មេដឹកនាំកំពូលនៃប្រទេសកូរ៉េខាងត្បូង និងជប៉ុនបានសម្តែងក្តីសង្ឃឹមសម្រាប់ការធ្វើឱ្យប្រសើរឡើងនូវទំនាក់ទំនងទ្វេភាគីក្នុងអំឡុងកិច្ចប្រជុំខ្លីមួយកាលពីថ្ងៃអង្គារនៅក្រៅកិច្ចប្រជុំកំពូលអូតង់នៅទីក្រុងម៉ាឌ្រីដ ប្រទេសអេស្ប៉ាញ។
ការិយាល័យប្រធានាធិបតីកូរ៉េខាងត្បូងបានឱ្យដឹងថា លោកប្រធានាធិបតី Yoon Suk Yeol និងនាយករដ្ឋមន្ត្រីជប៉ុនលោក Fumio Kishida បានជួប គ្នាប្រហែល៣ទៅ៤នាទីអំឡុងអាហារពេលល្ងាចដែលរៀបចំដោយស្តេច Felipe VIរបស់ប្រទេសអេស្ប៉ាញ។
មន្ត្រីរដ្ឋាភិបាលក្រុងសេអ៊ូលបាននិយាយថា លោក Yoon បានប្រាប់លោក Kishida ថា លោកគ្រោងនឹង «ដោះស្រាយបញ្ហាដែលមិនទាន់សម្រេចរវាងកូរ៉េ និងជប៉ុនឱ្យបានឆាប់តាមដែលអាចធ្វើទៅបាន» ដើម្បីឱ្យប្រទេសទាំងពីរអាច «បោះជំហានទៅមុខដោយមានការតម្រង់ទិសត្រឹមត្រូវទៅអនាគត»។ លោក Kishida បាននិយាយថា លោកសង្ឃឹមថា ប្រធានាធិបតីកូរ៉េខាងត្បូងនឹងស្តារ«ទំនាក់ទំនងធ្ងន់ធ្ងរបំផុត»ទៅជា«ស្ថានភាពដែលមានសុខភាពល្អ»។ នេះបើតាមទីភ្នាក់ងារសារព័ត៌មាន Kyodo។
នេះគឺជាជំនួបទល់មុខគ្នាលើកដំបូងរវាងមេដឹកនាំកំពូលកូរ៉េខាងត្បូង និងជប៉ុន ចាប់តាំងពីខែធ្នូ ឆ្នាំ ២០១៩ មក។ ចាប់តាំងពីពេលនោះមក ទំនាក់ទំនងបានធ្លាក់ចុះដោយសារតែជម្លោះដ៏រ៉ាំរ៉ៃទាក់ទងនឹងការកាន់កាប់ដ៏ឃោរឃៅរបស់ជប៉ុនពីឆ្នាំ១៩១០ដល់ឆ្នាំ១៩៤៥ លើប្រទេសកូរ៉េ។ លោកYoon ដែលបានចូលកាន់តំណែងកាលពីខែមុន គឺជាអ្នកអភិរក្សនិយមដែលបានសន្យាកិច្ចសហប្រតិបត្តិការកាន់តែខ្លាំងជាមួយប្រទេសជប៉ុនលើបញ្ហាដូចជាកូរ៉េខាងជើង ដែលបានពន្លឿនអាវុធនុយក្លេអ៊ែរ។
លោក Yoon និងលោក Kishida ដែលបានសម្របប្រទេសរបស់ពួកគេក្នុងទិសដៅគាំទ្រលោកខាងលិចកាន់តែច្បាស់នោះ កំពុងចូលរួមកិច្ចប្រជុំរបស់អូតង់ក្នុងនាមជាអ្នកសង្កេតការណ៍។ នេះជាលើកទីមួយហើយដែលមេដឹកនាំកំពូលកូរ៉េខាងត្បូង និងជប៉ុនបានចូលរួមកិច្ចប្រជុំកំពូលរបស់អូតង់។ នៅថ្ងៃពុធនេះ លោកYoon និង លោក Kishida នឹងជួបជាមួយប្រធានាធិបតីអាមេរិកលោក Joe Biden សម្រាប់កិច្ចប្រជុំកំពូលត្រីភាគីនៅទីក្រុងម៉ាឌ្រីដ។ លោក Jake Sullivan ទីប្រឹក្សាសន្តិសុខជាតិសេតវិមានឱ្យដឹងថាកិច្ចប្រជុំនេះនឹងផ្តោតជាសំខាន់លើប្រទេសកូរ៉េខាងជើង។
កូរ៉េខាងត្បូង និងជប៉ុនគឺជាសម្ព័ន្ធមិត្តដ៏សំខាន់របស់សហរដ្ឋអាមេរិក ប៉ុន្តែជារឿយៗមានការសង្ស័យគ្នាទៅវិញទៅមក។ ជួនកាលផ្ទុះបញ្ហាអំពីជម្លោះក្នុងប្រវត្តិសាស្ត្ររបស់ប្រទេសដែលបង្កឱ្យមានបញ្ហាដ៏ធំចំពោះកិច្ចសហប្រតិបត្តិការត្រីភាគីលើបញ្ហាដូចជាកូរ៉េខាងជើង ឬប្រទេសចិន។ ភាពតានតឹងចុងក្រោយបង្អស់ត្រូវបានបញ្ឆេះឡើង មួយផ្នែកដោយសេចក្តីសម្រេចរបស់តុលាការកូរ៉េខាងត្បូងនាពេលថ្មីៗនេះដែលបញ្ជាឱ្យក្រុមហ៊ុនជប៉ុនផ្តល់សំណងដល់ប្រជាជនកូរ៉េដែលត្រូវបានបង្ខំឱ្យធ្វើការក្នុងអំឡុងពេលអាណានិគមរបស់ជប៉ុនកាន់កាប់កូរ៉េ។
ប្រទេសជប៉ុនបាននិយាយថា បញ្ហាសំណងត្រូវបានដោះស្រាយជាមួយនឹងសន្ធិសញ្ញាឆ្នាំ១៩៦៥ ដែលបានធ្វើឱ្យទំនាក់ទំនងជប៉ុន-កូរ៉េខាងត្បូងមានលក្ខណៈធម្មតាវិញ៕
