ប្រជាជនកេនយ៉ាបានឧទ្ទិសពីធីសូត្រធ៌មក្នុងបុណ្យព្រះយេស៊ូមានព្រះជន្មរស់ឲ្យដល់ជនរងគ្រោះទាំង១៤៨នាក់នៃការសម្លាប់រង្គាលកាលពីថ្ងៃព្រហស្បតិ៍ ដោយក្រុម al-Shabab នៅក្នុងសាកលវិទ្យាល័យមួយ។
ពិធីបុណ្យបានប្រព្រឹត្តទៅនៅទូទាំងប្រទេសកេនយ៉ានៅថ្ងៃអាទិត្យនេះ ដើម្បីរំលឹកដល់វិញ្ញាណក្ខន្ធជនដែលបានត្រូវសម្លាប់នៅក្នុងសាកលវិទ្យាល័យ Garissa ។
នៅពេលជាមួយគ្នានេះ ប្រធានសន្តិសុខនៃប្រទេសកេនយ៉ាបានការពារដល់ការឆ្លើយតបនឹងការវាយប្រហារនោះនេះដោយកងកម្លាំងពិសេស។
ទីភ្នាក់ងារព័ត៌មានបារាំងបានរាយការណ៍ថា កងកម្លាំងពិសេសបានចំណាយពេលយ៉ាងតិចណាស់៧ម៉ោងដើម្បីទៅដល់កន្លែងនៃការសម្លាប់រង្គាលនោះ បន្ទាប់ពីធ្វើដំណើរតាមយន្តហោះពីរដ្ឋធានីណៃរ៉ូប៊ី (Nairobi) គឺច្រើនម៉ោងក្រោយពីក្រុមបុគ្គលិកសន្តិសុខឯទៀតៗបានប្រយុទ្ធប្រឆាំងនឹងក្រុមជនសកម្មប្រយុទ្ធ។ គេរាយការណ៍ថាអ្នកកាសែតខ្លះដែលបើកទ្បានក្នុងចម្ងាយ៣៦៥គ.ម.ដែរនោះ បានទៅដល់កន្លែងកើតហេតុមុនកងកម្លាំងពិសេស។
នៅថ្ងៃអាទិត្យនេះកាសែតកេនយ៉ាមួយចំនួនបានរិះគន់យ៉ាងខ្លាំងដល់ការឆ្លើយតបរបស់រដ្ឋាភិបាល។
កាលពីថ្ងៃសៅរ៍ប្រធានាធិបតីកេនយ៉ាលោក Uhuru Kenyatta បានអំពាវនាវឲ្យមានឯកភាពគ្នានៅក្រោយការសម្លាប់រង្គាលដោយក្រុម al-Shabab ដែលបានយកក្រុមអ្នកកាន់គ្រិស្តសាសនាភាគច្រើនជាគោលដៅនៃការវាយប្រហាររបស់ខ្លួន៕
