ពាក្យ Never Again ជាចំណងជើងរបាយការណ៍ស្តីពីតំបន់ភាគខាងជើងប្រទេសអូស្ត្រាលីរបស់គណៈកម្មាធិការអចិន្ត្រៃយ៍រួមមួយរបស់សភា ចំពោះការបំផ្លិចបំផ្លាញល្អាងបុរាណ Juukan Gorge នៅក្នុងតំបន់ Pilbara នៃរដ្ឋ Western Australia ដោយក្រុមហ៊ុនរុករករ៉ែដ៏ធំមួយឈ្មោះថា Rio Tinto នៅឆ្នាំនេះ។ ជម្រកល្អាងថ្មនេះជាកន្លែងគោរពបូជាសម្រាប់សហគមន៍ជនជាតិដើមក្នុងស្រុកដែលមានវ័យចំណាស់ ៤៦០០០ ឆ្នាំ។
លោក Pat Dodson សមាជិកព្រឹទ្ធសភាបានចាត់ទុកហេតុការណ៍នេះថា ជាគ្រោះមហន្តរាយដ៏អាក្រក់បំផុតមួយ «ដែលមិនធ្លាប់កើតមាននៅក្នុងប្រទេសអូស្ត្រាលីនោះទេ» ហើយវាជាហេតុការណ៍ដែលអាចបញ្ចៀសបាន។
របាយការណ៍នេះសរសេរថា សេចក្តីសម្រេចបំផ្លិចបំផ្លាញជម្រកបុរាណនេះជាការប្រឆាំងនឹងឆន្ទៈរបស់ជនជាតិដើមដែលជាម្ចាស់ ទោះបីជាគេដឹងពីតម្លៃផ្នែកបុរាណវិទ្យានៃកន្លែងនេះក្តី និងជា «សកម្មភាពមិនអាចដោះសារបាន»។ ពួកគេងប់ងុលនឹងការស្វែងរករ៉ែដែក ដែលមានគុណភាពខ្ពស់។
ក្រុមជនជាតិដើមបាននិយាយប្រាប់អង្គស៊ើបអង្កេតថា វាជា «សកម្មភាពបំផ្លិចបំផ្លាញដ៏គួរឲ្យតក់ស្លុតមួយចំពោះកន្លែងដ៏ពិសិដ្ឋរបស់យើង»។
របាយការណ៍របស់គណៈកម្មាធិការនេះលើកឡើងអនុសាសន៍សំខាន់ៗចំនួន ៧ រួមមានអនុសាសន៍ឱ្យក្រុមហ៊ុន Rio Tinto សាងសង់ឡើងវិញឱ្យបានពេញលេញនូវតំបន់នោះ និងផ្តល់សំណងជំងឺចិត្ត និងជំរុញឱ្យក្រុមហ៊ុននេះបោះបង់ចោលគម្រោងរុករករ៉ែទាំងអស់នៅក្នុងតំបន់នេះ។
អ្នកស្រី Deanna Kemp នាយកមជ្ឈមណ្ឌលសម្រាប់ទំនួលខុសត្រូវសង្គមនៅក្នុងវិស័យរុករករ៉ែនៅសាកលវិទ្យាល័យ Queensland និយាយថា របាយការណ៍នេះបង្ហាញថា វប្បធម៌ជនជាតិដើមត្រូវតែមានការការពារជាងនេះ។
អ្នកស្រី Deanna Kemp បាននិយាយក្នុងន័យដើមថា៖ «ការស៊ើបអង្កេតនេះពិតជាបើកផ្លូវសម្រាប់បញ្ហាស្មុគស្មាញទាំងអស់ ចន្លោះប្រហោងនៅក្នុងប្រព័ន្ធនេះ និងបរាជ័យក្នុងការការពារកេរដំណែលដ៏សំខាន់មួយនេះ។ ប៉ុន្តែវាក៏បានបង្ហាញដល់ពួកយើងផងដែរពីការមិនចង់បង្ហាញ និងចែកចាយព័ត៌មានរបស់ក្រុមហ៊ុនផងដែរ។ ដូច្នេះ អ្វីដែលពួកគេបានដាក់ជូនគណៈកម្មាធិការជាព័ត៌មានទូទៅ និងអ្វីដែលបានរកឃើញនៅក្នុងដី នៅក្នុងការផ្តល់សក្ខីកម្ម និងការស្នើសុំព័ត៌មាន។ យើងមានព័ត៌មានលម្អិតច្រើនទៀតនៅក្នុងផ្នែកជាច្រើនផ្សេងៗគ្នាសម្រាប់សោកនាដកម្មនេះ»។
កាលពីពេលមុន ក្រុមហ៊ុន Rio Tinto បានសុំទោសសម្រាប់ការបំផ្លិចបំផ្លាញល្អាងបុរាណនេះ។ រឿងអាស្រូវនេះបានបង្ខំឱ្យថ្នាក់ដឹកនាំ ៣ រូបលាលែងពីក្រុមហ៊ុន។ ការបំផ្លិចបំផ្លាញរបស់ក្រុមហ៊ុននេះលើល្អាងបុរាណ Juukan Gorge មានភាពស្របច្បាប់ បើបកស្រាយតាមច្បាប់រដ្ឋ Western Australian។ ឥឡូវនេះគេកំពុងពិនិត្យមើលច្បាប់របស់រដ្ឋនេះឡើងវិញ។ អង្គស៊ើបអង្កេតនិយាយថា ច្បាប់នេះ «ពិតជាហួសសម័យ និងមិនត្រូវបានគ្រប់គ្រងឲ្យបានល្អ»។
របាយការណ៍ចុងក្រោយរបស់សភាត្រូវបានគេរំពឹងថានឹងចេញនៅឆ្នាំ ២០២១ ហើយគេរំពឹងថា នឹងមានព័ត៌មានលម្អិតអំពីអនុសាសន៍នានា ទោះបីជាការរកឃើញរបស់ខ្លួននឹងមិនមានអានុភាពផ្លូវច្បាប់ក្តី៕
