មីស៊ីលរុស្ស៊ីដែលបានបាញ់ចំទីក្រុង Mykolaiv នៅភាគខាងត្បូងប្រទេសអ៊ុយក្រែនកាលពីព្រឹកថ្ងៃព្រហស្បតិ៍នេះបានសម្លាប់មនុស្សម្នាក់និងធ្វើឱ្យមនុស្ស ២៣ នាក់ទៀតរងរបួស។
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់តាម Telegram ថា៖ «នៅពេលយប់ រុស្ស៊ីបានបាញ់មីស៊ីល Kalibr ៤ គ្រាប់ពីសមុទ្រខ្មៅដាក់ទីក្រុង Mykolaiv»។
ការវាយប្រហារនេះបានធ្វើឱ្យខូចខាតដល់ផ្ទះសម្បែងមួយចំនួននិងអគារស្នាក់នៅមួយកន្លែង។ រុស្ស៊ីបានបដិសេធថាខ្លួនមិនបានវាយប្រហារសំដៅលើជនស៊ីវិលនោះទេ ដោយបញ្ជាក់ថាខ្លួនវាយប្រហារសំដៅលើគោលដៅយោធា។
អគ្គលេខាធិការអង្គការអូតង់ (NATO) លោក Jens Stoltenberg បាននិយាយថា អ៊ុយក្រែនបានទទួលរថយន្តចម្បាំងជាង ៩៨% នៃរថយន្តចម្បាំងដែលសន្យាផ្ដល់ឱ្យដោយសម្ព័ន្ធមិត្តនិងដៃគូនានារបស់អង្គការអូតង់។ រថយន្តចម្បាំងទាំងនោះរួមមានរថពាសដែក ១.៥៥០ គ្រឿង និងរថក្រោះ ២៣០ គ្រឿង។
លោក Stoltenberg បានថ្លែងនៅថ្ងៃព្រហស្បតិ៍នេះនៅក្នុងសន្និសីទកាសែតមួយក្នុងទីក្រុងព្រុចសែល ប្រទេសបែលហ្ស៊ិកថា អង្គការអូតង់បានបណ្ដុះបណ្ដាលនិងបានបំពាក់អាវុធដល់កងពលតូចរថពាសដែកអ៊ុយក្រែនថ្មីចំនួនជាង ៩ កង ដែលធ្វើឱ្យ «អ៊ុយក្រែនមានជំហរខ្លាំងនៅក្នុងការបន្តវាយដណ្ដើមយកមកវិញនូវដែនដីដែលរុស្ស៊ីបានដណ្ដើមត្រួតត្រា»។
លោក Stoltenberg ក៏បាននិយាយផងដែរថា លោក «បានស្វាគមន៍» ការសន្ទនាគ្នាតាមទូរស័ព្ទរវាងប្រធានាធិបតីចិនលោក Xi Jinping និងលោក Zelenskyy ប៉ុន្តែថា វាមិនបានធ្វើឱ្យផ្លាស់ប្ដូរការពិតដែលថាចិននៅមិនទាន់ថ្កោលទោសការឈ្លានពានរបស់រុស្ស៊ីលើអ៊ុយក្រែននៅឡើយ។
លោក Zelenskyy បាននិយាយថា លោកបានសន្ទនាតាមទូរស័ព្ទ «ដ៏យូរនិងប្រកបដោយផ្លែផ្កា» ជាមួយនឹងលោក Xi កាលពីថ្ងៃពុធ។
លោកទាំងពីរបានយល់ស្របគ្នានៅក្នុងការបញ្ជូនបេសកជនទៅកាន់ទីក្រុងប៉េកាំងនិងទីក្រុងកៀវ ដែលអាចជាវិធានការដំបូងនៅក្នុងការសម្របសម្រួលឱ្យមានការចរចាសន្តិភាពដើម្បីបញ្ចប់សង្គ្រាមរបស់រុស្ស៊ីនៅក្នុងប្រទេសអ៊ុយក្រែន។
ប្រព័ន្ធផ្សព្វផ្សាយរដ្ឋរបស់ចិនបានរាយការណ៍ថា លោក Xi បានស្នើទៅលោក Zelenskyy ឱ្យមានការចរចារវាងរុស្ស៊ីនិងអ៊ុយក្រែន ដោយបានដាស់តឿនថា «នៅក្នុងសង្គ្រាមនុយក្លេអ៊ែរ គឺគ្មានអ្នកឈ្នះទេ»។ លោក Xi ហាក់ចង់សំដៅលើការគំរាមកំហែងរបស់រុស្ស៊ីកន្លងមកដែលចង់ប្រើអាវុធនុយក្លេអ៊ែរកលយុទ្ធ៕
(ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និងReuters)
មីស៊ីលរុស្ស៊ីសម្លាប់មនុស្សម្នាក់និងធ្វើឱ្យរបួស ២៣ នាក់នៅភាគខាងត្បូងអ៊ុយក្រែន
