ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ៊ីរ៉ង់​ថ្លែង​​ថា​​ទណ្ឌកម្ម​របស់​​អាមេរិក​​រារាំង​​ការ​ទទួល​បាន​​វ៉ាក់សាំង​​ជំងឺ​កូវីដ១៩​


ក្នុង​រូបថត​ផ្សាយ​ជា​ផ្លូវការ​នេះ ប្រធានាធិបតី​អ៊ីរ៉ង់​លោក Hassan Rouhani ​ថ្លែង​នៅ​ក្នុង​កិច្ច​ប្រជុំ​មួយ​នៅ​ទី​ក្រុង​តេហេរ៉ង់ កាល​ពី​ថ្ងៃ​ពុធ​ទី​៩ ខែ​ធ្នូ ឆ្នាំ​២០២០។
ក្នុង​រូបថត​ផ្សាយ​ជា​ផ្លូវការ​នេះ ប្រធានាធិបតី​អ៊ីរ៉ង់​លោក Hassan Rouhani ​ថ្លែង​នៅ​ក្នុង​កិច្ច​ប្រជុំ​មួយ​នៅ​ទី​ក្រុង​តេហេរ៉ង់ កាល​ពី​ថ្ងៃ​ពុធ​ទី​៩ ខែ​ធ្នូ ឆ្នាំ​២០២០។

ប្រធានាធិបតី​អ៊ីរ៉ង់​លោក Hassan Rouhani ​បាន​និយាយនៅ​ថ្ងៃ​ពុធ​ថា​ ​ការដាក់​ទណ្ឌកម្មរបស់​សហរដ្ឋ​អាមេរិក​ប្រឆាំងនឹងអ៊ីរ៉ង់បាន​ធ្វើ​ឲ្យប្រទេសរបស់​លោក​មាន​ការលំបាក​ក្នុង​ការទិញ​ថ្នាំពេទ្យនិង​គ្រឿង​ផ្គត់ផ្គង់​បរិក្ខារ​ពេទ្យ​ផ្សេងៗ​ទៀត​ពី​ក្រៅប្រទេស​ដែល​ក្នុង​នោះ​ក៏​រួមមាន​វ៉ាក់សាំង​ការពារ​ជំងឺ​កូវីដ១៩​ផងដែរ ដែល​ប្រទេសរបស់​លោក​ត្រូវការ​ជាចាំបាច់​ដើម្បី​ទប់ស្កាត់​ការផ្ទុះឆ្លងរាលដាលដ៏​ខ្លាំងក្នុង​តំបន់​មជ្ឈិម​បូព៌ា។​

រដ្ឋបាល​របស់​ប្រធានាធិបតី​អាមេរិក​លោក ​Donald Trump ​បាន​ដាក់​ទណ្ឌកម្ម​រាំងខ្ទប់​លើ​វិស័យ​ធនាគារ​និងឧស្សាហកម្ម​ប្រេង​និង​ឧស្ម័នដ៏​សំខាន់​របស់​ប្រទេស​អ៊ីរ៉ង់​ចាប់តាំង​ពី​សហរដ្ឋ​អាមេរិក​បាន​ដកខ្លួន​ចេញ​ជា​ឯកតោ​ភាគី​ពី​កិច្ចព្រមព្រៀង​អាវុធ​នុយក្លេអ៊ែរ​ជាមួយ​ប្រទេស​អ៊ីរ៉ង់ក្នុង​ឆ្នាំ​២០១៨​មក។

ខណៈពេល​ដែល​សហរដ្ឋអាមេរិក​លើក​ឡើង​ថា​ថ្នាំពេទ្យ​និង​ទំនិញ​ក្នុង​លក្ខណៈ​មនុស្សធម៌​មិន​ត្រូវ​បាន​ភ្ជាប់​ទៅ​នឹង​ការដាក់​ទណ្ឌកម្ម​របស់​ខ្លួន​នោះ​ការរឹតបន្តឹង​លើ​ពាណិជ្ជកម្ម​បាន​ធ្វើ​ឲ្យ​ធនាគារ​និង​ក្រុមហ៊ុន​ជាច្រើន​នៅ​ជុំវិញ​ពិភពលោក​មាន​ភាពស្ទាក់ស្ទើរអល់អែក​ក្នុង​ការធ្វើ​ជំនួញ​ជាមួយអ៊ីរ៉ង់​ដោយ​ពួកគេ​ខ្លាចរង​ការព្រមាន​សងសឹក​ពី​រដ្ឋាភិបាល​ក្រុង​វ៉ាស៊ីងតោន។ អ៊ីរ៉ង់​ក៏​បាន​កាត់ផ្តាច់​ផង​ដែរ​ពីប្រព័ន្ធ​ធនាគារ​អន្តរជាតិ​ដែល​ធ្វើ​ខ្លួនលំបាក​ខ្លាំង​ក្នុង​ការបង្វិល​សាច់​ប្រាក់​ទូទាត់ផ្សេងៗ។​

