នាយករដ្ឋមន្ត្រីចិនលោក Li Keqiang កាលពីថ្ងៃសុក្រកន្លងទៅបាននិយាយថា សហរដ្ឋអាមេរិកនិងចិន មិនត្រូវបិទទ្វារវប្បធម៌រវាងប្រទេសទាំងពីរ ខណៈដែលការដាក់ទណ្ឌកម្មលើរុស៊្សីដែលជាប្រទេសជិតខាងរបស់ចិន កំពុងរីកកាន់តែធំឡើងនោះ។
លោក Li បានថ្លែងថា ចាប់តាំងពីប្រទេសទាំងពីរ បានបើកទ្វារបង្កើតទំនាក់ទំនងការទូតឡើងវិញកាលពី៥០ឆ្នាំកន្លងមក ទ្វារនោះ មិនត្រូវបិទហើយត្រូវបន្តកិច្ចសហប្រតិបត្តិការជាមួយគ្នាតទៅទៀត។ លោក បានថ្លែងនៅក្នុងឱកាសខួបទំនាក់ទំនងការទូតលើកទី៥០ឆ្នាំរវាងសហរដ្ឋអាមេរិកនិងចិនដែលបានចាប់ផ្តើមដោយមានដំណើរទស្សនកិច្ចកាលពីឆ្នាំ១៩៧២ទៅកាន់រដ្ឋធានីប៉េកាំងដោយអតីតប្រធានាធិបតីអាមេរិកលោក Richard Nixon។
ដោយគាំទ្រសុន្ទករថានានារបស់មេដឹកនាំចិនចាប់តាំងពីការចូលលុកលុយរបស់រុស្ស៊ីលើអ៊ុយក្រែនកាលពីចុងខែកុម្ភៈមក លោក Li បានទទួលស្គាល់ថា រដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងប៉េកាំងមានទស្សនៈផ្ទុយគ្នាជុំវិញវិបត្តិដែលកំពុងកើតមានឡើងនៅអឺរ៉ុបខាងកើតនោះ។
លោក Li បានប្រាប់ក្រុមអ្នកសារព័ត៌មាននៅពេលបញ្ចប់សម័យប្រជុំសភាចិនប្រចាំឆ្នាំថា៖ «យើងជឿជាក់ថា កិច្ចសហប្រតិបត្តិការមានសារៈសំខាន់ពីព្រោះសន្តិភាពនិងការអភិវឌ្ឍពិភពលោក ពឹងផ្អែកទៅលើកិច្ចសហប្រត្តិបត្តិការនេះ។ បើទោះបីយើងជាប្រទេសប្រកួតប្រជែងទីផ្សារសម្រាប់សមរភូមិសេដ្ឋកិច្ចនិងពាណិជ្ជកម្មក្តី តែការប្រកួតប្រជែងនេះ គួរត្រូវធ្វើឡើងដោយផ្អែកលើភាពស្មោះត្រង់និងស្មើភាពគ្នា»។
ប្រធានាធិបតីចិនលោក Xi Jinping កាលពីថ្ងៃទី៨ ខែមីនាកន្លងទៅនេះ បាននិយាយថា ប្រទេសរបស់លោកត្រៀមខ្លួនជាស្រេចដើម្បីធ្វើការងារដ៏សកម្មជាមួយសហគមន៍អន្តរជាតិដើម្បីដោះស្រាយជម្លោះនៅក្នុងប្រទេសអ៊ុយក្រែន។
ទោះជាយ៉ាងណាក្តី ក៏អ្នកវិភាគខ្លះ បានលើកឡើងថា រដ្ឋាភិបាលក្រុងប៉េកាំង បានធ្វើសំណើនេះឡើងក្នុងហេតុផលហិរញ្ញវត្ថុនិងនយោបាយតែប៉ុណ្ណោះ។
លោក William Burns នាយកទីភ្នាក់ងារស៊ើបការណ៍សម្ងាត់អាមេរិកCIA បានផ្តល់កសិណសាក្សីនៅចំពោះមុខសមាជិកសភាអាមេរិកនាពេលថ្មីៗនេះថា៖ «ខ្ញុំគិតថា ប្រធានាធិបតីចិនលោកXi និងថ្នាក់ដឹកនាំចិន មិនអស់ចិត្តចំពោះ អ្វីដែលគេកំពុងឃើញនៅក្នុងប្រទេសអ៊ុយក្រែននោះឡើយ។ ពួកគេមិនបានរំពឹងទុកនូវផលលំបាកនានាដែលរុស្ស៊ីត្រូវទទួលរងនោះឡើយ»។
នាយក CIA អាមេរិករូបនេះ បាននិយាយទៀតថា ចិនមានក្តីកង្វល់អំពីផលប៉ះពាល់ខាងភូមិសាស្ត្រនយោបាយ ដោយសារតែការឈ្លានពានរបស់រុស្សីលើអ៊ុយក្រែនដែលក្នុងនោះរួមមានទាំងលោក Putin ធ្វើឲ្យអឺរ៉ុបនិងអាមេរិកងាកខិតជិតគ្នាកាន់តែខ្លាំងឡើង»។
អ្នកវិភាគខ្លះនិយាយថា រដ្ឋាភិបាលក្រុងប៉េកាំង កំពុងព្យាយាមអូសបន្លាយពេលវេលា រហូតដល់ខ្លួនអាចដាក់ចេញនូវគោលនយោបាយឆ្លើយតបសមរម្យណាមួយលើស្ថានភាពដែលកំពុងមានការផ្លាស់ប្តូរនោះ។ បើទោះបីជាទណ្ឌកម្មត្រូវបានដាក់សំដៅតែទៅលើពាណិជ្ជកម្មរុស្ស៊ីក្តី ក៏ទណ្ឌកម្មទាំងនេះ បានធ្វើឲ្យប៉ះពាល់ដល់ក្រុមហ៊ុននិងធនាគាររបស់ចិនជាច្រើនដែលកំពុងមានទំនាក់ទំនងជាមួយស្ថាប័នរុស្ស៊ី៕
តើចិនកំពុងធ្វើសំណើក្លែងក្លាយដាក់អាមេរិកឬយ៉ាងណា?
ញូវដែលី —
