នៅថ្ងៃអង្គារនេះ ថ្នាក់ដឹកនាំគណបក្សកុម្មុយនីស្ដចិនបានធ្វើបសំសកថាអំពីអតីតមេដឹកនាំចិនលោក Jiang Zemin ដែលទើបតែបានស្លាប់កាលពីថ្ងៃទី ៣០ ខែវិច្ឆិកា កន្លងទៅនេះថាជាអ្នកប្រកាន់លទ្ធិម៉ាក្សលេនីនដ៏ស្មោះស្ម័គ្រមួយរូបដែលបានមើលការខុសត្រូវលើការរីកចម្រើនសេដ្ឋកិច្ចដ៏ឆាប់រហ័សរបស់ប្រទេសចិន និងស្របពេលនោះដែររក្សាការគ្រប់គ្រងតឹងរ៉ឹងរបស់គណបក្សលើសង្គមជាតិ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
ប្រធានាធិបតីចិនលោក Xi Jinping ដែលជាមេដឹកនាំគណបក្សកុម្មុយនីស្តចិន បានសរសើរលោក Jiang នៅក្នុងសុន្ទរកថារយៈពេលមួយម៉ោងនៅឯសាល Great Hall of the People ក្នុងទីក្រុងប៉េកាំង ខណៈដែលមន្ត្រីជាន់ខ្ពស់នានានិងថ្នាក់ដឹកនាំជាន់ខ្ពស់យោធាឈរគោរពស្មឹងស្មាធ។
លោក Xi បានរំឭកអំពីអាជីពនយោបាយដ៏យូររបស់លោក Jiang ដោយសង្កត់ធ្ងន់អំពីតួនាទីរបស់លោកនៅក្នុងការរក្សាស្ថិរភាពនយោបាយ ដែលនេះចង់សំដៅលើការលេចឡើងរបស់លោក Jiang ជាមេដឹកនាំកំពូលនៅមុនការបង្ក្រាបដ៏បង្ហូរឈាមរបស់យោធាចិនលើចលនាគាំទ្រលទ្ធិប្រជាធិបតេយ្យដែលដឹកនាំដោយនិស្សិតនៅឆ្នាំ ១៩៨៩ នៅទីលាន Tiananmen ក្នុងទីក្រុងប៉េកាំង។
លោក Jiang បានស្លាប់នៅអាយុ ៩៦ ឆ្នាំ គឺក្នុងពេលប៉ុន្មានថ្ងៃក្រោយមកបន្ទាប់ពីមានការតវ៉ាដ៏ធំបំផុតនៅតាមដងផ្លូវក្នុងប្រទេសចិនតាំងពីឆ្នាំ ១៩៨៩ មក។ ការតវ៉ាទាំងនេះគឺជំរុញឡើងដោយការខឹងសម្បានឹងវិធានការបង្ការជំងឺកូវីដ១៩ ដ៏តឹងតែងបំផុតរបស់ចិន។
នៅក្នុងការតវ៉ាទាំងនោះ អាជ្ញាធរបានបញ្ជូនកងសន្តិសុខជាច្រើនទៅតាមដងផ្លូវនានានៅតាមទីក្រុងដែលមានការតវ៉ាដើម្បីបង្ក្រាប ហើយមនុស្សមួយចំនួនត្រូវបានចាប់ឃុំខ្លួន។
អ្នកដែលបានចូលរួមនៅក្នុងពិធីបុណ្យសពរបស់លោក Jiang នៅថ្ងៃអង្គារនេះបានធ្វើពិធីស្មឹងស្មាតរយៈពេល ៣ នាទីហើយផ្សារភាគហ៊ុនបានផ្អាកដំណើរការមួយរយៈ។
កាលពីថ្ងៃចន្ទ ទូរទស្សន៍ CCTV របស់រដ្ឋាភិបាលចិនបានបង្ហាញរូបភាពលោក Xi Jinping អតីតប្រធានាធិបតីចិនលោក Hu Jintao និងមន្ត្រីផ្សេងទៀតឱនក្បាលគោរពនៅពីមុខមឈូសរបស់លោក Jiang នៅឯមន្ទីរពេទ្យយោធាមួយកន្លែងក្នុងទីក្រុងប៉េកាំង មុនពេលសាកសពរបស់លោកត្រូវបានបញ្ជូនទៅបញ្ចុះនៅឯទីបញ្ចុះសព Babaoshan ដែលជាកន្លែងដែលសាកសពរបស់មេដឹកនាំចិនជាច្រើនត្រូវបានបញ្ចុះ៕
