រដ្ឋាភិបាលឡាវនឹងផ្អាកការសម្រេចយល់ព្រមលើគម្រោងសាងសង់ទំនប់វារីអគ្គិសនីថ្មីៗ ស្របពេលដែលខ្លួនកំពុងពិនិត្យលើគម្រោងវារីអគ្គិសនីចំនួនជាង ៥០ គម្រោង នាពេលបច្ចុប្បន្ននេះ បន្ទាប់ពីមានហេតុការណ៍បាក់ទំនប់វារីអគ្គិសនីដ៏មហន្តរាយមួយបានកើតឡើងកាលពីចុងខែមុន។
លោក Kanya Khammoungkhoun អគ្គនាយករងនៃក្រសួងការបរទេសឡាវ បានប្រាប់ VOA ថា ការត្រួតពិនិត្យដ៏ទូលំទូលាយមួយលើគម្រោងទំនប់វារីអគ្គិសនីរបស់ឡាវនឹងធ្វើឡើង បន្ទាប់ពីមានគ្រោះមហន្តរាយបាក់ទំនប់នេះបានកើតឡើង ដែលបានសម្លាប់មនុស្សអស់ជាច្រើននាក់ និងធ្វើឲ្យមនុស្សជាង១ម៉ឺននាក់ជម្លៀសចេញពីផ្ទះសម្បែង។
លោកបាននិយាយថា៖ «ទំនប់វារីអគ្គិសនីជាង ៥០ នៅក្នុងប្រទេសឡាវនឹងត្រូវស៊ើបអង្កេតឡើងវិញ និងត្រួតពិនិត្យឲ្យបានហ្មត់ចត់លើផ្នែកបច្ចេកទេស។ ហើយរដ្ឋាភិបាលឡាវនឹងមិនយល់ព្រមឲ្យមានការសាងសង់ទំនប់វារីអគ្គិសនីថ្មីបន្ថែមទៀតនោះទេ រហូតទាល់តែមានការបញ្ជាក់ថា អ្វីៗដំណើរការល្អ»។
កាលពីថ្ងៃទី ២៣ ខែកក្កដា ទំនប់ជំនួយមួយនៃបណ្ដុំទំនប់វារីអគ្គិសនី Xe Pian Xe Namnoy បានបាក់ដោយធ្វើឲ្យទឹក ៥ ពាន់លានម៉ែត្រគីបជន់ហូរលិចភូមិនានានៅក្នុងស្រុក Sanamxai នៃខេត្ត Attapeu។
ការបាក់ទំនប់នេះបានបណ្ដាលឲ្យមនុស្សប្រហែល ៦ពាន់នាក់ជម្លៀសចេញពីផ្ទះសម្បែងនៅក្នុងប្រទេសឡាវ មនុស្សជាង ៣០ នាក់ ស្លាប់បាត់បង់ជីវិត ហើយមនុស្សជាង ១០០នាក់ទៀតបាត់ខ្លួន។
មនុស្សប្រហែល ៥ពាន់នាក់ផ្សេងទៀតនៅស្រុកសៀមប៉ាង ខេត្តស្ទឹងត្រែង ប្រទេសកម្ពុជា នៅជិតព្រំដែនឡាវ ក៏ត្រូវបានជម្លៀសចេញពីផ្ទះសម្បែងផងដែរ៕
