អ្នកគោរពសាសនាជ្វីសចំនួន ៤នាក់បានស្លាប់ និងប្រាំមួយនាក់ទៀតរងរបួសក្រោយការវាយប្រហារចូលក្នុងអគារសាសនា Synagogue នៅក្នុងទីក្រុងយេរូសាឡឹម(Jerusalem) កាលពីថ្ងៃអង្គារម្សិលមិញ។ នេះបើតាមការឲ្យដឹងរបស់មន្ត្រីប៉ូលិសអ៊ីស្រាអែល។
អ្នកស្រី Luba Samri អ្នកនាំពាក្យរបស់ប៉ូលិសអ៊ីស្រាអែលនិយាយថា ជនជាតិប៉ាឡេស្ទីនពីរនាក់ ២ នាក់បានប្រើប្រាស់កាំភ្លើងនិងពូថៅដើម្បីវាយប្រហារលើក្រុមអ្នកសូត្រធម៌ដែលភាគច្រើនជាជនជាតិជ្វីស។ អ្នកស្រីហៅជនជាប់សង្ស័យទាំងនោះថាជាភេរវជន ហើយថាពួកប៉ូលិសបានបាញ់សម្លាប់ជនទាំងនេះហើយ។
លោកនាយករដ្ឋមន្ត្រីអ៊ីស្រាអែល Benjamin Netanyahu បានបន្ទោសអ្វីដែលលោកបានហៅថាជាការញុះញង់ដោយពួកជនសកម្មប្រយុទ្ធហាម៉ាស់(Hamas)។
លោកនិយាយថាសហគមន៍អន្តរជាតិបានធ្វើមិនដឹងមិនឮពីបញ្ហានេះ។ លោក Netanyahu ក៏បានសន្យាថានឹងតបតនឹងការវាយប្រហារនេះវិញដែរ។
ដោយឡែកប្រធានាធិបតីប៉ាឡេស្ទីនលោក Mahmoud Abbas បានចេញផ្សាយសេចក្ដីថ្លែងការណ៍មួយភ្លាមៗផងដែរកាលពីម្សិលមិញ។ លោកបានថ្កោលទោសការវាយប្រហារទាំងនេះនិងការវាយប្រហារឯទៀតៗប្រឆាំងនឹងជនស៊ីវិល ទោះជានរណាជាអ្នកទទួលខុសត្រូវក៏ដោយ។
លោករដ្ឋមន្ត្រីការបរទេសស.រ.អ. John Kerry បានមានប្រសាសន៍ជាមួយលោក Netanyahu តាមទូរស័ព្ទដើម្បីចូលរួមរំលែកមរណទុក្ខ។ លោក Kerry ថ្លែងប្រាប់ក្រុមអ្នកកាសែតនៅក្នុងទីក្រុង Londres ថាការវាយប្រហារនេះជាសកម្មភាពភេរវកម្មមួយ។
ការវាយប្រហារនេះជាឧប្បត្តិហេតុថ្មីបំផុតនៅក្នុងកំណើននៃអំពើហិង្សាក្នុងក្រុងJerusaem និងតំបន់ត្រើយខាងលិចនៃទន្លេ Jordan កាលពីខែមុន៕
