ប៉ុន្តែតើងារនេះពិតជាត្រូវបានគេឈប់ប្រើមែនទេ? ប្រហែលជាមិននោះទេ ដោយសារតែមានសញ្ញាមួយចំនួននៅរដូវក្តៅនេះ ដែលលោកប្រធានាធិបតី ស៊ី ជីងពីង អាចនឹងធ្វើឲ្យងារនេះត្រូវបានគេប្រើប្រាស់ឡើងវិញ។
កាលពីថ្ងៃទី៣០ ខែមិថុនា នៅក្នុងក្បួនយោធាមួយនៅក្នុងបន្ទាយទាហានហុងកុងរបស់កងទ័ពរំដោះប្រជាជនចិន ហៅកាត់ជាភាសាអង់គ្លេសថា (PLA) លោកប្រធានាធិបតី ស៊ី បានជួបជាមួយនឹងក្រុមយោធា ដោយលោកបានថ្លែងស្វាគមន៍ថា «សូមស្វាគមន៍សមមិត្ត!»។ ក្រុមយោធាបានស្រែកស្វាគមន៍វិញថា «សូមស្វាគមន៍ លោកប្រធានបក្ស!» ជាជាងប្រើប្រាស់ពាក្យថា «សូមស្វាគមន៍លោកប្រធានាធិបតី»។
ការណ៍នេះបានកើតឡើងម្តងទៀតកាលពីថ្ងៃទី៣០ ខែកក្កដា ក្នុងក្បួនយោធាមួយដើម្បីសាទរខួបលើកទី៩០របស់កងទ័ព PLA នៅក្នុងបន្ទាយហ្វឹកហាត់ទាហាន Zhurihe នៅក្នុងតំបន់ Inner Mongolia។ ទាហាននៅទីនោះដែលស្លៀកពាក់សម្លៀកបំពាក់យោធាបង្កប់ខ្លួនបានស្រែកស្វាគមន៍ទៅលោកប្រធានាធិបតី ស៊ី វិញថា «សូមស្វាគមន៍ លោកប្រធានបក្ស»។
លោក ស៊ី ជាអគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន និងជាប្រធាននៃគណៈកម្មការយោធាមជ្ឈិម។ ប៉ុន្តែខណៈពេលគណបក្សរៀបចំសមាជជាតិលើកទី១៩របស់ខ្លួន ដែលជាការជួបជុំក្នុងរយៈពេល៥ឆ្នាំម្តង នឹងចាប់ផ្តើមនៅក្នុងក្រុងប៉េកាំងក្នុងរយៈពេលប៉ុន្មានខែខាងមុខ និងអាចមានការកែប្រែពិធីការដែលមានស្រាប់ខ្លះ។ លោក Deng Xiaoping លោក Jiang Zemin និងលោក Hu Jintao ពេញចិត្តនឹងប្រើប្រាស់ងារ អគ្គលេខាធិការ ជាជាងប្រធានបក្ស។ ប៉ុន្តែអ្នកវិភាគមួយចំនួនគិតថា លោកប្រធានាធិបតី ស៊ី ចង់ប្រើប្រាស់ងារជាប្រធានគណៈកម្មាធិការកណ្តាលបក្សឡើងវិញ។
លោក Tai Ming Cheung ដែលជាអ្នកវិភាគលើបញ្ហាសន្តិសុខជាតិ និងកិច្ចការពារជាតិរបស់ចិន និងតំបន់អាស៊ីខាងកើតបានប្រាប់ VOA ថា ការត្រួតពិនិត្យទាហានបង្កប់ខ្លួនរបស់លោកប្រធានាធិបតីបង្ហាញថា «ប្រសិនបើកងទ័ព PLA និងប្រទេសចិនប្រឡូកនៅក្នុងសង្គ្រាម លោកគឺជាទទួលខុសត្រូវ»។
