កងកម្លាំងអ៊ីស្រាអែលបានប្រយុទ្ធនឹងក្រុមហាម៉ាស់នៅថ្ងៃព្រហស្បតិ៍នេះក្នុងទីក្រុងហ្កាហ្សា ខណៈជនស៊ីវិលប៉ាឡេស្ទីនកំពុងរត់គេចចេញពីតំបន់នេះ ដែលកំពុងស្ថិតក្រោមប្រតិបត្តិការយោធារបស់កងទ័ពអ៊ីស្រាអែល ក្រោយពីពួកហាម៉ាស់បានធ្វើការវាយប្រហារដ៏ប្រល័យមួយទៅលើប្រទេសអ៊ីស្រាអែលកាលពីខែមុនមក។
ទន្ទឹមនឹងការប្រយុទ្ធដោយកម្លាំងថ្មើរជើងក្នុងទីក្រុងហ្កាហ្សា ដែលជាទីក្រុងធំបំផុតនោះ កងទ័ពអ៊ីស្រាអែលក៏បានវាយប្រហារតំបន់នេះពីលើអាកាសផងដែរ។
ការប្រយុទ្ធគ្នានេះបានធ្វើឱ្យមានការបម្លាស់ទីដ៏ធំនៃក្រុមពលរដ្ឋដែលរស់នៅក្នុងតំបន់នោះ ដោយការិយាល័យសម្របសម្រួលកិច្ចការមនុស្សធម៌អង្គការសហប្រជាជាតិបាននិយាយថា មនុស្សប្រមាណ៥០.០០០នាក់ បានរត់គេចខ្លួនកាលពីថ្ងៃពុធម្សិលមិញ ទៅកាន់តំបន់ហ្កាហ្សាភាគខាងត្បូង។
នេះជាតួលេខដ៏ខ្ពស់បំផុតមួយក្នុងសប្តាហ៍នេះ។ អង្គការសហប្រជាជាតិនិយាយថា មនុស្សសរុបចំនួន៧២.០០០នាក់បានរត់ភៀសខ្លួនចេញពីតំបន់ហ្កាហ្សាខាងជើងចាប់តាំងពីថ្ងៃអាទិត្យមក។
អ៊ីស្រាអែលបានចាប់ផ្តើមបើកច្រករបៀងជម្លៀសពលរដ្ឋមួយកាលពីថ្ងៃអាទិត្យ នៅតាមផ្លូវដ៏សំខាន់ដែលតភ្ជាប់តំបន់ហ្កាហ្សាខាងជើងទៅខាងត្បូង។ ច្រកនេះបើក៤ម៉ោងក្នុងមួយថ្ងៃ ដើម្បីអនុញ្ញាតឱ្យក្រុមជនស៊ីវិលអាចចាកចេញពីតំបន់ប្រយុទ្ធគ្នាដ៏សំខាន់។ កងទ័ពអ៊ីស្រាអែលនិយាយនៅថ្ងៃពុធថា ខ្លួនបានបន្ថែមមួយម៉ោងទៀតលើម៉ោងបើកច្រករបៀងនេះ ដោយសារមានមនុស្សជាច្រើនកំពុងរត់ភៀសខ្លួនតាមច្រកនេះ។
អង្គការសហប្រជាជាតិនិងក្រុមផ្តល់ជំនួយដទៃទៀត កំពុងផ្តល់ទឹកនិងនំប៊ីស្គីតប៉ូវកម្លាំងនៅក្បែរខ្សែបន្ទាត់ដែលខណ្ឌចែករវាងតំបន់ហ្កាហ្សាភាគខាងជើងនិងខាងត្បូង៕
អ្នកស្រី Margaret Besheer អ្នកឆ្លើយឆ្លងព័ត៌មាន VOA ប្រចាំអង្គការសហប្រជាជាតិ រាយការណ៍អំពីរឿងនេះ។ ព័ត៌មានមួយចំនួនសម្រាប់អត្ថបទនេះត្រូវបានផ្តល់ដោយ ទីភ្នាក់ងារសារព័ត៌មាន Associated Press, Reuters និង Agence France-Presse ។
