ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួង​យុត្តិធម៌ ក្រើន​រំឭក​មន្រ្តី​តុលាការ​ឲ្យ​បន្ត​ចូលរួម​ដោះស្រាយ​សំណុំ​រឿង​កកស្ទះ


រូបឯកសារ៖ ក្រុមកុមារដែល​ជាកូនៗ​របស់​ស្ត្រី​ដែល​ត្រូវបាន​ចាប់ខ្លួន​ក្នុង​ការប៉ះទង្គិច​ជាមួយ​ប៉ូលិស​ក្នុង​អំឡុងពេល​នៃការបណ្តេញចេញ​ដោយ​បង្ខំនៅ​តំបន់​បឹងកក់​ពាក់​រូបថត​ម្តាយ​នៅលើ​ថ្ងាស នៅក្នុង​ការតវ៉ា​មួយ​នៅមុខ​ក្រសួង​យុត្តិធម៌​ក្នុងរាជធានី​ភ្នំពេញ​កាលពី​ថ្ងៃទី៣១ ខែឧសភា ឆ្នាំ ២០១២។

មន្រ្តី​ជាន់​ខ្ពស់​ក្រសួង​យុត្តិធម៌​បាន​អះអាង​ថា​ សេចក្តី​ណែនាំ​ថ្មី​មួយ​របស់​ក្រសួង ជា​ការ​ក្រើន​រំឭក​ដល់​មន្រ្តី​តុលាការ​ឲ្យ​បន្ត​អនុវត្ត​គោល​ការណ៍​ដែល​ក្រសួង​បាន​ដាក់​ចេញ កាល​ពី​កន្លង​ទៅ ដើម្បី​ធានា​កុំ​ឲ្យ​មាន​សំណុំ​រឿង​កក​ស្ទះ តាម​រយៈ​ការ​ពន្លឿន​ការ​កាត់​ទោស និង​ការ​ដាក់​ឲ្យ​នៅ​ក្រៅ​ឃុំ​បណ្តោះ​អាសន្ន ក្នុង​ករណី​ជាក់​ស្តែង។

លោក ជិន ម៉ាលីន រដ្ឋលេខាធិការ​ក្រសួង​យុត្តិធម៌ និង​ជា​អ្នក​នាំពាក្យ​របស់​ក្រសួង បាន​ថ្លែង​ថា ​គោល​ការណ៍​នេះ​ ត្រូវ​បន្ត​អនុវត្ត​ដដែល ដើម្បី​កុំ​ឲ្យ​មាន​ការ​កកស្ទះ​សំណុំ​រឿង។

លោក​ប្រាប់​វីអូអេ​នៅ​ថ្ងៃ​អង្គារ​ថា៖ «ជា​ការ​ដាស់​ស្មារតី​មិន​មែន​ថា​យុទ្ធនាការ​ចប់​ហើយ​ វិធាន​ការ​ទាំងអស់​ហ្នឹង អត់​អនុវត្ត អត់​ទេ។ ទោះ​បី​ជា​វិធាន​ការ​ហ្នឹង​ចប់ក៏​ដោយ វិធាន​ការ​ហ្នឹង​ គឺ​ត្រូវ​តែ​បន្ត​អនុវត្ត​ជានិរន្ត​រ៍ ដើម្បី​ប្រយោ​ជន៍​យុត្តិធម៌​ព្រហ្ម​ទណ្ឌ»។