លោក Cheung ដែលដឹកនាំវិទ្យាស្ថានសិក្សពីជម្លោះ និងកិច្ចសហប្រតិបត្តិការសកលនៅសាកលវិទ្យាល័យ California ក្នុងទីក្រុង San Diego បានថ្លែងថា «នេះជាសញ្ញាដ៏សំខាន់ ជាពិសេសគឺចំពេលវេលានេះតែម្តង»។
លោក Cheung បានថ្លែងថា នៅក្នុងសមាជបក្ស មានការរំពឹងទុកថា បេក្ខជនដែលនឹងស្នងតំណែងរបស់លោកប្រធានាធិបតី ស៊ី នឹងព្យាយាមដណ្តើមតំណែងរបស់លោក។ លោកបានប្រាប់ VOA ផ្សាយជាភាសាចិនថា «ប៉ុន្តែមិនមានមេដឹកនាំនយោបាយណាមួយស្ថិតនៅក្នុងក្បួនយោធានោះទេ ដូច្នេះវាទំនងថា លោកនឹងមិនរៀបចំឲ្យមានអ្នកស្នងតំណែងនោះទេ ប៉ុន្តែវាទំនងបង្ហាញថា លោកជាអ្នកគ្រប់គ្រងយោធា»។
លោក Tom Fingar ដែលជាអ្នកស្រាវជ្រាវរបស់វិទ្យាស្ថាន Shorenstein Asia-Pacific នៃសាកលវិទ្យាល័យ Stanford បាននិយាយថា៖«ការស្រែកស្វាគមន៍របស់កងទ័ព PLA ទៅកាន់លោកប្រធានាធិបតី ស៊ី ដោយប្រើពាក្យប្រធានបក្ស ជាជាង លោកប្រធានាធិបតី បង្ហាញថា កងទ័ពបម្រើបក្ស មិនមែនបម្រើប្រជាជនចិននោះទេ។ ខ្ញុំមិនយល់ថា ការណ៍នេះជាការលើកតម្កើងលោកប្រធានាធិបតី ស៊ី ឲ្យដូចលោកប្រធាន ម៉ៅ នោះទេ។ វាជាងារត្រឹមត្រូវមួយនៅក្នុងកម្មវិធីរបស់យោធា ហើយវាអាចជាកំហុសមួយក្នុងការគិតថានេះជាការប្រមូលផ្តុំអំណាច»។
លោក Fingar បានបន្តថា គណបក្សបានជ្រើសរើសលោក ស៊ី ជាប្រធានបក្សដើម្បីមានមនុស្សម្នាក់ដោះស្រាយ «បញ្ហាការិយាល័យធិបតេយ្យដែលជាប់គាំង ប៉ុន្តែលោក ស៊ី មិនទាន់ធ្វើបាននោះទេ ដូច្នេះលោកនឹងមិនឈរឈ្មោះសាជាថ្មីសម្រាប់តំណែងដ៏មានអំណាចនេះនោះទេ»។
ទោះជាយ៉ាងនេះក្តី លោកបានបន្ថែមថា «ប្រសិនបើគេសួរខ្ញុំថា តើខ្ញុំគិតថាលោក Xi នឹងត្រូវបានគេជ្រើសរើសម្តងទៀតដែរឬទេ? ចម្លើយរបស់ខ្ញុំគឺថា ប្រាកដណាស់។ លោក ស៊ី ស្ថិតក្នុងតំណែងកំពូល ដោយសារតែមិនមានជម្រើសណាល្អជាងនេះ។ តើអាណត្តិរបស់លោកមានត្រឹមកម្រិតណា? នេះជាសំណួរ ហើយសមាជិកបក្សនៅតែខ្វែងគំនិតគ្នាលើបញ្ហានេះ ដោយសារតែពួកគេមិនមានកាលបរិច្ឆេទសម្រាប់តំណែងនេះ»។
លោក Cheung និយាយថា ទោះជាយ៉ាងណា នៅតែមានការទស្សន៍ទាយថា លោកប្រធានាធិបតី ស៊ី «នឹងប្រើប្រាស់សភាដើម្បីបន្តពង្រឹង និងប្រមូលផ្តុំអំណាចរបស់លោក»។
