ជនជាតិជប៉ុនដែលកំពុងសោកសៅបានគោរពវិញ្ញាណក្ខន្ធអតីតនាយករដ្ឋមន្ត្រីលោកShinzo Abe នៅថ្ងៃអង្គារនេះ។ រៀងរាល់ថ្ងៃប្រជាជនជាច្រើននាក់បានតម្រង់ជួរនៅខាងក្រៅព្រះវិហារ Zojoji ក្នុងទីក្រុងតូក្យូដើម្បីដាក់ផ្កា និងនិមិត្តសញ្ញាផ្សេងទៀតដើម្បីគោរពវិញ្ញាណក្ខន្ធលោក Abe ដែលត្រូវបានខ្មាន់កាំភ្លើងបាញ់សម្លាប់កាលពីថ្ងៃសុក្រសប្តាហ៍មុននៅក្នុងទីក្រុង Nara ភាគខាងលិច អំឡុងពេលយុទ្ធនាការ។ អ្នកកាន់ទុក្ខជាច្រើននាក់បានយំខណៈពួកគេឱនក្បាលគោរពវិញ្ញាណក្ខន្ធនៅមុខព្រះវិហារ។
ព្រះវិហារ Zojoji គឺជាកន្លែងប្រារព្ធពិធីសម្រាប់សពលោក Abeអាយុ៦៧ឆ្នាំ ហើយអនុញ្ញាតសម្រាប់តែមិត្តភក្តិជិតស្និទ្ធ និងក្រុមគ្រួសាររបស់លោកប៉ុណ្ណោះ។ បន្ទាប់មក មឈូសរបស់លោក Abe ត្រូវបានដង្ហែយ៉ាងវែងចេញពីព្រះវិហារឆ្លងកាត់ទីក្រុងតូក្យូទៅកាន់សាលពិធីបុណ្យសព Kirigaya សម្រាប់ការបូជាដោយមានអ្នកស្រុករាប់ពាន់នាក់តម្រង់ជួរតាមផ្លូវ និងលើកដៃលាលោកជាចុងក្រោយ។
ការដង្ហែនេះកំណត់ធ្វើឆ្លងកាត់កន្លែងសំខាន់ៗមួយចំនួនដូចជាការិយាល័យនាយករដ្ឋមន្ត្រី របស់លោក អគារសភា និងទីស្នាក់ការគណបក្សប្រជាធិបតេយ្យសេរីរបស់លោក។ ខ្មាន់កាំភ្លើង ឈ្មោះ Tetsuya Yamagami អាយុ ៤១ ឆ្នាំដែលធ្វើឃាតលោក Abe ត្រូវបានចាប់ខ្លួនភ្លាមៗបន្ទាប់ពីបានបាញ់អតីតនាយករដ្ឋមន្ត្រីហើយត្រូវបានបញ្ជូនទៅមន្ទីរឃុំឃាំង។
សារព័ត៌មានជប៉ុននិយាយថា លោក Yamagami អតីតសមាជិកនៃកងកម្លាំងស្វ័យការពាររបស់ប្រទេសនេះ ចង់សម្លាប់លោក Abe ដោយសារតែជឿថា លោក Abe រួមចំណែកក្នុងក្រុមសាសនាដែលគាត់បន្ទោសថា បានបំផ្លាញហិរញ្ញវត្ថុរបស់ម្តាយគាត់។ វិហារ Unification Church ដែលជាចលនាសាសនាសាកលបង្កើតឡើងក្នុងប្រទេសកូរ៉េខាងត្បូងក្នុងទសវត្សរ៍១៩៥០ដោយព្រះតេជគុណ Sun Myung Moon នោះ បានបញ្ជាក់កាលពីថ្ងៃចន្ទថា ម្តាយរបស់ លោកYamagami គឺជាសមាជិក ប៉ុន្តែមិនបានធ្វើអត្ថាធិប្បាយពីការបរិច្ចាគរបស់អ្នកស្រីទេ៕
(ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មានThe Associated Press, Reuters និង Agence France-Presse)
