ប្រជាពលរដ្ឋស៊ូដង់ក្នុងរដ្ឋធានីខាទុំ និងក្នុងក្រុង Omdurman ដែលនៅជិតខាងបានរាយការណ៍ថាមានការប៉ះទង្គិចគ្នាយូរៗម្តងកាលពីព្រឹកថ្ងៃពុធនេះរវាងកងយោធានិងកងកម្លាំងយោធាប៉ារ៉ាមួយជាគូបដិបក្ខ តែបានថ្លែងថាការប្រយុទ្ធគ្នាបានថមថយនៅថ្ងៃទីពីរនៃកិច្ចព្រមព្រៀងឈប់បាញ់បីថ្ងៃ។
ពួកអ្នកឃើញហេតុការណ៍ដោយផ្ទាល់បាននិយាយថាអ្នកក្រុងជាច្រើននាក់នៃរដ្ឋធានីបានចេញពីផ្ទះពួកគេដើម្បីទិញម្ហូបអាហារនិងទឹក។ ពួកគេបានឈរបន្តគ្នានៅហាងលក់នំប៉័ងឬហាងលក់គ្រឿងទេស។ អ្នកខ្លះបានពិនិត្យហាងលក់ទំនិញឬផ្ទះពួកគេដែលត្រូវបានបំផ្លាញឬត្រូវលួចឥវ៉ាន់នៅពេលមានការប្រយុទ្ធគ្នា។ ចំណែកឯអ្នកដទៃទៀតបានចូលរួមជាមួយមនុស្សរាប់ម៉ឺននាក់ដែលបានចាកចេញពីទីក្រុងនេះកាលពីប៉ុន្មានថ្ងៃថ្មីៗនេះ។
អ្នកស្រុកថ្លែងថាការប៉ះទង្គិចគ្នាកើតមានឡើងនៅកន្លែងខ្លះនៃក្រុងខាទុំ និង ក្រុង Omdurman ដោយមានភាគច្រើននៅជុំវិញបញ្ជាការដ្ឋានធំរបស់កងយោធានិងវិមានសាធារណរដ្ឋដែលជាកន្លែងអំណាចរបស់ប្រទេស។ មានការបាញ់តគ្នានៅក្នុងសង្កាត់ Kafouri ដែលយុទ្ធជនច្រើននាក់នៃកងកម្លាំងគាំទ្ររហ័ស (Rapid Support Forces) ត្រូវបានបញ្ជូនទៅទីនោះ។
នៅថ្ងៃពុធនេះដែរ កងយោធាបាននិយាយថាលោកOmar al-Bashir អតីតមេដឹកនាំផ្តាច់ការនៃប្រទេសស៊ូដង់ត្រូវបានឃុំឃាំងក្នុងមន្ទីរពេទ្យយោធាមួយ ដោយបានផ្តល់សេចក្តីថ្លែងការណ៍ផ្លូវការទីមួយរបស់ខ្លួនអំពីកន្លែងឋិតនៅរបស់លោក ចាប់តាំងពីមានការប្រយុទ្ធគ្នា។ ការវាយប្រហារមួយលើគុកដែលនៅទីនោះលោកal-Bashir និងអតីតមន្ត្រីច្រើននាក់របស់លោកត្រូវបានឃុំឃាំងនាំឱ្យមានសំណួរថាតើលោកនៅឯណានិងមានការនិយាយស្មានៗថាលោកត្រូវបានដោះលែង។
នៅក្នុងសេចក្តីថ្លែងការណ៍មួយកងយោធាបាននិយាយថាលោក al-Bashir អតីតរដ្ឋមន្ត្រីការពារជាតិលោក Abdel-Rahim Muhammad Hussein និងអតីតមន្ត្រីឯទៀតៗត្រូវបាននាំខ្លួនទៅកាន់មន្ទីរពេទ្យយោធា Aliyaa នៅមុនមានការប្រយុទ្ធគ្នានៅទូទាំងប្រទេស។ លោក al-Bashir ត្រូវបានដកចេញពីតំណែងនៅពេលមានការបះបោរមួយរបស់ប្រជារាស្ត្រកាលពីឆ្នាំ២០១៩។ តុលាការ ព្រហ្មទណ្ឌអន្តរជាតិ(ICC) បានរកចាប់ខ្លួនលោក al-Bashir និងលោក Hussein ពីបទចោទប្រកាន់ប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិនិងឧក្រិដ្ឋកម្មសង្គ្រាមទាក់ទិននឹងសង្គ្រាមក្នុងតំបន់ Darfur។
ការបន្ថយការប្រយុទ្ធគ្នានៅថ្ងៃពុធនេះជាពេលវេលាមិនសូវមានមួយនៃការសម្រាលស្ថានភាពសម្រាប់ប្រជារាស្ត្រស៊ូដង់រាប់លាននាក់ដែលឋិតនៅកណ្តាលការប្រយុទ្ធគ្នាតាំងពីកងកម្លាំងនៃឧត្តមសេនីយ៍ជាន់ខ្ពស់ពីរនាក់នៃប្រទេសនេះបានប្រយុទ្ធគ្នាកាលពីថ្ងៃទី១៥ ខែមេសា។ ការប្រយុទ្ធគ្នាបានជំរុញប្រជារាស្ត្រជិតដល់ស្ថានភាពពិបាកបំផុត ដោយមានការពិបាកក្នុងការស្វែងរកស្បៀងអាហារ មានការដាច់ចរន្តអគ្គិសនីក្នុងផ្នែកភាគច្រើននៃរដ្ឋធានីនិងក្រុងឯទៀតៗ ហើយមន្ទីរពេទ្យជាច្រើនបានបិទទ្វារ៕
