ក្រុមជនជាតិដើមអូស្ត្រាលីបាននិយាយពី «ទុក្ខសោក» របស់ពួកគេនៅក្នុងការស៊ើបអង្កេតមួយរបស់គណៈកម្មាធិការសភាអូស្ត្រាលីចំពោះការបំផ្លិចបំផ្លាញកន្លែងពិសិដ្ឋចំណាស់៤៦.០០០ឆ្នាំ ដោយក្រុមហ៊ុនរុករករ៉ែ។ នៅក្នុងខែឧសភា ក្រុមហ៊ុន Rio Tinto ដែលជាក្រុមហ៊ុនរុករករ៉ែដែកធំបំផុតនៅក្នុងពិភពលោក បានបំផ្លាញល្អាងថ្មបុរាណចំនួន២នៅភ្នំ Juukan Gorge ក្នុងតំបន់ Pilbar រដ្ឋ Western Australia ដែលជាផ្នែកមួយនៃការអភិវឌ្ឍថ្មី ទោះជាមានការប្រឆាំងយ៉ាងខ្លាំងពីក្រុមជនជាតិដើមក្តី។
ក្រុមជនជាតិដើមអូស្ត្រាលីនិយាយថា ពួកគេ «កំពុងកាន់ទុក្ខចំពោះការបំផ្លាញកន្លែងពិសិដ្ឋរបស់យើង» នៅភ្នំ Juukan Gorge។ ក្រុមហ៊ុន Rio Tinto បានបំផ្ទុះកន្លែងនោះដើម្បីរុករករ៉ែដែកដែលមានគុណភាពខ្ពស់ បើទោះជាមានការតវ៉ាពីមេដឹកនាំសហគមន៍ក្តី។ សាក្សីជាជនជាតិដើម បានប្រាប់គណៈកម្មាធិការសភាអូស្ត្រាលីថា វប្បធម៌ជនជាតិដើម «ត្រូវបានគេផ្តល់តម្លៃតិចតួចនៅក្នុងប្រទេសអូស្ត្រាលី»។ ល្អាងថ្មបុរាណដែលត្រូវបានបំផ្លាញនៅក្នុងខែឧសភា ត្រូវបានចាត់ទុកថា ជាតំបន់ស្រាវជ្រាវបុរាណវត្ថុវិទ្យាដ៏សំខាន់បំផុតមួយនៅក្នុងប្រទេស។
លោក Greg McIntyre គឺជាអ្នកជំនាញសិទ្ធិដីធ្លី និងបាននិយាយថា ត្រូវមានច្បាប់ដែលកាន់តែតឹងរ៉ឹងជាងមុន ដោយលោកពន្យល់ថា៖
«រដ្ឋាភិបាលទាំងនៅថ្នាក់រដ្ឋ និងថ្នាក់សហព័ន្ធត្រូវតែចូលរួមឱ្យសកម្មនៅក្នុងសកម្មភាពនេះ និងត្រូវមានទស្សនៈផ្សេងពីមុនអំពីតុល្យភាពរវាងផលប្រយោជន៍សេដ្ឋកិច្ច និងកេរដំណែលវប្បធម៌របស់អូស្ត្រាលី។ កេរដំណែលវប្បធម៌ត្រូវគេចាត់ទុកជាអាទិភាពបន្ទាប់បន្សំអស់ជាច្រើនទសវត្សរ៍មកហើយ»។
ជនជាតិដើមអូស្ត្រាលី បានចាត់ទុកដីជាមាតានៃការបង្កើត [ភពផែនដី] ដែលភ្ជាប់ពួកគេទៅនឹងអតីតកាល បច្ចុប្បន្នកាល និងអនាគតកាលរបស់ពួកគេ។
ចាស់ព្រឹទ្ធាចារ្យរបស់ជនជាតិដើមមួយរូបបាននិយាយថា ជនជាតិដើមមាន «ទុក្ខសោក និងអារម្មណ៍ខុសយ៉ាងខ្លាំង» ចំពោះការបរាជ័យក្នុងការការពារតំបន់ស័ក្តិសិទ្ធិនៅភ្នំ Juukan Gorge ដែលមានវត្តមានតាំងពីរាប់ម៉ឺនឆ្នាំមុន។
ក្រុមហ៊ុន Rio Tinto បានធ្វើការសុំទោស និងមានគម្រោងផ្តល់ភស្តុតាងទៅកាន់គណៈកម្មាធិការស៊ើបអង្កេត។ មន្ត្រីជាន់ខ្ពស់ចំនួន៣នាក់របស់ក្រុមហ៊ុន Rio Tinto ត្រូវបានបង្ខំឱ្យឈប់ពីការងារកាលពីខែកញ្ញា បន្ទាប់ពីមានរឿងអាស្រូវនេះ។
ច្បាប់បេតិកភណ្ឌថ្មី កំពុងត្រូវបានគេតាក់តែងនៅក្នុងរដ្ឋ Western Australia ដើម្បីផ្តល់ឱ្យក្រុមជនជាតិដើម មានសេចក្តីសម្រេចច្រើនជាងមុននៅក្នុងការការពារដីធ្លីរបស់ពួកគេដែលស្ថិតក្នុងគម្រោងស្នើសុំធ្វើការអភិវឌ្ឍ។ កាលពីមុន ជនជាតិដើមមួយចំនួន បានយល់ព្រមលះបង់តំបន់ពិសិដ្ឋរបស់ពួកគេដើម្បីជួយដល់សហគមន៍ក្រីក្ររបស់ពួកគេ អាចទទួលបានចំណែកមួយនៃប្រាក់ចំណេញពីការរុករករ៉ែ។
គណៈកម្មាធិការស៊ើបអង្កេតរបស់សភានឹងត្រូវផ្តល់របាយការណ៍របស់ខ្លួននៅដើមខែធ្នូ៕
