ អង្គការ Amnesty International បានប្រគល់ពានរង្វាន់កិត្តិយសខ្ពង់ខ្ពស់បំផុតរបស់អ្នកស្រី ដោយផ្តល់កិត្តិនាមដល់អ្នកស្រីថាជាឯកអគ្គរដ្ឋទូតមនសិការ៕