នៅ​ក្នុង​សេចក្តី​ណែនាំ​ថ្មី​មួយ ចុះ​ថ្ងៃ​ទី​២៥ ខែ​តុលា ឆ្នាំ​២០២១ ធ្វើ​ឡើង​ក្រោយ​ក្រសួងបាន​បិទ​បញ្ចប់​យុទ្ធនា​ការ​ដោះ​ស្រាយ​ការ​កក​ស្ទះ​សំណុំ​រឿង​នៅ​តុលា​ការ កាល​ពី​កន្លង​ទៅ ក្រសួង​យុត្តិធម៌​បាន​លើក​ឡើង​ថា​ តុលាការ​គប្បី​យក​ចិត្ត​ទុក​ដាក់​ក្នុង​ការ​ពន្លឿន​ការ​បើក​សវនាការ និង​ចេញ​សាលក្រម​ឲ្យ​បាន​ឆាប់​រហ័ស ប្រកប​ដោយ​ស្មារតី​ទទួល​ខុស​ត្រូវ​ចំពោះ​មុខ​ច្បាប់ និង​ស្រប​តាម​ស្មារតី​នៃ​ក្រម​នីតិវិធី​ព្រហ្ម​ទណ្ឌ។ សេចក្តី​ណែនាំ​ឲ្យ​ដឹង​ទៀត​ថា​ តុលា​ការ​ត្រូវ​បាន​លើក​ទឹក​ចិត្ត​ឲ្យ​ប្រើ​ប្រាស់​របប​នៃការ​ព្យួរ​ទោស ជា​ពិសេស​ការ​ព្យួរ​ទោស​សាក​ល្បង​ឲ្យ​អស់​លទ្ធភាព និង​ឲ្យ​បាន​ទូលំ​ទូលាយ ផ្នែក​តាម​អង្គ​ហេតុ​ជាក់​ស្តែង​នៃ​សំណុំ​រឿង​នីមួយៗ។

ចៅ​ក្រម​ស៊ើប​សួរ​គប្បី​យក​ចិត្ត​ទុក​ដាក់​ក្នុង​ការ​ពន្លឿន​ការ​អនុវត្ត​នីតិវិធី​ស៊ើប​សួរ​របស់​ខ្លួន​ឲ្យ​បាន​ឆាប់​រហ័ស ប្រកប​ដោយ​ស្មារតី​ទទួល​ខុសត្រូវ​ចំពោះ​មុខ​ច្បាប់ និង​ស្រប​តាម​ស្មារតី​នៃ​ក្រម​នីតិវិធី​ព្រហ្មទណ្ឌ។ នេះ ​បើ​តាម​សេចក្តី​ណែនាំ។

ក្រសួង​យុត្តិធម៌​បន្ថែម​ថា​ ក្រសួងបាន​ពិនិត្យ​ឃើញ​ថា ​អយ្យការ​អម​សាលា​ដំបូង​រាជធានី​ខេត្ត​ពុំ​សូវ​បាន​ប្រើ​វិធី​ចោទ​ប្រកាន់​ តាម​រយៈ​ការ​បញ្ជូន​ទៅ​ជំនុំ​ជម្រះ​ផ្ទាល់ ឬ​ការ​បង្ហាញ​ខ្លួន​ភ្លាមៗ​នោះ​ទេ។ ដូច្នេះ​ការ​តែង​ប្រើ​វិធី​ចោទ​ប្រកាន់​ចំពោះ​បទ​មជ្ឈិម​តាម​រយៈ​ការ​បើក​ការ​ស៊ើ​បសួរ​ ជា​បច្ច័យ​នាំ​ឲ្យ​មាន​ការ​កើន​ឡើង​ជា​ច្រើន​នូវ​សំណុំ​រឿង​នៅ​ក្នុង​ដំណាក់​កាល​ស៊ើប​សួរ។

ក្រសួង​យុត្តិធម៌​បន្ថែម​ថា​ វិធាន​ការ​នៃ​ការ​ដាក់​ឲ្យ​ស្ថិត​នៅ​ក្រោម​ការ​ត្រួត​ពិនិត្យ​តាម​ផ្លូវ​តុលាការ​ពុំ​សូវ​ត្រូវ​បាន​ប្រើ​ឲ្យ​បាន​ទូលំទូលាយ​ឡើយ។

