អាជ្ញាធរមានសមត្ថកិច្ចក្នុងស្រុកគិរីសាគរ ខេត្តកោះកុង បានចាប់ខ្លួនតំណាងប្រជាពលរដ្ឋមា្នក់ ដែលរងការចោទប្រកាន់ពីតំណាងក្រុមហ៊ុនរបស់សមាជិកព្រឹទ្ធសភាខាងគណបក្សកាន់អំណាចមួយរួបថា បានបោះបង្គោលដីខុសច្បាប់។ នេះបើយោងតាមការបញ្ជាក់ពីក្រុមមន្ត្រីសិទ្ធិមនុស្សប្រចាំខេត្តកោះកុង។
លោក ហេង សុខ វ័យ ៤៨ ឆ្នាំ តំណាងប្រជាពលរដ្ឋចំនួន៥០ គ្រួសារដែលកំពុងមានវិវាទដីទំហំ១០៣ ហិកតា ជាមួយក្រុមហ៊ុន LYP Group របស់លោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា ត្រូវបានចាប់ខ្លួន កាលពីថ្ងៃសុក្រ គឺពីរថ្ងៃមុនពេលបោះឆ្នោតព្រឹទ្ធសភា បន្ទាប់ពីតំណាងប្រជាពលដ្ឋរូបនោះ បានចូលទៅបោះបង្គោលដីដែលរងការឈូសឆាយដោយគ្រឿងចក្ររបស់ក្រុមហ៊ុន កាលពីចុងឆ្នាំ២០១៧។
លោក អ៊ិន គង់ជិត មន្ត្រីសិទ្ធិមនុស្សរបស់អង្គការការពារសិទ្ធិមនុស្សលីកាដូ ប្រចាំខេត្តកោះកុង ថ្លែងថា លោក ហេង សុខ បានចូលទៅបោះបង្គោលលើដីដែលមានទំនាស់កាលពីថ្ងៃសុក្រ។ ភ្លាមៗ ក្រោយការបោះបង្គោលដីដើម្បីចរចាជាមួយក្រុមហ៊ុននោះ លោកចាន់ ណាគ្រី តំណាងក្រុមហ៊ុន LYP Group ដែលគ្រប់គ្រងតំបន់សេដ្ឋកិច្ចពិសេសក្នុងខេត្តកោះកុង បានប្តឹងឲ្យសមត្ថកិច្ចចាប់ខ្លួនលោក ហេង សុខ តែម្តង។
«លោកចាន់ ណាគ្រី មេការក្រុមហ៊ុន គាត់បានប្តឹងទៅនគរបាលស្រុកគិរីសាគរ និងនគរបាលឃុំព្រែកខ្សាច់ហ្នឹង ហើយនៅម៉ោង១២ [ថ្ងៃត្រង់]ជាងម្សិលមិញហ្នឹងបានចាប់ខ្លួនគាត់ ហើយបានដឹកតាមរថយន្ត ក្រុមហ៊ុនហ្នឹងបញ្ជូនមកដល់ស្នងការនគរបាលខេត្តកោះកុង កាលពីល្ងាចមិញ ម៉ោង ៥ [និង] ២០នាទី។ អីចឹងនៅព្រឹកមិញនេះ ខាងនគរបាលព្រហ្មទណ្ឌកម្រិតធ្ងន់ហ្នឹង គាត់បានសាកសួរ ឈ្មោះហេង សុខ តំណាងប្រជាពលរដ្ឋ ៥០គ្រួសារហ្នឹង តាមពាក្យបណ្តឹងលោក ចាន់ ណាគ្រី មេកា ក្រុមហ៊ុន SEZ របស់លោក លី យ៉ុងផាត់»។
មន្ត្រីសិទ្ធិមនុស្សរូបនេះ អះអាងបន្ថែមថា លោក លី យ៉ុងផាត់ ដែលមានងារផ្សេងទៀតជាឧកញ្ញ៉ា គឺជា អ្នកមានលុយដ៏មានឥទ្ធិពលម្នាក់ក្នុងខេត្តកោះកុង ដូច្នេះហើយរាល់បណ្តឹងចេញពីក្រុមហ៊ុនរបស់លោក ត្រូវអាជ្ញាធរមូលដ្ឋានចាត់ការភ្លាមៗ ហើយសំណុំរឿងតែងតែទៅដល់តុលាការ ដែលជារឿយៗបានឃុំខ្លួនជនដែលត្រូវបានចាប់ដោយកម្លាំងមានសមត្ថកិច្ច។
