នាយករដ្ឋមន្ត្រីអ៊ីស្រាអែលលោក Benjamin Netanyahu បានប្រាប់ទូរទស្សន៍ Fox Newsរបស់អាមេរិកនៅថ្ងៃព្រហស្បតិ៍ថា អ៊ីស្រាអែលគ្មានបំណងដណ្តើមយក កាន់កាប់ឬគ្រប់គ្រងតំបន់ហ្កាហ្សានោះឡើយ។
បើទោះបីជាយ៉ាងនេះក៏ដោយ ក៏កាលពីដើមសប្តាហ៍នេះ មេដឹកនាំអ៊ីស្រាអែលរូបនេះនិយាយថា អ៊ីស្រាអែលនឹងគ្រប់គ្រងបញ្ហាសន្តិសុខនៃតំបន់ហ្កាហ្សា ដោយលោកមិនបានប្រាប់លម្អិតឡើយជុំវិញរឿងនេះ។
កាលពីថ្ងៃព្រហស្បតិ៍ម្សិលមិញលោក Netanyahu បានប្រាប់ទូរទស្សន៍ Fox Newsថា «កងកម្លាំងដ៏ទុកចិត្តមួយ» នឹងត្រូវបង្កើតឡើងក្នុងតំបន់ហ្កាហ្សាដើម្បីរាំងខ្ទប់ការគំរាមកំហែងពីក្រុមសកម្មប្រយុទ្ធ ដូចជាក្រុមហាម៉ាស់ជាដើម ក្នុងការវាយប្រហារទៅលើអ៊ីស្រាអែល។
ទន្ទឹមនឹងនេះដែរ សេតវិមានអាមេរិកនិយាយកាលពីថ្ងៃព្រហស្បតិ៍ថា អ៊ីស្រាអែលនឹងចាប់ផ្តើមអនុវត្តការផ្អាកសកម្មភាពយោធារបស់ខ្លួនចំនួន៤ម៉ោងក្នុងមួយថ្ងៃប្រឆាំងនឹងក្រុមហាម៉ាស់ នៅក្នុងតំបន់ហ្កាហ្សាភាគខាងជើង។
ការប្រកាសរបស់អ្នកនាំពាក្យក្រុមប្រឹក្សាសន្តិសុខជាតិសហរដ្ឋអាមេរិកលោក John Kirby កើតឡើងក្នុងពេលដែលកងទ័ពអ៊ីស្រាអែល កំពុងប្រយុទ្ធជាមួយក្រុមសកម្មប្រយុទ្ធហាម៉ាស់ក្នុងទីក្រុង Gaza ហើយពលរដ្ឋស៊ីវិលប៉ាឡេស្ទីនកំពុងរត់គេចពីតំបន់ប្រយុទ្ធគ្នានេះ។
ការផ្អាកសកម្មភាពប្រយុទ្ធរបស់អ៊ីស្រាអែលនេះ នឹងទុកពេលដល់ពលរដ្ឋប៉ាឡេស្ទីន ដើម្បីរត់គេចខ្លួនតាមច្រករបៀងមនុស្សធម៌ចំនួន២កន្លែង និងក៏ជាជំហានដ៏សំខាន់មួយក្នុងការឆ្ពោះទៅរកការកាត់បន្ថយជនរងគ្រោះដោយសារសង្គ្រាម។ នេះបើតាមការបញ្ជាក់ឱ្យដឹងរបស់លោក Kirby។
លោកDavid Satterfield ដែលជាបេសកជនពិសេសអាមេរិកទទួលបន្ទុកបញ្ហាមនុស្សធម៌ក្នុងតំបន់មជ្ឈិមបូព៌ា បានប្រាប់ក្រុមអ្នកសារព័ត៌មានថា លោកសង្ឃឹមថាការផ្អាករយៈពេលខ្លីនៃសកម្មភាពយោធា ក៏នឹងជួយផងដែរដល់ការជម្លៀសជនស៊ីវិលដែលរងរបួសនិងក្រុមជនបរទេស៕
ព័ត៌មានខ្លះក្នុងអត្ថបទនេះត្រូវបានផ្តល់ដោយទីភ្នាក់ងារសារព័ត៌មាន The Associated Press, Reuters និងទីភ្នាក់ងារសារព័ត៌មានAgence France-Presse។