ដោយពួកអាជ្ញាធរតួកគីបានចាប់ខ្លួននិងឃុំខ្លួនមនុស្សរាប់ពាន់នាក់បន្ទាប់ពីរដ្ឋប្រហារមិនបានទទួលជោគជ័យនៅចុងសប្តាហ៍កន្លងមកនេះ សហរដ្ឋអាមេរិកនិងសហភាពអឺរ៉ុប កំពុងជំរុញឲ្យប្រធានាធិបតី Recep Tayyip Erdogan នៃប្រទេសតួកគីគោរពលទ្ធិប្រជាធិបតេយ្យនិងនីតិរដ្ឋ។
សារពីរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងប៊្រុចសែល មានភាពច្បាស់លាស់ដែលបានគាំទ្ររដ្ឋាភិបាលជាប់ឆ្នោតរបស់តួកគីបន្ទាប់ពីរដ្ឋប្រហារមិនបានទទួលជោគជ័យ។ រដ្ឋាភិបាលទាំង២ ក៏បានប្រយ័ត្នប្រយែងលើវិធានការបន្ទាប់ទៀតរបស់តួកគីដែរ។
លោក John Kerry រដ្ឋមន្រ្តីការបរទេសសហរដ្ឋអាមេរិក បានធ្វើការព្រមានកាលពីថ្ងៃចន្ទបន្ទាប់ពីមានជំនួបជាមួយសមភាគីអឺរ៉ុបរបស់លោកនៅក្នុងរាជធានីនៃប្រទេសបែលហ្ស៊ិក។
«យើងនឹងគាំទ្រការនាំជនដៃដល់ធ្វើរដ្ឋប្រហារឡើងតុលាការ ក៏ប៉ុន្តែ យើងក៏នឹងព្រមានប្រឆាំងការចាប់ខ្លួនហួសពីជនដៃដល់ធ្វើរដ្ឋប្រហារនោះដែរ។ ហើយយើង ផ្តោតលើសារៈសំខាន់នៃការពង្រឹងការគ្រប់គ្រងតាមបែបលទ្ធិប្រជាធិបតេយ្យ»។ លោកស្រី Federica Mogherini ប្រធានគោលនយោបាយការបរទេសរបស់សហភាពអឺរ៉ុប ក៏បានព្រមានប្រឆាំងនឹងសេចក្តីរាយការណ៍ដែលថា រដ្ឋាភិបាលតួកគីកំពុងពិចារណាដាក់ឲ្យប្រើប្រាស់ឡើងវិញនូវទោសប្រហារជីវិត។ លោកស្រីមានប្រសាសន៍បន្តទៀតថា តួកគីមិនមែនត្រឹមតែជាហត្ថលេខីនៃអនុសញ្ញាសិទ្ធិមនុស្សរបស់អឺរ៉ុបដែលហាមឃាត់ទោសប្រហារជីវិតប៉ុណ្ណោះទេ ក៏ប៉ុន្តែ វិធានការបែបនេះអាចបញ្ចប់សេចក្តីសង្ឃឹមដើម្បីក្លាយជាសមាជិករបស់សហភាពអឺរ៉ុបរបស់ខ្លួនទៀតផង។
«គ្មានប្រទេសណាមួយអាចក្លាយជាសមាជិករបស់សហភាពអឺរ៉ុបបានទេ បើខ្លួនដាក់ឲ្យប្រើទោសប្រហារជីវិតនោះ។ ការណ៍នេះបានបញ្ជាក់យ៉ាងច្បាស់នៅក្នុងគោលបំណងរបស់យើង»។
ការចរចារនៅក្នុងទីក្រុងប៊្រុចសែល រវាងលោក John Kerry រដ្ឋមន្រ្តីការបរទេសសហរដ្ឋអាមេរិក និងពួកមន្រ្តីសហភាពអឺរ៉ុប ក៏បានផ្តោតលើការព្រួយកង្វល់ខាងផ្នែកសន្តិសុខនិងការការពារប្រទេសបន្ទាប់ពីមានការវាយប្រហារភេរវកម្មនៅក្នុងទីក្រុង Niceនៃប្រទេសបារាំងផងដែរ។
រដ្ឋាភិបាលក្រុងវ៉ាស៊ីនតោន ធ្វើជាម្ចាស់ផ្ទះរៀបចំជំនួបសំខាន់មួយនៅសប្តាហ៍នេះស្តីពីផែនការរបស់ក្រុមចម្រុះដើម្បីប្រយុទ្ធប្រឆាំងនឹងក្រុមរដ្ឋអ៊ីស្លាមដែលបានអះអាងទទួលខុសត្រូវចំពោះការវាយប្រហារនៅក្នុងទីក្រុង Nice៕
ប្រែសម្រួលដោយ ជឹង ប៉ូជីន
