ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ៊ុយក្រែន​ទទួល​ជំនួយ​ដោះមីន​ច្រើនជាង​គេ​ពី​សហរដ្ឋ​អាមេរិក


រូបឯកសារ៖ ក្រុមអ្នកជំនាញដោះមីនកំពុងប្រតិបត្តិការដោះមីននៅតំបន់ Kherson ប្រទេសអ៊ុយក្រែន កាលពីថ្ងៃទី ១៦ ខែវិច្ឆិកា ឆ្នាំ ២០២២។
រូបឯកសារ៖ ក្រុមអ្នកជំនាញដោះមីនកំពុងប្រតិបត្តិការដោះមីននៅតំបន់ Kherson ប្រទេសអ៊ុយក្រែន កាលពីថ្ងៃទី ១៦ ខែវិច្ឆិកា ឆ្នាំ ២០២២។

របាយការណ៍​មួយ​នៃក្រសួង​ការបរទេស​សហរដ្ឋ​អាមេរិក​ឱ្យដឹង​ថា​ ជំនួយ​របស់​សហរដ្ឋ​អាមេរិក​បាន​ជួយ​សម្អាត​និង​បំផ្លាញ​យុទ្ធភណ្ឌ​ផ្ទុះ​ជាង​ ៥៣០ ពី​ផ្ទៃដី​អ៊ុយក្រែន​កាល​ពី​ឆ្នាំ​ទៅ។ ប៉ុន្តែ​ប្រទេស​នេះ​នៅ​មាន​ផ្ទៃដី​ធំធេងដែល​មាន​កប់គ្រាប់មីន ​យុទ្ធភណ្ឌ​មិន​ទាន់​ផ្ទុះ​និងគ្រឿង​ផ្ទុះច្នៃ​ ជាលទ្ធផល​នៃ​ការ​លុកលុយរបស់​រុស្ស៊ី​ក្នុង​អ៊ុយក្រែន។ សហរដ្ឋ​អាមេរិក​ក៏​ជួយសម្អាតមីន​ក្នុង​ប្រទេស​ឡាវ​ អ៊ីរ៉ាក់និង​ប្រទេស​កូឡុំប៊ី​ដែរ។ ​

នៅ​ក្នុង​របាយការណ៍​ប្រចាំឆ្នាំរបស់​ខ្លួន ចេញផ្សាយកាលពី​ថ្ងៃ​អង្គារ​ទី ៤​ ខែមេសា ក្រសួង​ការបរទេស​អាមេរិក​បាន​ប្រមូល​ឯកសារ​អំពី​កិច្ច​ប្រឹងប្រែង​របស់​ខ្លួន ក្នុងការ​ជួយ​ប្រទេសជាង​ ៦០ បំផ្លាញយុទ្ធភណ្ឌ​ផ្ទុះ​និង​អាវុធ​ធម្មតាឯទៀតៗ ដោយ​អ៊ុយក្រែន​បាន​ទទួល​ជំនួយ​ច្រើន​ជាង​គេនៅ​ឆ្នាំ ២០២២​ គឺ​ជាង​ ៩១ លាន​ដុល្លារ។

រដ្ឋាភិបាល​អ៊ុយក្រែន​ស្ទង់​ប្រមាណ​ថា​ ផ្ទៃដី​ខ្លួន​ចំនួន​ ១៦០.០០០​ គ.ម.ក្រ​ឡា​មានកប់យុទ្ធភណ្ឌ​ផ្ទុះ​ ហើយ​និយាយថា ​នៅ​ពេល​នេះប្រមាណ​ ១០% នៃផ្ទៃដី​កសិកម្ម​របស់​ប្រទេសនេះ​ប្រកប​ដោយ​គ្រោះថ្នាក់​ណាស់​សម្រាប់​ដាំ​ដំណាំ។

របាយការណ៍​ដែល​មាន​ចំណង​ជើង​ថា «ដើរលើផែនដី​ដោយ​សុវត្ថិភាព» (To Walk the Earth in Safety)​ ត្រូវ​បាន​សរសេរ​រួមគ្នាជាមួយ​មជ្ឈមណ្ឌល​សម្រាប់​ស្ថិរភាពអន្តរជាតិ​និង​ការ​ស្តារឡើង​វិញ​នៅ​ឯសាកលវិទ្យាល័យ ​James Madison ​នា​រដ្ឋ Virginia ​លើក​ឡើង​ថា​ «ការ​លុកលុយដ៏​ឃោរឃៅរបស់រុស្ស៊ី​ធ្វើឱ្យវិបត្តិ​ស្បៀង​សាកល​កាន់តែដុនដាប​ថែមទៀត»។

នៅមុនការលុកលុយ​របស់​រុស្ស៊ី​ក្នុងប្រទេស​អ៊ុយក្រែន​កាលពី​ខែ​កុម្ភៈ ​ឆ្នាំ ២០២២ អ៊ុយក្រែន​ជាប្រទេសផលិតស្រូវសាឡី​និង​គ្រាប់ធញ្ញជាតិច្រើន​បំផុត​មួយក្នុង​ពិភពលោក។

ជំនួយរបស់​សហរដ្ឋ​អាមេរិក​ដល់​អ៊ុយក្រែនក្នុង​ឆ្នាំ​សារពើពន្ធ​ ដែល​ចប់នៅ​ខែ​កញ្ញា ​ឆ្នាំ ២០២២​ បាន​ផ្តល់ការ​ហ្វឹកហ្វឺន​និង​គ្រឿង​ឧបករណ៍សម្រាប់​ក្រុម​អ្នក​សម្អាត​មីននៅ​ទូទាំង​ប្រទេស​អ៊ុយក្រែន​ ​ផ្តល់​ប្រាក់កាស​សម្រាប់​កម្មវិធីអប់រំអំពី​គ្រោះ​ថ្នាក់​នៃ​គ្រឿង​ផ្ទុះ​លាក់កំបាំងដល់ប្រជារាស្ត្រ​អ៊ុយក្រែន​ចំនួន​ ១៨​ លាន​នាក់។​