ក្រសួង​លើក​ទឹក​ចិត្ត​ឲ្យ​ចៅក្រម​ស៊ើប​សួរ​ «ប្រើ​ឲ្យ​អស់​លទ្ធភាព​និង​ឲ្យ​បាន​ទូលំទូលាយ» ដោយ​ផ្អែក​លើ​អង្គ​ហេតុ​ជាក់​ស្តែង​នៃ​សំណុំ​រឿង​នីមួយៗ ក្នុង​ការ​សម្រេច​ជ្រើស​យក​ការ​ដាក់​ឲ្យ​ស្ថិត​នៅ​ក្រោម​ការ​ត្រួត​ពិនិត្យតាម​ផ្លូវ​តុលាការ។

ក្រសួង​បញ្ជាក់​ថា៖ «ការឃុំ​ខ្លួន​បណ្តោះ​អាសន្ន គប្បី​ត្រូវ​បាន​ប្រើ​សម្រាប់​តែ​ចំពោះ​បទ​ឧក្រិដ្ឋ ឬ​បទ​មជ្ឈិម​ដែល​មាន​ភាព​ស្មុគ​ស្មាញ និង​ធ្ងន់​ធ្ងរ​ ហើយ​ក្នុង​លក្ខខណ្ឌ​ដែល​មាន​ចែង​ក្នុង​ក្រម​នីតិវិធី​ព្រហ្ម​ទណ្ឌ ជា​ពិសេសក្នុង​ករណី​ដែល​ការ​ឃុំ​ខ្លួន​បណ្តោះ​អាសន្ន​នោះ គឺ​ជា​មធ្យោបាយ​តែ​មួយ​គត់​និង​ចាំបាច់ ដើម្បី​ធានា​ដល់​ដំណើរ​ការ​ស៊ើបសួរ​តែ​ប៉ុណ្ណោះ»។

កាល​ពី​ខែ​មិថុនា ឆ្នាំ​២០២១ ក្រសួង​យុត្តិធម៌ ​បានបិទ​បញ្ចប់​យុទ្ធនា​ការ​ដោះ​ស្រាយ​សំណុំ​កក​ស្ទះ​ ក្រោយ​ចំណាយ​ពេល​ប្រមាណ​១ឆ្នាំ ដើម្បី​បំបែក​សំណុំ​រឿង​ព្រហ្មទណ្ឌ​ទូទៅ បាន​ជាង​៩០%​នៃ​សំណុំ​រឿង​កក​ស្ទះ​ទាំង​អស់​ជិត​៤​ម៉ឺន​សំណុំ​រឿង។

ក្នុង​សេចក្តី​ប្រកាស​មួយ​ចុះ​ថ្ងៃទី​២៩​ ខែ​មិថុនា ឆ្នាំ​២០២១ ក្រសួង​បាន​បង្ហាញ​ថា ​តាម​រយៈ​យុទ្ធនា​ការ​ដែល​បាន​ដំណើរការ​តាំង​ពី​ថ្ងៃ​ទី​១៨ ​ខែ​ឧសភា ​ឆ្នាំ​២០២០ ដល់​ថ្ងៃទី​១៧ ខែ​មិថុនា ឆ្នាំ​២០២១​ សាលា​ដំបូង​រាជធានី​ខេត្ត​ទូទាំង​ប្រទេស​បាន​ដោះ​ស្រាយ​សំណុំ​រឿង​ព្រហ្មទណ្ឌ​ដែល​កកស្ទះ​ទាំង​ដំណាក់​កាល​អយ្យការ​ ទាំង​ដំណាក់​កាល​ស៊ើប​សួរ​ និង​ទាំង​ដំណាក់​កាល​ជំនុំ​ជម្រះ ​មាន​ចំនួន​សរុប​ជាង​៣៧.៩០០​សំណុំ​រឿង ស្មើ​នឹង​៩៦​%នៃ​សំណុំ​រឿង​ព្រហ្មទណ្ឌ​ដែល​កកស្ទះ​សរុប​ជាង ​៣៩.៥០០​សំណុំ​រឿង។

