ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មន្ទីរពេទ្យ​ឥណ្ឌា​ខ្វះ​ខ្យល់​អុកស៊ីហ្ស៊ែន​យ៉ាង​ខ្លាំង​ ខណៈ​អគ្គិភ័យ​​សម្លាប់​​អ្នក​ជំងឺ​កូវីដ​ ១៣ ​នាក់


សមាជិកគ្រួសាររបស់អ្នកជំងឺកូវីដ១៩ ដែលបានស្លាប់ បានយំ នៅកន្លែងបញ្ចុះសពអ្នកជំងឺកូវីដ១៩ មួយកន្លែង នៅទីក្រុងញូវដេលី ប្រទេសឥណ្ឌា កាលពីថ្ងៃទី ២១ ខែមេសា ឆ្នាំ ២០២១។

អគ្គិភ័យបាន​សម្លាប់​អ្នក​ជំងឺ​កូវីដ១៩ ​ចំនួន ​១៣ ​នាក់ ​នៅ​ក្នុង​មន្ទីរពេទ្យ​មួយ​កន្លែង​ នៅតំបន់​ភាគ​ខាង​លិច​ប្រទេស​ឥណ្ឌា​ នៅ​ព្រឹក​ថ្ងៃ​សុក្រ​នេះ ស្រប​ពេល​ដែល​ការបន្ត​កើន​ឡើង​យ៉ាង​ខ្លាំង​នៃការឆ្លង​ជំងឺ​កូវីដ១៩ បាន​ធ្វើ​ឲ្យ​ប្រទេស​នេះ​ខ្វះខ្យល់​អុកស៊ីហ្ស៊ែន និង​ធនធាន​ព្យាបាលអ្នកជំងឺ។ នេះបើ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន AP។

ប្រទេស​ឥណ្ឌា​បាន​រាយការណ៍ពី​ករណី​ឆ្លង​ប្រចាំ​ថ្ងៃចំនួន ៣៣២.៧៣០ ​ករណី ដែលច្រើន​បំផុត​ក្នុង​ពិភពលោកជា​លើក​ទី ​២ ​ទៀត នៅ​ថ្ងៃសុក្រ​នេះ។ ការ​កើន​ឡើងនេះ បានប៉ះពាល់ដល់​ប្រព័ន្ធ​សុខភាព​សាធារណៈ ​ដោយ​មន្ទីរពេទ្យ​ខ្វះ​បុគ្គលិក​ ដោយ​សារ​អ្នក​ជំងឺ​ច្រើន​ហួស​ ហើយខ្វះខាត​សម្ភារៈ​ផ្គត់ផ្គង់។

ស្ថានភាព​នេះ​កាន់តែ​អាក្រក់​ឡើង​ពី​មួយ​ថ្ងៃ​ទៅ​មួយ​ថ្ងៃ រហូតមន្ទីរពេទ្យ​បាន​ផ្សាយ​នៅ​ក្នុង​បណ្តាញ​ព័ត៌មាន​សង្គម ​អង្វរ​សុំ​ឲ្យ​រដ្ឋាភិបាល​ផ្តល់​ខ្យល់​អុកស៊ីហ្ស៊ែន​ ហើយ​គំរាមឈប់​ទទួល​យក​អ្នក​ជំងឺ​ថ្មី។

នាយករដ្ឋមន្ត្រី​ឥណ្ឌា​លោក Narendra Modi បាន​កោះប្រជុំ​ជាមួយ​រដ្ឋមន្ត្រី​ពី​បណ្តា​រដ្ឋ​នានា​របស់​ឥណ្ឌា នៅ​ថ្ងៃ​សុក្រ​នេះ​ ដើម្បី​សម្រេច​ថា​តើ​ដោះស្រាយ​តាម​វិធី​ណា​ចំពោះ​ការ​រាតត្បាត​នៃ​ជំងឺ​កូវីដ១៩​នេះ។

ដោយ​បន្ថែម​ករណី​ថ្មី​នៅ​ថ្ងៃ​សុក្រ​នេះ ឥណ្ឌា​បានរក​ឃើញការឆ្លង​សរុប ១៦ ​លាន​ករណី ​ដែលជា​ចំនួនលំដាប់​ទី ២​ បន្ទាប់​ពី​សហរដ្ឋ​អាមេរិក។ ប្រទេសឥណ្ឌា​មាន​ចំនួនប្រជាពលរដ្ឋ​ជិត ​១.៤០០​លាន​នាក់។ ឥណ្ឌា​បាន​កត់​ត្រា​ចំនួន​មនុស្ស​ស្លាប់ ​២.២៦៣ ​នាក់​ នៅ​ក្នុង​រយៈពេល​មួយ​ថ្ងៃ​ចុង​ក្រោយ ដែលធ្វើ​ឱ្យចំនួន​អ្នក​ស្លាប់​ទាំងអស់​កើនដល់ ១៨៦.៩២០នាក់។ នេះ​តាម​ក្រសួង​សុខាភិបាល​ឥណ្ឌា៕

XS
SM
MD
LG