មនុស្សយ៉ាងហោចណាស់ក៏២៦នាក់ដែរឥឡូវនេះត្រូវបានបញ្ជាក់ថាបានស្លាប់ហើយមនុស្ស១០៣នាក់ទៀតកំពុងបាត់ខ្លួនបន្ទាប់ពីការបាក់ទំនប់ដ៏មហន្តរាយកាលពីថ្ងៃចន្ទនៅក្នុងតំបន់ភាគខាងត្បូងប្រទេសឡាវ។
ទំនប់ Xepian-Xe Nam Noy បានបាក់នៅភាគអាគ្នេយ៍ខេត្ត Attapeu ដែលស្ថិតនៅចម្ងាយ៥៥០គីឡូម៉ែត្រភាគខាងត្បូងរដ្ឋធានីវៀងចន្ទន៍ បានបញ្ចេញទឹក៥ពាន់លានម៉ែត្រគូប ធ្វើឲ្យលិចស្រុកនោះ ដោយនាំផ្ទះរបស់អ្នកស្រុករាប់រយខ្នងទៅជាមួយហើយនិងធ្វើឲ្យអ្នកស្រុកមួយចំនួនធំគ្មានផ្ទះរស់នៅ។
អ្នកឃើញហេតុការណ៍ផ្ទាល់នឹងភ្នែកបានប្រាប់ VOA ផ្សាយជាភាសាឡាវថា មនុស្សជាង៦ពាន់នាក់គ្មានទីកន្លែងរស់នៅដោយសារមហន្តរាយនេះ។ ពួកគេជាច្រើនបានត្រូវជួយសង្គ្រោះហើយបានស្នាក់នៅទីជម្រករបស់រដ្ឋាភិបាលនៅក្នុងខេត្ត Attapeu ហើយនិងខេត្ត Champasack នៅក្បែរនោះ។
មនុស្សរងរបួសជាច្រើនបានត្រូវគេយកទៅកាន់មន្ទីរពេទ្យនៅក្នុងខេត្ត Attapeu ហើយនឹងខេត្តនៅជុំវិញនោះ។
លោក Moon Jae-in ប្រធានាធិបតីនៃប្រទេសកូរ៉េខាងត្បូងបានបញ្ជាឲ្យក្រុមជួយសង្គ្រោះបន្ទាន់មួយធ្វើដំណើរទៅកាន់ប្រទេសឡាវដើម្បីជួយការខំប្រឹងប្រែងស្តារឡើងវិញ។ ក្រុមហ៊ុនកូរ៉េខាងត្បូង២គឺ ក្រុមហ៊ុន SK Enginerring and Construction និងក្រុមហ៊ុន Korea Western Power ជាផ្នែកមួយនៃក្រុមហ៊ុនស្ថាបនាគម្រោងទំនប់វារីអគ្គីសនីដែលមានកម្លាំង៤១០មេហ្គាវ៉ាត់ រួមជាមួយក្រុមហ៊ុន Ratchabury Electricity Generating Holding របស់ថៃ និងក្រុមហ៊ុនរដ្ឋឡាវឈ្មោះ Lao Holding State Enterprise។
ទំនប់ Xepian-Xe Nam Noy ត្រូវបានគេរំពឹងថា នឹងសង់រួចរាល់នៅឆ្នាំក្រោយដោយមានតម្លៃប្រហែល១ពាន់លានដុល្លារ។
ប៉ុន្មានម៉ោងមុនពេលគ្រោះមហន្តរាយកាលពីយប់ថ្ងៃចន្ទបានកើតមានឡើង ក្រុមហ៊ុននោះបានព្រមាននៅក្នុងលិខិតមួយច្បាប់ថា ទឹករាប់លានតោននឹងហូរចាក់ចូលក្នុងទន្លេ Xe-Pia ប្រសិនបើទំនប់មិនមានសុវត្ថិភាពប្រកបដោយគ្រោះថ្នាក់នោះបាក់។ ក្នុងលិខិតព្រមានរបស់ក្រុមហ៊ុនទាំងនោះ ក្រុមហ៊ុនដែលគេស្គាល់ថា PNPC បានប្រាប់ឲ្យដឹងថា ទំនប់ផ្ទុកទៅដោយទឹក មិនមានសុវត្ថិភាពទេបណ្តាលមកពី ការធ្លាក់ភ្លៀងយ៉ាងខ្លាំងហើយនិងការបញ្ចេញទឹកចំនួន៥លានតោនចូលក្នុងទន្លេ Xe Pian ប្រសិនបើទំនប់នោះបាក់។ គម្រោងអាងស្តុកទឹកនោះមានបំណងសង់កម្ពស់៧៣ ម៉ែត្រហើយនិងប្រវែង១ពាន់៦រយម៉ែត្រ ដោយមានសមត្ថភាពផ្ទុកទឹក១ពាន់៤៣លានម៉ែត្រគូប។
ទឹកក្នុងទំនប់ Xe-Pian-Xe-Namnoy បានហូរចូលក្នុងទន្លេសេកុងកាត់តាមប្រទេសកម្ពុជា ហើយមានការព្រួយកង្វល់ពីផលប៉ះពាល់យ៉ាងខ្លាំងនៅខ្សែទឹកខាងក្រោម។
តាមគណៈកម្មាធិការទន្លេមេគង្គ ឬ MRC បានប្រាប់ឲ្យដឹងថា កម្រិតទឹកនៅទូទាំងតំបន់ទន្លេមេគង្គបានកើនឡើងយ៉ាងឆាប់រហ័សចាប់តាំងពីថ្ងៃទី១៥ ខែកក្កដាមក ហើយមានករណីម្តងនោះ ទឹកបានឡើងជាង៤ម៉ែត្រនៅក្នុងទីក្រុង Luang Prabang នៃប្រទេសឡាវ មកពីធ្លាក់ភ្លៀងយ៉ាងខ្លាំងដែលបណ្តាលមកពីព្យុះតំបន់ត្រូពិកឈ្មោះ Son-Ting។
លោក Harris បាននិយាយថា ឧបទ្ទវហេតុនេះបានបង្កើននូវការព្រួយកង្វល់អំពីភាពគ្រោះថ្នាក់នានាដែលអាចកើតមាននៅជុំវិញទំនប់នេះដោយសារតែអាកាសធាតុមិនល្អដែលបណ្តាលមកពីការប្រែប្រួលអាកាសធាតុ ហើយនិងប្រព័ន្ធផ្តល់ដំណឹងមិនគ្រប់គ្រាន់ រួមទាំងទំនប់ស្ថិតនៅក្នុងការសាងសង់នៅពេលបច្ចុប្បន្ននេះ។
ទំនប់ជាង៧០កំពុងស្ថាបនាត្រូវបានគេគ្រោងធ្វើនៅពេលបច្ចុប្បន្ននេះនៅប្រទេសឡាវ ដោយរួមមានទាំងទំនប់ជាច្រើននៅទន្លេមេគង្គផងដែរ។ លោកHarrisនិយាយទៀតថា តួនាទីនិងការទទួលខុសត្រូវរបស់ក្រុមហ៊ុនឯកជនដើម្បីអភិវឌ្ឍន៍គម្រោងទាំងនោះត្រូវបានគេចោទសួរយ៉ាងខ្លាំង បន្ទាប់ពីមហន្តរាយនេះ៕
ប្រែសម្រួលដោយ ជឹង ប៉ូជីន
