កាលពីថ្ងៃអង្គារ អាជ្ញាធរនៃប្រទេសតួកគីបានបង្កើនការបង្ក្រាបរបស់ខ្លួនលើពួកគ្រូបង្រៀន និងពួកអ្នករដ្ឋការដែលជាប់សង្ស័យថា មានទាក់ទិននឹងការធ្វើរដ្ឋប្រហារបរាជ័យកាលពីសប្តាហ៍មុន ដោយបានបណ្តេញមនុស្សជាង ២៤០០០ នាក់ចេញពីការងារ នៅពេលដែលបញ្ជូនសំណុំឯកសារទៅកាន់រដ្ឋធានីវ៉ាស៊ីនតោន ដោយបានចោទប្រកាន់បព្វជិតឥស្លាមម្នាក់ដែលរស់និរទេសខ្លួនក្នុងស.រ.អា.ថា ឋិតនៅពីក្រោយការធ្វើរដ្ឋប្រហារនោះ។
បណ្តាញផ្សាយព័ត៌មាននៃប្រទេសតួកគីបានរាយការណ៍ថា ក្រសួងអប់រំបានបណ្តេញចេញពីតំណែងនូវគ្រូបង្រៀន ១៥២០០ នាក់នៅទូទាំងប្រទេស ចំណែកឯក្រសួងមហាផ្ទៃវិញបានដកអ្នកធ្វើការជិត ៩០០០ នាក់ចេញពីតំណែង។ អ្នករដ្ឋការ២៥៧ នាក់នៅក្នុងការិយាល័យនាយករដ្ឋមន្ត្រី និង ៤៩២ នាក់ទៀតនៅក្នុងនាយកដ្ឋានកិច្ចការសាសនាបានត្រូវដកចេញពីតំណែងដែរ។ ក្រុមប្រឹក្សាឧត្តមសិក្សារបស់ប្រទេសតួកគី ក៏ទាមទារឱ្យមានការលាលែងចេញពីតំណែងនូវព្រឹទ្ធបុរសសាកលវិទ្យាល័យ ១៥៧៧ នាក់។
ការបណ្តេញចេញពីតំណែងនៃអ្នករដ្ឋការទាំងនេះគឺបន្ថែមលើមនុស្សប្រមាណ៩០០០នាក់ដែលរដ្ឋាភិបាលក្រុងអង់ការ៉ា បានឃុំឃាំងដោយសង្ស័យថាមានការទាក់ទិនជាមួយការប៉ុនប៉ងទម្លាក់រដ្ឋាភិបាលរបស់ប្រធានាធិបតី Recep Tayyip Erdogan ពីអំណាច។
លោកនាយករដ្ឋមន្ត្រី Binali Yildirim បាននិយាយថា ប្រទេសតួកគី បានបញ្ជូនសំណុំឯកសារបួនទៅកាន់ស.រ.អា.អំពីលោក Fethullah Gulen បព្វជិតឥស្លាម ដែលរស់និរទេសខ្លួនក្នុងប្រទេសអាមេរិកចាប់តាំងពីឆ្នាំ១៩៩៩ មក។
អាជ្ញាធរតួកគីបានអះអាងថា លោក Gulen ដែលមានអាយុ៧៥ឆ្នាំបានរៀបចំការប៉ុនប៉ងធ្វើរដ្ឋប្រហារនៅចម្ងាយ ៨០០០គ.ម. ពីប្រទេសតួកគី ដោយចេញបញ្ជាពីផ្ទះលោកមានកំផែងព័ទ្ធជុំវិញនៅក្នុងតំបន់ភ្នំ Poconos នារដ្ឋ Pennsylvania។ទោះយ៉ាងណា លោកបានបដិសេធការចោទប្រកាន់ទាំងនេះ។
ប្រទេសតួកគី មិនបានផ្តល់សេចក្តីលម្អិតអំពីអ្វីដែលមានចែងនៅក្នុងសំណុំឯកសារទាំងនេះទេ ក៏ប៉ុន្តែ លោក Yildirim បានសុំដល់រដ្ឋាភិបាលក្រុងវ៉ាស៊ីនតោន កុំឱ្យផ្តល់ទីជ្រកកោនដល់ភេរវជនរូបនេះតទៅទៀត។ លោកថ្លែងថា លោក Gulen គ្មានផលប្រយោជន៍អ្វីដល់មនុស្សជាតិទេ គាត់គ្មានផលប្រយោជន៍អ្វីដល់សាសនាឥស្លាមទេ។ ក៏ប៉ន្តែប្រទេសតួកគី មិនទាន់បានស្នើសុំជាផ្លូវការឱ្យធ្វើបត្យាប័នលោក Gulen នៅឡើយ។
លោករដ្ឋមន្ត្រីការបរទេសស.រ.អា. John Kerry បានមានប្រសាសន៍កាលពីថ្ងៃចន្ទថា ស.រ.អា.នឹងពិចារណាអំពីបត្យាប័នលោក Gulen ក៏ប៉ុន្តែទាល់តែរដ្ឋាភិបាលក្រុងអង់ការ៉ា បញ្ជូន «ភ័ស្តុតាងគ្រប់គ្រាន់ ហើយមិនមែនត្រឹមតែការចោទប្រកាន់ទេ»៕
