គ្រោះថ្នាក់ធំបំផុតចំពោះសហរដ្ឋអាមេរិកនិងលោកខាងលិចបន្ទាប់ពីការដកទ័ពអាមេរិកចេញពីអាហ្វហ្គានីស្ថាន អាចចេញមកពីសាខាអាហ្វហ្គានីស្ថានរបស់ក្រុមភេរវកររដ្ឋអ៊ីស្លាម មិនមែនក្រុមal-Qaida ទេ ទោះបីក្រុមនេះមានទំនាក់ទំនងយូរអង្វែងជាមួយតាលីបង់ក៏ដោយ។
មន្រ្តីអាមេរិកជាន់ខ្ពស់ប្រឆាំងភេរវកម្មម្នាក់បានប្រាប់ក្រុមសមាជិកសភានៅថ្ងៃពុធថា ខណៈក្រុមភេរវកម្មទាំងពីរបានផ្តោតការយកចិត្តទុកដាក់ខ្លាំងលើការពង្រីកបណ្តាញក្នុងតំបន់ មានការចង្អុលបង្ហាញថា សាខាពួករដ្ឋអ៊ីស្លាមខេត្ត Khorasan ឬ ISIS-K កំពុងមានការផ្លាស់ប្តូរ។
ក្នុងអំឡុងសវនាការអំពីការគំរាមកំហែងចំពោះសហរដ្ឋអាមេរិក លោកស្រី Christine Abizaidនាយិកាមជ្ឈមណ្ឌលជាតិប្រឆាំងភេរវកម្មបាននិយាយថា «កង្វល់ផ្ទាល់របស់ខ្លួនជាក់លាក់ណាស់ គឺទាក់ទងនឹងរដ្ឋអ៊ីស្លាម Khorasan និងកម្រិតដែលក្រុមនេះកំពុងកសាងកេរ្តិ៍ឈ្មោះ បន្ទាប់ពីធ្វើការវាយប្រហារនៅថ្ងៃទី ២៦ ខែសីហា។ តើពួកនេះនឹងផ្តោតមកលើលោកខាងលិច មកលើមាតុភូមិយើងលើសពីមុនទេ»?
ខណៈអាមេរិកកំពុងតែវីវក់ជម្លៀសមនុស្ស ការបំផ្ទុះគ្រាប់បែកអត្តឃាតកាលពីថ្ងៃទី២៦ ខែសីហានៅអាកាសយានដ្ឋានអន្តរជាតិ Hamid Karzai ក្នុងទីក្រុងកាប៊ុល បានសម្លាប់ទាហានអាមេរិក១៣នាក់ និងជនជាតិអាហ្វហ្គានីស្ថានជាង១៦០នាក់។
ការវាយប្រហារនោះត្រូវបានក្រុមរដ្ឋអ៊ីស្លាមខេត្ត Khorasan ប្រកាសទទួលខុសត្រូវយ៉ាងឆាប់រហ័ស ដោយបានបង្កឱ្យមានការព្រមានជាបន្តបន្ទាប់អំពីការវាយប្រហារបន្ថែមលើអាកាសយានដ្ឋាននេះ។
ក្រុមនេះក៏បានអះអាងទទួលខុសត្រូវការវាយប្រហារដោយគ្រាប់រ៉ុក្កែតលើអាកាសយានដ្ឋាន ក្នុងពេលបួនថ្ងៃក្រោយមក ហើយកិច្ចខិតខំប្រឹងប្រែងបង្ការការវាយប្រហារដោយក្រុមរដ្ឋអ៊ីស្លាមខេត្ត Khorasan បាននាំឱ្យសហរដ្ឋអាមេរិកធ្វើការវាយប្រហារដោយយន្តហោះគ្មានមនុស្សបើកនៅថ្ងៃទី២៩ ខែសីហា នៅទីក្រុងកាប៊ុល ដែលបានសម្លាប់ជនស៊ីវិល១០នាក់ក្នុងនោះមានកុមារ៧នាក់។
មន្រ្តីយោធាអាមេរិកជឿជាក់ថា បច្ចុប្បន្នពួករដ្ឋអ៊ីស្លាមខេត្ត Khorasan មានកម្លាំងស្នូលយ៉ាងតិច២.០០០នាក់នៅទូទាំងប្រទេសអាហ្វហ្គានីស្ថាន ប៉ុន្តែផ្នែកស៊ើបការណ៍បរទេសខ្លះគិតថា អាចមានច្រើនជាងនេះ៕
