ប៉ុន្មានថ្ងៃបន្ទាប់ពីប្រទេសឥណ្ឌានិងប្រទេសប៉ាគីស្ថានបានដកថយរៀងៗខ្លួនពីការប្រឈមមុខដាក់គ្នាដ៏គ្រោះថ្នាក់មួយកាលពីពេលថ្មីៗនេះ រដ្ឋាភិបាលក្រុងញូដេលី បានអំពាវនាវដល់រដ្ឋាភិបាលក្រុងអ៊ីស្លាម៉ាបាដ ឱ្យចាត់វិធានការម៉ឺងម៉ាត់ប្រឆាំងនឹងក្រុមសកម្មប្រយុទ្ធនានា ទោះបីជារដ្ឋាភិបាលឥណ្ឌាបានសម្ដែងក្ដីមន្ទិលអំពីការបង្ក្រាបមួយក្នុងប្រទេសប៉ាគីស្ថានទៅលើក្រុមបែបនោះក៏ដោយ។
រដ្ឋាភិបាលប៉ាគីស្ថានបាននិយាយក្នុងសប្ដាហ៍នេះថា ប៉ាគីស្ថានបានឃុំខ្លួនសមាជិករាប់សិបនាក់នៃអង្គការដែលត្រូវបានហាមប្រាមទាំងនោះ រួមទាំងសាច់ញាតិជិតដិតពីរនាក់របស់មេដឹកនាំក្រុម Jaish-e-Mohammad ផងដែរ។
ប្រទេសឥណ្ឌាបានដាក់កំហុសទៅលើក្រុម Jaish-e-Mohammad នេះចំពោះការបំផ្ទុះគ្រាប់បែកដ៏ផ្ដាច់ផ្ដិលជីវិតមួយកាលពីខែមុនក្នុងតំបន់កាស្មៀរ ដែលគ្រប់គ្រងដោយឥណ្ឌា។
អាជ្ញាធរប៉ាគីស្ថាននិយាយថា ស្ថាប័នសាសនានិងស្ថាប័នអប់រំមួយចំនួនដែលគ្រប់គ្រងដោយក្រុមឥស្លាមនិយមដែលនៅក្រៅច្បាប់ ក៏ត្រូវបានដាក់ឱ្យស្ថិតក្រោមការត្រួតត្រារបស់រដ្ឋាភិបាលប៉ាគីស្ថានដែរ ដែលជាផ្នែកមួយនៃកិច្ចខិតខំប្រឹងប្រែងប្រយុទ្ធប្រឆាំងនឹងភេរវកម្មទូទាំងប្រទេស។
ប៉ុន្តែ ចំណាត់ការនេះមិនបានធ្វើឱ្យប្រទេសឥណ្ឌាពេញចិត្តពេញថ្លើមនោះទេ៕
