រាប់ចាប់ពីនាឡិកាឆ្លាតវៃរហូតដល់ប្រព័ន្ធសន្តិសុខឆ្លាតវៃ ចំនួនឧបករណ៍មានកាន់តែច្រើនឡើងៗដែលតភ្ជាប់ជាមួយគ្នា និងតភ្ជាប់ទៅនឹងបណ្តាញអ៊ីនធឺណិត ហើយអាចបង្កើតបានជាទិន្នន័យ។ ការតភ្ជាប់គ្នាជាបណ្តាញនេះ ត្រូវបានគេហៅថា «អ៊ីនធឺណិតសម្រាប់ឧបករណ៍គ្រប់យ៉ាង»។ អ្នកជំនាញនិយាយថា «អ៊ីនធឺណិតសម្រាប់ឧបករណ៍គ្រប់យ៉ាង»នេះ ធ្វើឲ្យយើងដឹងអំពីខ្លួនយើងបានកាន់តែច្រើន និងដឹងអំពីពិភពលោកនៅជុំវិញខ្លួនយើង។
ពេលបើកបរនៅក្នុងចរាចរណ៍នៃទីក្រុង Los Angeles គឺហាក់ដូចជាយើងកំពុងលេងហ្គេមអញ្ជឹងដែរ ដែលអ្នកបើកបរត្រូវគេចចេញពីអ្នកបើកបរដ៏អាក្រក់ផ្សេងទៀត។
«អ្នកត្រូវតែដឹងឲ្យបានច្បាស់ ពីព្រោះថា មានការបើកបរច្រើនណាស់ដែលឈប់ភ្លាមៗរួចបន្តដំណើរទៅមុខទៀត គឺដូចការបើកបរមួយនេះអញ្ជឹង»។
លោក Jordi Ortega កំពុងធ្វើតេស្តសាកល្បងកម្មវិធីមួយនៅលើទូរស័ព្ទរបស់លោក ដើម្បីពិនិត្យមើលថាតើលោកបើកបរយ៉ាងដូចម្តេច។ កម្មវិធីទូរស័ព្ទមួយដែលមានឈ្មោះថា «មតិវាយតម្លៃទៅលើអ្នកបើកបរ» ឬ Driver Feedback™ ដែលផលិតដោយក្រុមហ៊ុនធានារ៉ាប់រង State Farm បានផ្លាស់ប្តូរទូរស័ព្ទដៃរបស់លោក Ortega ឲ្យក្លាយជាឧបករណ៍មួយដែលអាចតាមដានឥរិយាបទនៃការបើកបរ។ កម្មវិធីនេះ ប្រើប្រាស់ប្រព័ន្ធកំណត់ទីតាំង GPS របស់ទូរស័ព្ទដៃ និងឧបករណ៍សម្រាប់វាស់ល្បឿន ដើម្បីប្រមូលព័ត៌មាននៅខណៈពេលដែលរថយន្តកំពុងមានចលនា ហើយវាដាក់ពិន្ទុលើអ្នកបើកបរ។ នេះបើតាមការអះអាងរបស់នាង Irene Henry ដែលជាភ្នាក់ងាររបស់ក្រុមហ៊ុន State Farm។
«អ្នកអាចហៅវាដោយខ្លីថា ABC ដែលមានន័យថា សំទុះ ការចាប់ហ្វ្រាំង និងការរុញផ្អឹប ដែលនេះគឺដើម្បីពិនិត្យមើលកត្តាគ្រោះថ្នាក់ផ្សេងៗ និងធ្វើឲ្យមានភាពប្រសើរឡើងជាងមុន»។
ផ្នែកផ្សេងៗនៃ«អ៊ីនធឺណិតសម្រាប់ឧបករណ៍គ្រប់យ៉ាង» ឬហៅដោយខ្លីថា IoT មានសមត្ថភាពជាច្រើនចេញពីកម្មវិធីទូរស័ព្ទមួយដែលអាចប្តូរទូរស័ព្ទទៅជាឧបករណ៍ស្រាវជ្រាវ ឬឧបករណ៍វាស់ស្ទង់នៅលើដងផ្លូវអំពីកម្រិតនៃការធ្វើចរាចរណ៍ និងល្បឿនរបស់រថយន្ត។ ឧបករណ៍ទាំងនេះតភ្ជាប់ជាមួយគ្នា គឺតភ្ជាប់ទៅកាន់មនុស្ស និងភ្ជាប់ទៅប្រព័ន្ធអ៊ីនធឺណិត។ ទិន្នន័យទាំងនេះត្រូវបានប្រមូល និងវិភាគ។
លោក Bhaskar Krishnamachari អ្នកឯកទេសខាង IoT និយាយថា បច្ចេកវិទ្យាដែលតភ្ជាប់គ្នាបែបនេះ អាចជួយដល់អ្នករៀបចំគម្រោងទីក្រុងឲ្យកាន់តែងាយដឹងអំពីបញ្ហាបរិស្ថាន ហើយអាចជួយពួកគេក្នុងការធ្វើគម្រោងការទុកមុន។
«ឧបករណ៍វាស់ស្ទង់ទាំងនេះវាស់វែងវត្ថុគ្រប់យ៉ាង រាប់ចាប់តាំងពីការបញ្ចេញធាតុកខ្វក់ រហូតដល់ស្ថានភាពនៅលើដងផ្លូវរបស់យើង ក៏ដូចជាការត្រួតពិនិត្យរចនាសម្ព័ន្ធអាគារ ស្ពាន និងវត្ថុផ្សេងៗទៀត ជាពិសេសឧបករណ៍ដែលធ្វើការវាស់ស្ទង់បរិស្ថានជុំវិញ អាចតភ្ជាប់គ្នាតាមរយៈ«អ៊ីនធឺណិតសម្រាប់ឧបករណ៍គ្រប់យ៉ាង» សម្រាប់អ្នកដែលមានអំណាចក្នុងការធ្វើសេចក្តីសម្រចដើម្បីឲ្យដឹងកាន់តែច្បាស់អំពីសភាពនៃហេដ្ឋារចនាសម្ព័ន្ធរបស់យើង»។
