គេបានបញ្ជាក់ថា មានមនុស្សយ៉ាងតិចណាស់១៩នាក់បានស្លាប់នៅក្នុងការធ្លាយទំនប់ទឹកមួយក្នុងផ្នែកខាងត្បូងនៃប្រទេសឡាវ កាលពីថ្ងៃចន្ទ ដែលបានបណ្តាលឱ្យអ្នកស្រុករាប់ពាន់នាក់គ្មានលំនៅដ្ឋាន ហើយមានមនុស្សរាប់រយនាក់ទៀតបានបាត់ខ្លួន។
ទំនប់ទឹក Xepian-Xe Nam Noy បានធ្លាយនៅក្នុងខេត្ត Attapeu នាប៉ែកខាងត្បូងនៃប្រទេសឡាវ កាលពីយប់ថ្ងៃចន្ទបណ្តាលឱ្យទឹក៥ពាន់លានម៉ែត្រគូប ហូរត្របាញ់ទៅកាន់ទូទាំងតំបន់នោះ នាំឱ្យរសាត់ផ្ទះនិងមានប្រជារាស្ត្រច្រើននាក់គ្មានទីលំនៅ។
ទីភ្នាក់ងារព័ត៌មាន KPL របស់រដ្ឋបានផ្សាយថា មានមនុស្ស៦៦០០នាក់បានខ្ចាត់ព្រាត់ពីផ្ទះសម្បែងនៅតាមបណ្តោយខ្សែទឹកខាងក្រោមពីទំនប់ទឹកនេះ ដែលឋិតនៅចម្ងាយប្រមាណ៥៥០គ.ម.ខាងត្បូងរដ្ឋធានីវៀងចន្ទន៍។
លោកប្រធានាធិបតី Moon jae-in នៃប្រទេសកូរ៉េខាងត្បូងបានបញ្ជូនក្រុមជួយសង្គ្រោះគ្រាមានអាសន្នមួយទៅកាន់ប្រទេសលាវដើម្បីជួយក្នុងកិច្ចខិតខំប្រឹងប្រែងជួយសង្គ្រោះ។
ក្រុមហ៊ុនកូរ៉េខាងត្បូងពីរគឺក្រុមហ៊ុន SK Engineering and Construction និងក្រុមហ៊ុន korea Western Power ជាផ្នែកនៃសមាគមកសាងមួយដែលធ្វើគម្រោងការស្ថាបនាទំនប់ទឹកវារីអគ្គិសនីនេះដែលមានកម្លាំង៤១០មេហ្គាវ៉ាត់ ជាមួយនឹងក្រុមហ៊ុន Ratchaburi Electricity Holding Company និងសហគ្រាសឡាវ Lao Holding State Enterprise។
ទំនប់ទឹក Xepian-Xe Nam Noy ត្រូវគេគ្រោងថានឹងត្រូវកសាងចប់សព្វគ្រប់នៅឆ្នាំក្រោយដោយចំណាយអស់ប្រាក់ប្រមាណ១ពាន់លានដុល្លារ៕