នេះនៅតែជាចម្ងល់មួយសម្រាប់ប្រជាជនចិនជាច្រើន ដែលនៅចងចាំជំនាន់របស់លោកប្រធានម៉ៅ និងអ្នកផ្សេងទៀតដែលឆ្ងល់ថា ហេតុអ្វីបានជាលោកប្រធានាធិបតី ស៊ី ចាប់អារម្មណ៍ចង់បង្កើតតួនាទីនិងងារប្រធានបក្សនេះឡើងវិញ។ ទោះជាយ៉ាងណា កាលពីខែតុលា គណបក្សបានផ្តល់ងារ «ដ៏សំខាន់របស់បក្ស» ទៅឲ្យលោកប្រធានាធិបតី ស៊ី។
ដូច្នេះ លោក ស៊ី បានក្លាយជាមេដឹកនាំដែលត្រូវបានគណបក្សតែងតាំងលើកទី៤ ចាប់តាំងពីពេលដែលគណបក្សកុម្មុយនិស្តគ្រប់គ្រងប្រទេសចិននៅក្នុងឆ្នាំ១៩៤៩។
ប្រវត្តិសាស្ត្រអាចពន្យល់ថា ហេតុអ្វីបានជាប្រជាជនចិនមួយចំនួនព្រួយបារម្ភពីការប្រើប្រាស់ងាររបស់លោកប្រធានម៉ៅឡើងវិញ។
បើតាមលោក Pokong Chen អ្នកនិពន្ធសៀវភៅមួយចំនួនអំពីប្រទេសចិន ដែលបានចូលរួមក្នុងកម្មវិធីទូរទស្សន៍របស់ VOA ជាភាសាចិនឈ្មោះ Pro & Con បាននិយាយថា ការលុបចោលងារនេះ «តំណាងឲ្យការបញ្ចប់សម័យកាលម៉ៅ និងបដិវត្តន៍វប្បធម៌។ ប្រសិនបើលោកប្រធានាធិបតី ស៊ី បង្កើតងារនេះឡើងវិញ វាដូចជាបង្កើតសម័យកាលនៃបដិវត្តន៍វប្បធម៌ឡើងវិញដូច្នោះដែរ»។
បដិវត្តន៍វប្បធម៌វណ្ណៈអធនមហាអស្ចារ្យ ឬជាភាសាអង់គ្លេស Great Proletarian Cultural Revolution របស់ប្រធានម៉ៅ បានចាប់ផ្តើមក្នុងខែឧសភា ឆ្នាំ១៩៦៦ និងបានបណ្តាលឲ្យមានភាពចលាចលនៅក្នុងនយោបាយនិងសង្គមអស់រយៈពេលមួយទសវត្សរ៍នៅក្នុងកិច្ចប្រឹងប្រែងរបស់លោកដើម្បីបង្កើនការគ្រប់គ្រងរបស់លោកលើគណបក្សកុម្មុយនិស្តឡើងវិញ។
មុនបដិវត្តន៍វប្បធម៌ មានចលនាមហាលោតផ្លោះ (Great Leap Forward) ពីឆ្នាំ១៩៥៨ ដល់ឆ្នាំ១៩៦២។ ចលនានេះជាចលនាសេដ្ឋកិច្ច និងសង្គមដែលមានគោលបំណងប្រែក្លាយប្រទេសនេះយ៉ាងឆាប់រហ័សពីប្រទេសដែលមានសេដ្ឋកិច្ចពឹងផ្អែកលើវិស័យកសិកម្ម ឲ្យក្លាយទៅជាសង្គមនិយមនិងឧស្សាហកម្មទំនើប។ គេចាត់ទុកថា ចលនាមហាលោតផ្លោះជាអ្នកត្រូវទទួលខុសត្រូវចំពោះការស្លាប់មនុស្សរាប់សិបលាននាក់ នៅក្នុងគ្រោះទុរ្ភិក្សដែលបណ្តាលមកពីការប្រមូលកសិផលជាកំហិត ជាពេលមួយដែលអ្នកដែលធ្វើកសិកម្មឯកជនត្រូវបានគេចាត់ទុកថា ជា «អ្នកប្រឆាំងនឹងបដិវត្តន៍»។
