គណៈវិនិច្ឆ័យនៃតុលាការសហព័ន្ធមួយក្នុងរដ្ឋ Illinois បានចេញសាលក្រមមួយ ដែលបង្គាប់ឲ្យផ្តល់ជំងឺចិត្តជាទឹកប្រាក់ចំនួន១៧លាន៧សែនដុល្លារអាមេរិក ទៅឱ្យក្រុមហ៊ុនផលិតម្ហូបអាហារធំៗមួយចំនួនក្នុងសហរដ្ឋអាមេរិក ដែលបានដាក់ពាក្យប្តឹងប្រឆាំងនឹងក្រុមហ៊ុនផលិតស៊ុត ជុំវិញការរួមគំនិតគ្នាក្នុងការដាក់កម្រិតការផ្គត់ផ្គង់ស៊ុតក្នុងសហរដ្ឋអាមេរិកកាលពីច្រើនឆ្នាំកន្លងទៅ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន AP។
ចំនួនទឹកប្រាក់ជាសំណងជំងឺចិត្តនេះកើនឡើង៣ដងក្រោមច្បាប់សហព័ន្ធ ដែលមានចំនួនសរុបជាង៥៣លានដុល្លារអាមេរិក។ សេចក្តីសម្រេចរបស់តុលាការនេះ ត្រូវបានប្រកាសនៅថ្ងៃទី១ ខែធ្នូកន្លងទៅ នៅក្នុងសំណុំរឿងប្តឹងផ្តល់ដែលអូសបន្លាយពេលជាយូរមកហើយ ប្រឆាំងទៅនឹងក្រុមហ៊ុនផ្គត់ផ្គង់ស៊ុតដែលត្រូវបានដាក់ប្តឹងទៅតុលាការសហព័ន្ធកាលពីឆ្នាំ២០១១។
ក្រុមហ៊ុនផលិតអាហារធំៗមួយចំនួនដូចជាក្រុមហ៊ុន Kraft Foods Global, Incនិងក្រុមហ៊ុន The Kellogg Company ជាដើម បានលើកហេតុផលថា ក្រុមហ៊ុនផ្គត់ផ្គង់ស៊ុត បានកម្រិតការផ្គត់ផ្គង់ចែកចាយស៊ុតនៅទីផ្សារក្នុងស្រុកអាមេរិក តាមរយៈមធ្យោបាយជាច្រើន ដើម្បីបង្កើនតម្លៃរបស់វា។
ក្រុមហ៊ុនផ្គត់ផ្គង់ស៊ុតចំនួន២ បានបង្ហើបថា ពួកគេនឹងប្តឹងទាស់លើសាលក្រមនេះ។
ពេលវេលានៃការឃុបឃិតគ្នាជាបញ្ហាមួយក្នុងក្តីក្តាំនេះ ប៉ុន្តែចុងក្រោយគណៈវិនិច្ឆ័យបានសម្រេចកំណត់សំណងខូចខាត ដែលកើតឡើងរវាងពីឆ្នាំ២០០៤ដល់ឆ្នាំ២០០៨។
សាលក្រមបង្គាប់ឲ្យបង់សំណងជំងឺចិត្តនេះ ត្រូវបានសម្រេចនៅថ្ងៃទី១ ខែធ្នូ នៅតុលាការសាលាដំបូងថ្នាក់សហព័ន្ធប៉ែកខាងជើងរដ្ឋ Illinois។
ឯកសារតុលាការបង្ហាញថា ចុងចម្លើយបានបដិសេធការអះអាងទាំងនោះ។
ក្រុមហ៊ុនផ្គត់ផ្គង់ស៊ុតរួមមានក្រុមហ៊ុនជាលក្ខណៈគ្រួសារនៃអតីតប្រធានលោក John Rust ដែលពេលនេះកំពុងឈរឈ្មោះជាបេក្ខជនសមាជិកព្រឹទ្ធសភាអាមេរិកតំណាងឱ្យរដ្ឋ Indiana។ នៅក្នុងសេចក្តីថ្លែងការណ៍ជាលាយលក្ខណ៍អក្សរស្តីពីសាលក្រមនោះ លោក Rust និយាយថា សេចក្តីសម្រេចរបស់គណៈវិនិច្ឆ័យនេះ «នឹងត្រូវប្តឹងទាស់»។
គណៈវិនិច្ឆ័យរកឃើញថាក្រុមហ៊ុនផ្គត់ផ្គង់ស៊ុត បាននាំចេញស៊ុតទៅក្រៅប្រទេស ដើម្បីកាត់បន្ថយការផ្គត់ផ្គង់ទូទៅក្នុងទីផ្សារអាមេរិក ក៏ដូចជាកំណត់ចំនួនមាន់តាមមធ្យោបាយផ្សេងៗ ដូចជាទំហំទ្រង់មាន់ ការសម្លាប់មាន់មុនពេលកំណត់ និងកាត់បន្ថយការរស់នៅជាហ្វូងនៃសត្វមាន់ជាដើម។ នេះបើយោងទៅលើឯកសាររបស់តុលាការ៕
ប្រែសម្រួលដោយ លោក ជ្រា វណ្ណារិទ្ធ
