យន្តហោះដឹកអ្នកដំណើរមួយគ្រឿងរបស់ជប៉ុនបានឆេះនៅយប់ថ្ងៃអង្គារនេះនៅពេលដែលវាកំពុងបើកលើផ្លូវរត់ក្នុងអាកាសយានដ្ឋាន Haneda ក្នុងទីក្រុងតូក្យូនៃប្រទេសជប៉ុន។
ប្រព័ន្ធផ្សព្វផ្សាយព័ត៌មាននានាបានរាយការណ៍ថា អ្នកដំណើរទាំងអស់និងក្រុមអាកាសយានិកត្រូវបានជម្លៀសចេញពីយន្តហោះដែលឆេះនោះ។
រូបភាពតាមទូរទស្សន៍បានបង្ហាញថា អណ្តាតភ្លើងបានឆាបឆេះចេញពីបង្អួចនិងតួយន្តហោះនៃយន្តហោះរបស់ក្រុមហ៊ុន Japan Airlines ខណៈដែលក្រុមពន្លត់អគ្គិភ័យកំពុងពន្លត់អគ្គិភ័យនោះ។
ប្រព័ន្ធផ្សព្វផ្សាយព័ត៌មានរបស់ជប៉ុនបានរាយការណ៍ថា យន្តហោះនេះបានចុះចតនៅឯអាកាសយានដ្ឋាន Haneda បន្ទាប់ពីបានហោះចេញពីអាកាសយានដ្ឋាន Shin-Chitose នៅកោះ Hokkaido ដែលស្ថិតនៅចម្ងាយជាង ១.២០០ គីឡូម៉ែត្រភាគខាងជើងទីក្រុងតូក្យូ ដោយមានអ្នកដំណើរនិងក្រុមអាកាសយានិកសរុបចំនួន ៣៧៩ នាក់។
ទូរទស្សន៍ NHK របស់ជប៉ុនបានរាយការណ៍ថា យន្តហោះនេះប្រហែលជាបានបុកជាមួយយន្តហោះរបស់ឆ្មាំល្បាតសមុទ្រជប៉ុនមួយគ្រឿង និងថាមនុស្ស ៥ នាក់ក្នុងចំណោម ៦ នាក់ដែលជិះនៅលើយន្តហោះឆ្មាំល្បាតសមុទ្រជប៉ុននោះបានស្លាប់៕