IoT មិនត្រឹមតែផ្តល់ការយល់ដឹងកាន់តែប្រសើរឡើងទាក់ទងនឹងពិភពជុំវិញប៉ុណ្ណោះទេ វាថែមទាំងអាចជួយមនុស្សឲ្យមើលឃើញអំពីខ្លួនឯងក្នុងរបៀបមួយថ្មី។ ជាឧទាហរណ៍ ក្រុមហ៊ុនមួយឈ្មោះ MemoMi Labs បានផលិតកញ្ចក់ឌីជីថលមានភ្ជាប់កាមេរ៉ានៅខាងលើ ដែលអាចថតយកមនុស្សចេញពីគ្រប់ជ្រុងទាំងអស់ ហើយក៏អាចប្តូរពណ៌នៃសម្លៀកបំពាក់របស់អ្នកផងដែរ។ រូបភាពដែលថតបាន អាចត្រូវបានផ្ញើតាមសារអេឡិចត្រូនិច (Email) ទៅកាន់មិត្តភក្តិ ដើម្បីសុំមតិត្រឡប់មកវិញ។ នេះបើតាមការបញ្ជាក់របស់លោក Salvador Vilcovsky ស្ថាបនិកក្រុមហ៊ុន ដែលបានប្រាប់វីអូអេតាមរយៈប្រព័ន្ធ Skype។
«នាពេលអនាគត យើងមិនត្រឹមតែអាចប្តូរពណ៌សម្លៀកបំពាក់ប៉ុណ្ណោះទេ យើងក៏នឹងអាចបំពាក់សម្ភារៈផ្សេងៗទៅលើរូបរបស់អ្នកបានផងដែរ។ យើងនឹងអាចផ្តល់ជាមតិយោបល់អំពីវត្ថុដែលមាននៅក្នុងហាង ឬនៅខាងក្រៅហាង នៅក្នុងទីផ្សារលក់ដូរតាមប្រព័ន្ធអ៊ីនធឺណិត»។
អ្នកស្រី Bridget Karlin នៃក្រុមហ៊ុន Intel និយាយថា នៅឆ្នាំ២០២០ ក្រុមហ៊ុនរបស់អ្នកស្រីរំពឹងថានឹងអាចផលិតឧបករណ៍នោះបាន៥០លានលានគ្រឿង ហើយដាក់លក់ក្នុងទីផ្សារក្នុងសាកលលោក។
«អ៊ីនធឺណិតសម្រាប់ឧបករណ៍គ្រប់យ៉ាង វាជាទីផ្សារដ៏ធំមួយ។ តាមពិត យើងចាត់ទុកវាថាជាការវិវត្តថ្មីនៃប្រព័ន្ធកុំព្យូទ័រ»។
ក៏ប៉ុន្តែ លោក Bhaskar Krishnamachari បានិយាយថា ការវិវត្តនេះក៏នាំមកជាមួយនូវការព្រួយបារម្ភផងដែរទាក់ទងនឹងឯកជនភាព និងសន្តិសុខ។
«បើសិនជាយើងភ្ជាប់ហេដ្ឋារចនាសម្ព័ន្ធរបស់យើងមិនត្រឹមតែទៅនឹងផ្ទះរបស់យើងប៉ុណ្ណោះទេ ប៉ុន្តែទៅនឹងទីក្រុងផ្សេងៗជាមួយនឹង«អ៊ីនធឺណិតសម្រាប់ឧបករណ៍គ្រប់យ៉ាង»នេះ យើងត្រូវតែធ្វើឲ្យប្រាកដដាច់ខាតថា ប្រព័ន្ធនោះមិនអាចត្រូវបានគេលួចចូលជាដាច់ខាត មានន័យថា អ្នកផ្សេងទៀតមិនអាចគ្រប់គ្រងហេដ្ឋារចនាសម្ព័ន្ធរបស់យើងដោយយើងមិនបានដឹងនោះទេ ឬដោយគ្មានការអនុញ្ញាតពីយើងឡើយ។ តាមពិតទៅវាធ្លាប់មានឧប្បត្តិហេតុរួចមកហើយ គឺថាមានមនុស្សបានលបលួចចូលក្នុងប្រព័ន្ធសញ្ញាចរាចរណ៍»។
សម្រាប់លោក Jordi Ortega លោកចូលចិត្តគំនិតក្នុងការប្រើប្រាស់បច្ចេកវិទ្យាដែលធ្វើឲ្យលោកដឹងអំពីខ្លួនលោកកាន់តែច្បាស់។ បន្ទាប់ពីការធ្វើដំណើររបស់លោក កម្មវិធីទូរស័ព្ទនោះបានផ្តល់ពិន្ទុចុងក្រោយអំពីការបើកបររបស់លោក។
លោកនិយាយថា៖ «ខ្ញុំទទួលបាន៨៨ពិន្ទុ»។
កម្មវិធីទូរស័ព្ទនោះបញ្ជាក់ថា លោកត្រូវតែព្យាយាមបន្ថែមទៀតលើការប្រើប្រាស់ហ្វ្រាំងរថយន្ត៕
ប្រែសម្រួលដោយ នៀម ឆេង