លោក Wenqian Gao ដែលជាទឹប្រឹក្សាជាន់ខ្ពស់ផ្នែកគោលនយោបាយសិទ្ធិមនុស្សនៅក្នុងប្រទេសចិន និងធ្លាប់ជាអ្នកស្រាវជ្រាវជាន់ខ្ពស់នៅមជ្ឈមណ្ឌលស្រាវជ្រាវប្រវត្តិគណបក្សកុម្មុយនិស្តចិន (Research Center on Party Literature of the Communist Party of China) បាននិយាយថា៖«គ្រោះមហន្តរាយទាំងអស់ដែលបានកើតឡើងក្នុងពេលនៃការកាន់អំណាចរបស់បក្សកុម្មុយនិស្តគឺដោយសារតែអំណាចដ៏មហាសាលរបស់លោកប្រធានម៉ៅ»។
លោក Gao ដែលជាអ្នកប្រវត្តិសាស្ត្រផ្តោតលើគណបក្សកុម្មុយនិស្តចិនបាននិយាយថា៖«នេះហើយជាមូលហេតុដែលបន្ទាប់ពីមរណភាពរបស់ប្រធានម៉ៅ មេដឹកនាំចាស់ៗដែលដឹកនាំដោយលោក Deng Xiaoping បានលុបបំបាត់តួនាទីនេះចេញពីគណបក្ស។ តំណែងនេះបានបង្កើតលក្ខខណ្ឌសមរម្យមួយសម្រាប់អំណាចផ្តាច់ការ និងខ្វះការត្រួតពិនិត្យផ្ទៃក្នុងរបស់បក្ស»។
ប្រសិនបើលោកប្រធានាធិបតី ស៊ី មានអំណាចប្រមូលផ្តុំរួចទៅហើយ តើលោកនឹងនៅតែចង់ធ្វើជាប្រធានបក្សទៀតឬទេ?
លោក Gao ដែលបាននិយាយនៅក្នុងកម្មវិធី Pro & Con បានផ្តល់មូលហេតុចំនួនពីរ «ទី១ ងារជាប្រធានបក្ស និងជាអគ្គលេខាធិការបក្សមានអំណាចខុសគ្នា។ អគ្គលេខាធិការបក្ស ដែលសព្វថ្ងៃជាងាររបស់លោកប្រធានាធិបតី ស៊ី ជាការសម្របសម្រួលសម្រាប់គណៈកម្មាធិការអចិន្ត្រៃយ៍ការិយាល័យនយោបាយរបស់គណបក្សកុម្មុយនិស្ត។ លោកមានអំណាចស្មើនឹងសមាជិកដទៃទៀតរបស់គណៈកម្មាធិការ និងតំណាងឲ្យសំឡេងឆ្នោតចំនួនតែមួយប៉ុណ្ណោះ»។
លោក Gao បានថ្លែងថា នៅក្រោមអំណាចដែលបង្កើតឡើងដោយលោកប្រធានម៉ៅ ប្រធានបក្ស «មានអំណាចវ៉េតូ និងមានអំណាចនៅលើអ្នកណាៗទាំងអស់។
លោក Gao បានបន្ថែមថា៖ «មូលហេតុទី២គឺថា លោកប្រធានាធិបតី ស៊ីចង់រក្សាអំណាចរបស់លោក បន្ទាប់ពីសមាជបក្សលើកទី២០។ បើនិយាយឲ្យចំទៅ ដោយសារតែប្រធានបក្ស និងអគ្គលេខាធិការជាតំណែងពីរផ្សេងគ្នា លោកប្រធានាធិបតី ស៊ី អាចប្រកែកថា ការកំណត់អាណត្តិឲ្យកាន់តំណែងត្រឹមពីរអាណត្តិសម្រាប់អគ្គលេខាធិការបក្សមិនអាចប្រើប្រាស់ជាមួយនឹងលោកបាននោះទេ»៕
ប្រែសម្រួលដោយ ប៊ុន ប៉េងហ៊ុយ