នៅមុនពេលដែលអាជ្ញាធរចាប់ខ្លួនលោក ហេង សុខ ដែលមានលំនៅដ្ឋានក្នុងឃុំព្រែកខ្សាច់ ស្រុក គិរីសាគរ ខេត្តកោះកុង តំណាងប្រជាពលរដ្ឋរូបនេះ បានប្តឹងទៅអភិបាលខេត្តកោះកុង គឺអ្នកស្រី មិថុនា ភូថង ដើម្បីសុំកិច្ចអន្តរាគមន៍។ នេះបើយោងតាមពាក្យបណ្តឹងរបស់លោក ហេង សុខ ដែលបានដាក់ចូលទៅសាលាខេត្តកោះកុង កាលពីថ្ងៃទី១២ ខែ ធ្នូ ឆ្នាំ ២០១៧។
ពាក្យបណ្តឹងរបស់លោក ហេង សុខ បានពណ៌នាអំពីដំណើររឿងវិវាទដីធ្លីជាមួយក្រុមហ៊ុនលោក លី យ៉ុងផាត់ ដែលបានកើតឡើង នៅពេលក្រុមហ៊ុនរបស់សមាជិកព្រឹទ្ធសភារូបនេះ បានចូលមកដល់តំបន់ព្រែកខ្សាច់នៅឆ្នាំ ២០០៥។
វិវាទបានកើនកម្តៅខ្លាំង ដោយនៅខែកុម្ភៈឆ្នាំ ២០១៦ ក្រុមហ៊ុនបាននាំមន្ត្រីបរិស្ថានមកបោះបង្គោលចំនួន ៦ បង្គោល ពីចំណុចឆាយក្រូច មកដល់ចំណុចលើត្រពាំងគា ក្នុងភូមិសំរុងតាកែវ ដើម្បីខណ្ឌព្រំប្រទល់ដី។ ការបោះបង្គោលនេះ បានហ៊ុមព័ទ្ធផ្ទៃដីសរុប ១០៣ហិកតា របស់ប្រជាពលរដ្ឋទាំង ៥០គ្រួសារ។
ពាក្យបណ្តឹងបានរៀបរាប់ទៀតថា ក្រោយមក គឺនៅខែធ្នូ ឆ្នាំ ២០១៧នេះ ក្រុមហ៊ុនដែលមានលោក ចាន់ ណាគ្រី ជាតំណាងបានបញ្ជូនគ្រឿងចក្រមកឈូសឆាយ ប៉ះពាល់លើដីប្រជាពលរដ្ឋនៅចំណុចវាលពួចធំ ក្នុងភូមិ សំរុងតាកែវ ធ្វើឲ្យបាត់បង់ស្លាកស្នាមព្រំប្រទល់ក្បាលដី។
ពាក្យបណ្តឹងបានសរសេរបញ្ជាក់ក្នុងន័យដើមថា៖«ពួកខ្ញុំនាំគ្នាចេញទៅតវ៉ាសុំឲ្យគ្រឿងចក្រផ្អាកការឈូសឆាយ ក៏តំណាងក្រុមហ៊ុនមិនព្រមស្តាប់ដែរ»។
លោក ហេង សុខ ក្នុងបណ្តឹងរបស់លោក ក៏សុំអន្តរាគមន៍ពីអ្នកស្រី មិថុនា ភូថង លើចំណុចបួន ដែលនោះ គឺ «ស្នើសុំកាត់ឆ្វៀលផ្ទៃដីទំហំ ១០៣ហិកតា ដែលមានទីតាំងស្ថិតនៅចំណុចវាលពួចធំ ភូមិ សំរុងតាកែវ ឃុំព្រែកខ្សាច់ ស្រុកគិរីសាគរ ពីទីតាំងអនុវត្តគំរោងរបស់ក្រុមហ៊ុន SEZ និងសុំចុះបញ្ជីដីគ្រប់គ្រងជាកម្មសិទ្ធិ»។
លោក ញៀប សំអឿន មន្ត្រីសិទ្ធិមនុស្សរបស់សមាគមការពារសិទ្ធិមនុស្សអាដហុក ប្រចាំខេត្តកោះកុង បានប្រាប់ VOA ថា ទោះជាមានពាក្យបណ្តឹងរបស់ប្រជាពលរដ្ឋចូលដល់សាលាខេត្តក្តី ក៏មិនឃើញមានការផ្តល់ដំណោះស្រាយណាមួយធ្វើឡើង តែបែរជាមានការចាប់ខ្លួនជនរងគ្រោះក្នុងជម្លោះដីធ្លីនេះទៅវិញ។
លោកមានប្រសាសន៍ថា៖
