នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយកាលពីថ្ងៃសុក្រថា ក្រុមហាម៉ាស់នឹង«ត្រូវសង»ចំពោះការខកខានមិនបានប្រគល់សាកសពរបស់ចំណាប់ខ្មាំងអ្នកស្រី Shiri Babas ឱ្យស្របតាមកិច្ចព្រមព្រៀងសន្តិភាពដែលខ្លួនបានធ្វើជាមួយអ៊ីស្រាអែល។
នៅក្នុងសារជាវីដេអូលោក Netanyahu ថ្លែងថា៖ «យើងនឹងចាត់វិធានការដោយការប្តេជ្ញាចិត្តដើម្បីយកអ្នកស្រី Shiri មកមាតុភូមិវិញ ព្រមជាមួយនឹងចំណាប់ខ្មាំងផ្សេងទៀត ទាំងអ្នកនៅរស់និងអ្នកបានស្លាប់ ហើយនឹងធានាថាក្រុមហាម៉ាស់នឹងសងឱ្យពេញថ្លៃចំពោះអំពើឃោរឃៅនិងការរំលោភដ៏អាក្រក់ចំពោះកិច្ចព្រមព្រៀងនេះ»។
ក្រុមហាម៉ាស់បាននិយាយកាលពីថ្ងៃសុក្រថា សាកសពរបស់អ្នកស្រី Shiri Babas ទំនងត្រូវបានគេច្រឡំលាយឡំជាមួយសាកសពដទៃទៀតនៅក្នុងគំនរបែកបាក់ក្រោយពីអគារដែលអ្នកស្រីត្រូវបានគេឃុំនោះបានរងការវាយប្រហារតាមអាកាសពីអ៊ីស្រាអែល។ នេះបើតាមការរាយការណ៍របស់ទីភ្នាក់ងារសារព័ត៌មាន Reuters។
សាកសពរបស់ចំណាប់ខ្មាំងអ៊ីស្រាអែលបីនាក់និងសាកសពទី៤របស់ស្ត្រីម្នាក់ដែលគេមិនដឹងអត្តសញ្ញាណ ត្រូវបានក្រុមហាម៉ាស់ប្រគល់ឱ្យអ៊ីស្រាអែលកាលពីថ្ងៃព្រហស្បតិ៍ ដែលជាការប្រគល់ចុងក្រោយបំផុតក្រោយបទឈប់បាញ់រវាងភាគីទាំងពីរ។
សពដែលត្រូវបានដោះលែងទាំងនោះរួមមានសពរបស់ចំណាប់ខ្មាំងវ័យក្មេងបំផុតគឺទារក Kfir Bibas អាយុ៩ខែនៅពេលចាប់ពង្រត់ និងបងប្រុសរបស់ទារកនោះឈ្មោះ Ariel Bibas មានអាយុ ៤ ឆ្នាំ។
ប៉ុន្តែសពរបស់ម្តាយគឺអ្នកស្រី Shiri Bibas ដែលគ្រោងថានឹងត្រូវប្រគល់នោះ យោធាអ៊ីស្រាអែលនៅថ្ងៃសុក្រនេះថាមិនមែនជាសាកសពរបស់អ្នកស្រីទៅវិញ ដោយគេនៅមិនទាន់ដឹងពីអត្តសញ្ញាណសពនោះនៅឡើយ៕
ព័ត៌មានមួយចំនួននៅក្នុងសេចក្ដីរាយការណ៍នេះត្រូវបានដកស្រង់ពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
វេទិកាបញ្ចេញមតិ