ប្រធានាធិបតីសហរដ្ឋអាមេរិកលោក Joe Biden បាននិយាយនៅក្នុងសុន្ទរកថាតាមទូរទស្សន៍មួយនៅថ្ងៃអាទិត្យថា ចំនួនមនុស្សដែលត្រូវបានជម្លៀសចេញពីទីក្រុងកាប៊ុល ប្រទេសអាហ្វហ្គានីស្ថាន នឹងប្រែប្រួលពីមួយថ្ងៃទៅមួយថ្ងៃអាស្រ័យលើលក្ខខណ្ឌជាក់លាក់និងសុវត្ថិភាពនៅថ្ងៃនោះ។
នៅត្រឹមព្រឹកថ្ងៃអាទិត្យ សេតវិមានបាននិយាយថា សហរដ្ឋអាមេរិកបានជម្លៀសប្រជាជនចំនួន៧.៨០០ នាក់ចេញពីទីក្រុងកាប៊ុលក្នុងរយៈពេល២៤ម៉ោងមុន។ ត្រឹមល្ងាចថ្ងៃអាទិត្យ សេតវិមានបានបន្ថែមចំនួន៥.១០០ នាក់ផ្សេងទៀតចំពោះការជម្លៀសសរុបប្រចាំថ្ងៃ។
មន្រ្តីសេតវិមានបាននិយាយថា សរុបមកសហរដ្ឋអាមេរិកបានជម្លៀសប្រជាជនចំនួន៣០.៣០០ នាក់កាលពីសប្តាហ៍មុន។ ចាប់តាំងពីចុងខែកក្កដាមក មនុស្សប្រហែល៣៥.៥០០នាក់ត្រូវបានជម្លៀសចេញពីទីក្រុងកាប៊ុល។ មនុស្សរាប់ម៉ឺននាក់ទៀតកំពុងរង់ចាំចេញពីទីក្រុងកាប៊ុល។
លោក Biden បាននិយាយថា៖ «ពលរដ្ឋអាមេរិកណាក៏ដោយដែលចង់ត្រឡប់ទៅផ្ទះវិញនឹងបានត្រឡប់មកផ្ទះវិញ ហើយយើងក៏កំពុងធ្វើការដើម្បីជម្លៀសសម្ព័ន្ធមិត្តអាហ្វហ្គានីស្ថានរបស់យើងនិងជនជាតិអាហ្វហ្គានីស្ថានដែលងាយរងគ្រោះផ្សេងទៀតចេញពីប្រទេសដែរ»។
លោក Biden បាននិយាយថា គ្មានយន្តហោះណាមួយមកពីទីក្រុងកាប៊ុលបានហោះត្រង់មកសហរដ្ឋអាមេរិកទេ។ លោកបាននិយាយថាផ្ទុយទៅវិញ រាល់ជើងហោះហើរទាំងអស់ចុះចតដំបូងនៅក្នុងមូលដ្ឋានយោធានៅក្នុងប្រទេសមួយចំនួន ទីដែលអ្នកមិនមែនជាពលរដ្ឋអាមេរិកនឹងត្រូវឆ្លងកាត់ការត្រួតពិនិត្យប្រវត្តិនិងសន្តិសុខ៕