ប្រធានាធិបតី​អ៊ីរ៉ង់​លោក Rouhani ​ត្រូវ​បាន​ទីភ្នាក់ងារ​សារព័ត៌មាន​រដ្ឋ IRNA ​ដក​ស្រង់​សម្តី​ថា៖ «ពលរដ្ឋ​របស់​យើង​គួរ​ដឹង​ថា​ចំពោះ​សកម្មភាព​ដែល​យើង​មាន​ផែនការ​នឹង​អនុវត្ត​ដើម្បី​នាំ​ចូល​ថ្នាំ​ពេទ្យ​វ៉ាក់សាំង​ការពារ​ជំងឺ​កូវីដ១៩​និង​បរិក្ខាពេទ្យ​នោះ​យើង​គួរ​ត្រូវ​ជេរ​លោក ​Trump ​ឲ្យ​បាន១០០​ដង»។​

លោក​បន្តថាគ្រាន់តែរឿង​ទិញ​ដូរ​ថ្នាំ​សង្កូវ​ក្នុង​លក្ខណៈ​ធម្មតា​ពី​ក្រៅ​ប្រទេស​នោះ​បាន​ធ្វើ​ឲ្យ​យើង​ជួប​ប្រទះ​ការលំបាក​ជាខ្លាំងហើយ​យើង​ត្រូវ​ប្រើ​ពេល​រាប់​សប្តាហ៍​ក្នុង​ការបង្វិល​សាច់ប្រាក់​ទូទាត់។

លោក Rouhani​ បន្ត​ទៀត​ថា​អាជ្ញាធរ​អ៊ីរ៉ង់​កំពុង​ដុត​ដៃ​ដុត​ជើង​ដើម្បី​ធ្វើ​អ្វី​ដែល​គេ​អាច​ធ្វើ​បាន​ក្នុង​ការទិញ​វ៉ាក់សាំង​ការពារ​ជំងឺ​កូវីដ១៩​ពី​ក្រៅ​ប្រទេស​ហើយ​សង្ឃឹម​ថា​នឹងចាក់​វ៉ាក់សាំង​នោះ​ទៅ​ឲ្យ​អ្នកដែល​មាន​ការប្រឈម​ខ្ពស់ឲ្យ​បាន​កាន់​តែ​ឆាប់​តាម​ដែល​អាច​ធ្វើ​ទៅ​បាន។

កាល​ពី​សប្តាហ៍​មុន​អ៊ីរ៉ង់​ថា​ខ្លួន​កំពុង​សិក្សា​ផលិត​វ៉ាក់សាំង​ផ្ទាល់​ខ្លួន​ដោយ​រំពឹង​ថា​នឹង​អាច​ចាក់​សាកល្បង​ទៅ​លើ​មនុស្ស​នៅ​ខែ​ក្រោយ។ អ៊ីរ៉ង់​មាន​គម្រោង​ទិញ​វ៉ាក់សាំង​ការពារជំងឺ​កូវីដ១៩​ចំនួន​២០​លាន​ដូស​ពី​ក្រៅ​ប្រទេស​សម្រាប់​ពលរដ្ឋ​របស់​ខ្លួន​ដែល​មាន​ចំនួន​សរុប​៨០​លាន​នាក់។

អ៊ីរ៉ង់​មាន​អ្នកស្លាប់​ដោយសារ​ជំងឺ​កូវីដ១៩​ជាង​៥០.០០០​នាក់​និង​មាន​អ្នក​ឆ្លង​ជាង​១​លាន​នាក់និង​ជា​ប្រទេស​មួយ​ដែលឆ្លង​ខ្លាំង​បំផុតក្នុង​តំបន់​មជ្ឈិម​បូព៌ា៕

XS
SM
MD
LG