អ្នកស្រី Heather Holsinger ​អ្នក​ចាត់ចែងកិច្ចការ​ខាង​សារ​គមនាគមន៍​និង​ការបោះពុម្ព​ផ្សាយ​នៃ​មជ្ឈមណ្ឌល​សម្រាប់​ស្ថិរភាពអន្តរជាតិ​និង​ការស្តារ​ឡើង​វិញ បាន​និយាយ​ថា៖ «នៅ​ពេល​នេះ ​អ៊ុយក្រែនជាប្រទេស​មួយក្នុង​បណ្តា​ប្រទេសមាន​កប់​មីន​ច្រើនជាងគេក្នុង​ពិភពលោក ហើយស្ថានភាព​នេះ​កាន់តែ​អាក្រក់​ឡើង​ជារៀងរាល់ថ្ងៃ»។

អ្នកស្រី Holsinger ​បាន​និយាយ​ប្រាប់​វីអូអេ​ថា​ គ្រោះថ្នាក់​ដោយសារ​យុទ្ធភណ្ឌ​ផ្ទុះមាន​រាយប៉ាយ​ក្នុង​តំបន់​ជនបទនិង​តំបន់​ក្រុង ​ហើយទំនង​ជា​ត្រូវ​ចំណាយ​ពេលច្រើន​ទសវត្សរ៍​ដើម្បី​សម្អាតនៅពេល​ណា​សង្គ្រាម​នេះ​ចប់។

នៅទូទាំង​ពិភពលោក​ សហរដ្ឋ​អាមេរិក​បាន​ចំណាយ​ប្រាក់​ ៣៧៦​ លាន​ដុល្លារដើម្បី​ជួយ​បំផ្លាញ​យុទ្ធភណ្ឌ​ផ្ទុះនិង​អាវុធ​ធម្មតា​ឯទៀតៗ​ក្នុង​ឆ្នាំ​សារពើពន្ធ​ ២០២២។ បន្ទាប់ពី​ប្រទេស​អ៊ុយក្រែន​ សហរដ្ឋ​អាមេរិក​បាន​ចំណាយ​ប្រាក់​ច្រើនបំផុត​នៅ​ប្រទេស​ឡាវ​គឺ​ ៤៥ ​លាន​ដុល្លារ​។​ បន្ទាប់មក​អាមេរិកក៏បាន​ចំណាយ​ប្រាក់​ ៤០,៣ ​លាន​ដុល្លារ​នៅ​អ៊ីរ៉ាក់និង​ ២០,៣​ លាន​ដុល្លារនៅ​ប្រទេស​វៀតណាម ​ដើម្បី​បោស​សម្អាត​គ្រឿង​ផ្ទុះ​កប់ក្នុងដី។

អ្នកស្រី Holsinger ​បានថ្លែងថា នៅ​ទូទាំង​ពិភពលោក ​សកម្មភាព​សម្អាតមីនល្អ​ប្រសើរ​ជាងមុន​ដោយសារ​មាន​ការជឿនលឿន​ខាង​បច្ចេកវិទ្យា​ស្ទង់មើល ​រួមមាន​ការ​ប្រើ​ដ្រូន​និង​បច្ចេកវិទ្យា​ឱ្យ​ដឹង​ពី​ចម្ងាយ​សម្រាប់រក​ឱ្យ​ឃើញ​គ្រោះថ្នាក់ដែល​អាច​កើតមាន។

នៅទូទាំងពិភពលោក​ សហរដ្ឋ​អាមេរិក​បាន​ផ្តល់​ប្រាក់​ជាង ​៤,៦​ ពាន់​លាន​ដុល្លារឱ្យ​ប្រទេស​ជាង​ ១២០​ ដើម្បី​គាំទ្រការបំផ្លាញអាវុធ​ធម្មតា តាំង​ពី​ឆ្នាំ ១៩៩៣ ​រហូត​ដល់​ខែកញ្ញា​ ឆ្នាំ​ ២០២២។

សហរដ្ឋ​អាមេរិក​ជា​ប្រទេស​មួយក្នុង​ចំណោមប្រទេសមួយ​ចំនួន​តូច រួមមានរុស្ស៊ី​និង​ចិនដែរ ដែល​មិន​បាន​ចុះ​ហត្ថលេខា​លើ​សន្ធិសញ្ញា​ហាមប្រាម​គ្រាប់​មីន​ឆ្នាំ ១៩៩៧​ ដែល​ហាមប្រាមមិនឱ្យ​ប្រើមីន​ប្រឆាំង​នឹង​មនុស្ស។

កាលពី​ខែ​វិច្ឆិកា ​យុទ្ធនាការ​អន្តរជាតិដើម្បីហាមប្រាម​គ្រាប់មីន​បង្កប់​បាន​រាយការណ៍​ថា រុស្ស៊ី​និងមីយ៉ាន់ម៉ា​ជារដ្ឋាភិបាលតែពីរ​ដែល​បាន​ប្រើ​មីន​បែប​នេះកាល​ពី​ឆ្នាំទៅ៕

ប្រែសម្រួល​ដោយ​លោក​ ឈឹម សុមេធ

XS
SM
MD
LG