ក្រុមជនសកម្មប្រយុទ្ធ al-Shabab ដែលបានអះអាងទាមទារការទទួលខុសត្រូវដល់ការសម្លាប់មនុស្ស១៤៨នាក់នៅក្នុងមជ្ឈមណ្ឌលសាកលវិទ្យាល័យមួយក្នុងប្រទេស Kenya កាលពីថ្ងៃព្រហស្បតិ៍បានសន្យាថានឹងធ្វើឲ្យមាន «ការបង្ហូរឈាមមួយលើកទៀត»។
សេចក្តីថ្លែងការណ៍មួយរបស់ក្រុម al-Shabab នៅថ្ងៃសៅរ៍នេះបានចែងថា «គ្មានការប្រុងប្រយ័ត្ន ឬវិធានការសុវត្ថិភាពណាមួយនឹងអាចធានារ៉ាប់រងសុវត្ថិភាពអ្នកឯងបានទេ និងអាចរារាំងការវាយប្រហារ ឬបញ្ចៀសការបង្ហូរឈាមមួយលើកទៀតនៅក្នុងទីក្រុងរបស់អ្នកឯងបានទេ»។
កាលពីយប់ថ្ងៃសុក្រ រដ្ឋមន្ត្រីមហាផ្ទៃកេនយ៉ាលោក Joseph Nkaissery បាននិយាយថា មានជនជាប់សង្ស័យយ៉ាងតិចណាស់បីនាក់បានត្រូវចាប់ខ្លួនក្នុងការទាក់ទិនជាមួយការវាយប្រហារនៅក្នុងសាកលវិទ្យាល័យនោះ។
អាជ្ញាធរបានចាប់ផ្តើមដឹកជញ្ជូនសាកសពនិស្សិតច្រើននាក់ដែលបានត្រូវសម្លាប់ដោយក្រុមជនសកម្មប្រយុទ្ធអ៊ីស្លាមនិយមនៅក្នុងសាកលវិទ្យាល័យ Garissa ទៅកាន់រដ្ឋធានីដើម្បីបញ្ជាក់អត្តសញ្ញាណ។
គ្រួសារពួកនិស្សិតបានប្រមូលផ្តុំគ្នានៅក្នុងក្រុង Nairobi កាលពីថ្ងៃសុក្រនៅក្រោយការវាយប្រហារក្នុងសាកលវិទ្យាល័យនោះដែលបានបណ្តាលឲ្យមនុស្ស១៤៨នាក់បាត់បង់ជីវិត ដោយមានរួមទាំងអ្នកវាយប្រហារបួននាក់ផងដែរ៕