«ខាងប្រជាពលរដ្ឋដែលមានលោក ហេង សុខ ជាតំណាងហ្នឹង ដាក់ពាក្យស្នើសុំកាត់ឆ្វៀលទៅខេត្ត ហើយរដ្ឋបាលខេត្ត មិនព្រមដោះស្រាយគាត់ បែរទៅជាចាប់ឃាត់ខ្លួនគាត់ ក្នុងសំណុំរឿងចោទពីព្រហ្មទណ្ឌចឹង។ យើងគិតថា រឿងហ្នឹងវាអយុត្តិធម៌សម្រាប់ពលរដ្ឋហើយ ជាទូទៅណ៎ា។ ហើយខ្ញុំសូមបញ្ជាក់ផងដែរ បើសិនណាជាមានការឃុំខ្លួនគាត់ម្នាក់ទៀតនារសៀលនេះ យើងគិតថា ក្រុមហ៊ុននេះ គឺមិនមែនជា ក្រុមហ៊ុនដែលអភិវឌ្ឍន៍ជួយប្រជាពលរដ្ឋឲ្យរួចផុតអំពីភាពក្រីក្រទេ»។
លោកបានបញ្ជាក់ថា ក្រុមហ៊ុនរបស់លោក លី យ៉ុងផាត់ ក៏បានប្តឹងប្រឆាំងនឹងប្រជាពលរដ្ឋជាញឹកញាប់ និងប្តឹងចាប់តំណាងប្រជាពលរដ្ឋមួយរូបកាលពីកន្លងមកដែរ ក្នុងករណីស្រដៀងគ្នានេះ។
លោក ចាន់ ណាគ្រី មេការក្រុមហ៊ុន LYP Group នៅតំបន់សេដ្ឋកិច្ចពិសេសខេត្តកោះកុង បដិសេធមិនផ្តល់ការអធិប្បាយកាលពីថ្ងៃសៅរ៍នេះ។
ចំណែក លោក គឹម វណ្ណា នាយប៉ុស្តិ៍នគរបាលរដ្ឋបាលឃុំព្រែកជីក បានឆ្លើយតបទៅនឹងសំណួររបស់ VOAយ៉ាងខ្លី មុននឹងដាក់ទូរស័ព្ទចុះ នៅពេល VOA សួរលោកថា តើការចាប់ខ្លួនលោក ហេង សុខ ធ្វើឡើងទៅតាមបណ្តឹងរបស់ក្រុមហ៊ុនលោក លី យ៉ុងផាត់ ឬយ៉ាងណា។ លោកឆ្លើយយ៉ាងដូច្នេះ៖
«អ្វីដែលពាក់ព័ន្ធច្បាប់ ធ្វើតាមច្បាប់»។
អ្នកស្រី មិថុនា ភូថង អភិបាលខេត្តកោះកុង មានប្រសាសន៍ថា អ្នកស្រីមិនទាន់ទទួលបានដំណឹងអំពីការចាប់ខ្លួន លោក ហេង សុខទេ តែអ្នកស្រីថា អ្នកស្រីនឹងពិនិត្យទិដ្ឋភាពច្បាប់ពាក់ព័ន្ធករណីនេះ។
តាមការបញ្ជាក់របស់លោក អ៊ិន គង់ជិត មន្ត្រីសិទ្ធិមនុស្សរបស់អង្គការការពារសិទ្ធិមនុស្សលីកាដូប្រចាំខេត្តកោះកុង បានឲ្យដឹងថា វិវាទដីធ្លីរបស់លោក ហេង សុខ និងប្រជាពលរដ្ឋផ្សេងទៀត ជាមួយក្រុមហ៊ុនរបស់លោកសមាជិកព្រឹទ្ធសភា លី យ៉ុងផាត់ បានកើតឡើង ក្រោយក្រុមហ៊ុននេះ បានទទួលដីសម្បទានសេដ្ឋកិច្ចប្រមាណ៩ ៩៧៧ ហិកតាពីរដ្ឋាភិបាលនៅឆ្នាំ ២០១០។ ផ្ទៃដីនេះ គឺស្ថិតក្នុងតំបន់ឧទ្យានជាតិបុទុមសាគរ នៃខេត្តកោះកុង ដែលមានព្រំប្រទល់ជាប់នឹងប្រទេសថៃ។
មន្ត្រីសិទ្ធិមនុស្សរូបនេះ អះអាងថា លោក ហេង សុខ អាចនឹងត្រូវតុលាការឃុំខ្លួន ប្រសិនបើអាជ្ញាធរមានសមត្ថកិច្ចកសាងសំណុំរឿងបញ្ជូនទៅតុលាការខេត្ត។
លោកបន្តថា អ្នកដែលត្រូវបានបញ្ជូនទៅតុលាការ កម្រនឹងត្រូវបានតុលាការដោះលែងមកវិញ បើមើលទៅលើករណីផ្សេងទៀត ដូចជាការចាប់ខ្លួនសកម្មជនការពារបរិស្ថានពីរនាក់របស់អតីតអង្គការមាតាធម្មជាតិ ដែលបានកើតឡើងកាលពីខែកញ្ញា ឆ្នំា ២០១៧។ ពួកគេទាំងពីរនាក់ ក៏រងការប្តឹងដោយក្រុមហ៊ុនរបស់លោក លី យ៉ុងផាត់ ផងដែរ៕