លោក អំ សំអាត នាយក​រង​ទទួល​បន្ទុក​ផ្នែកឃ្លាំ​មើល​សិទ្ធិមនុស្ស​នៃ​អង្គការ​លីកាដូ បាន​ប្រាប់​វីអូអេ​ថា​ ការ​ក្រើន​រំឭក​ជា​រឿង​ល្អ​មួយ ប៉ុន្តែលោក​ជំរុញ​ឲ្យ​មន្រ្តី​តុលាការ​មាន​«ឆន្ទៈ​»ក្នុង​ការ​អនុវត្ត​នីតិវិធី ដើម្បី​ដោះ​ស្រាយ​សំណុំ​រឿង​កក​ស្ទះ។ លោក​ជំរុញ​ឲ្យ​មាន«​ស្មារតី​ភ្ញាក់​រឭកជា​ឆន្ទៈ» ជា​ការ​អនុវត្ត​តួនាទី និង​កាតព្វ​កិច្ច​របស់​ខ្លួន​ជា​ប្រចាំ។

លោក​បន្ថែម​ថា​ សេចក្តី​ណែនាំ​របស់​ក្រសួង​យុត្តិធម៌មិន​មែន​ជា​ការ​បំពាន​កិច្ច​ការ​របស់​តុលាការ​ទេ ព្រោះ​តុលាការ​មាន​ឆន្ទា​នុសិទ្ធិ​ក្នុង​ការ​សម្រេច ហើយ​នេះ​ជា​បែប​បទ​រដ្ឋបាល និង​ជា​ការ​ដាស់​តឿន​ដល់​ចៅ​ក្រម​ព្រះ​រាជ​អាជ្ញា​សម្រាប់​ពន្លឿន​នីតិវិធី​តែ​ប៉ុណ្ណោះ។

លោក​បញ្ជាក់​ថា៖ «អ្វីដែល​ខ្ញុំ​នៅ​តែ​បារម្ភ​ហ្នឹង ខ្ញុំ​បារម្ភ​ថា​អា​ការ​ពន្លឿន​នីតិវិធី​នេះ អាច​ធ្វើ​បាន​លឿន តែ​ក្នុង​យុទ្ធនាការ​ក្រសួង​យុត្តិធម៌។ តែ​ក្រោយ​ពី​ក្រសួង​យុត្តិធម៌​បញ្ចប់​យុទ្ធនាការ​ទៅ បញ្ហា​នីតិវិធី​នេះ ត្រូវ​បាន​អូស​បន្លាយ ដូច​មុន​ពេល​ក្រសួង​យុត្តិធម៌​បើក​យុទ្ធនាការ»។

គួរបញ្ជាក់​ថា ​ក្នុង​យុទ្ធនាការ​ដោះ​ស្រាយ​សំណុំ​រឿង​កក​ស្ទះ​នេះ ​ក្រសួង​យុត្តិធម៌​បាន​កោត​សរសើរ​ចំពោះ​ការ​ចូលរួម​របស់​មន្រ្តី​តុលាការ​ទាំង​អស់ ​ហើយ​ធានា​បាន​នូវ​ការ​អនុវត្ត​យ៉ាង​ត្រឹមត្រូវ​នូវ​អភិក្រម​ការងារ​ គឺ«លឿន ត្រឹម​ត្រូវ ​យុត្តិធម៌​ និង​មិន​ពុក​រលួយ»។ ក្រសួង​យុត្តិធម៌​បញ្ជាក់​ថា​ យុទ្ធនា​ការ​រយៈ​ពេល​ប្រមាណ​១ឆ្នាំ​នេះ ក៏​បាន​ជួយ​កាត់​បន្ថយ​ភាព​ចង្អៀត​ណែន​ក្នុង​ពន្ធនាគារ​ នូវ​បុគ្គល​សរុប​ចំនួន​៣៩.៣០១នាក់​ ដែល​ក្នុង​នោះ​មាន​ការ​ដោះ​លែង​ពី​ពន្ធនាគារ ការ​សម្រេច​មិន​ឃុំ​ខ្លួន​ និង​ការ​សម្រេច​បញ្ជូន​ទៅ​មណ្ឌល​បន្សាប​គ្រឿង​ញៀន ជំនួស​ឲ្យ​ការ​ចោទ​ប្រកាន់​ជាដើម៕

XS
SM
MD
LG