ឥណ្ឌាបានជម្លៀសពលរដ្ឋរបស់ខ្លួនចំនួន៣២៤នាក់ចេញពីទីក្រុងវូហានដែលជាទី កន្លែងនៃការផ្ទុះឡើងនូវមេរោគកូរ៉ូណាដ៏ប្រល័យនៅក្នុងប្រទេសចិន ដែលនៅទីនោះជនជាតិឥណ្ឌា កំពុងសិក្សានៅក្នុងសាកលវិទ្យាល័យនានា។
បន្ទាប់ពីយន្តហោះចុះនៅក្នុងរដ្ឋធានីញូវដែល្លីកាលពីថ្ងៃសៅរ៍ អ្នកដំណើរទាំងនោះ ត្រូវបានគេដឹកយកទៅកាន់ទីកន្លែងដាច់ដោយឡែក២ដែលត្រូវបានបង្កើតឡើងដោយកងទ័ព ដែលពួកគេ នឹងត្រូវស្ថិតនៅក្រោមការសង្កេតមើលរយៈពេល២សប្តាហ៍។
ឥណ្ឌាបានបញ្ជាក់ពីករណីនៃមេរោគកូរ៉ូណាលើកទី១កាលពីថ្ងៃព្រហស្បតិ៍នៅក្នុងរដ្ឋកេរ៉ាឡាភាគខាងត្បូងនៅនិស្សិតម្នាក់ដែលបានត្រឡប់មកពីទីក្រុងវូហាននៃប្រទេសចិន។ ការផ្តោតការយកចិត្តទុកដាក់របស់ឥណ្ឌាដែលមានប្រជាពលរដ្ឋច្រើនលំដាប់ទី២របស់ពិភពលោក ឥឡូវនេះ បានក្លាយជាការត្រៀមខ្លួន។
មនុស្សជាង២០០នាក់ដែលបានមកដល់រដ្ឋធានីញូវដែលីកាលពីថ្ងៃសៅរ៍ជានិស្សិត។និស្សិតឥណ្ឌាជាង២ម៉ឺននាក់ សិក្សាក្នុងប្រទេសចិន ភាគច្រើនរៀននៅមហាវិទ្យាល័យវេជ្ជសាស្រ្ត។
ជើងហោះហើរទី២មានគម្រោងនឹងនាំពលរដ្ឋផ្សេងៗទៀតយ៉ាងច្រើនមកពីក្រុងវូហានហើយនិងតំបន់ក្បែរនោះដែលត្រូវបានបិទដើម្បីរារាំងការរាលដាលនៃមេរោគនោះ។
ពួកអាជ្ញាធរបានពិនិត្យសុខភាពមនុស្សទាំងអស់ដែលបានមកពីប្រទេសចិននិងក្រុងហុងកុងនៅឯចំណតអាកាសយាន្តសំខាន់ៗចំនួន៧របស់ឥណ្ឌាហើយបានអនុវត្តវិធានការដាក់ឲ្យដាច់ដោយឡែកពីគេចំពោះជនណាដែលសង្ស័យមានមេរោគកូរ៉ូ ណា។ មនុស្សប្រហែល៤០នាក់ បានត្រូវដាក់ឲ្យនៅដាច់ដោយឡែកពីគេនៅក្នុងរដ្ឋចំនួន៨។
ពួកអ្នកជំនាញខាងសុខាភិបាលបានបញ្ជាក់ថា ការតាមដានមើល នឹងក្លាយជាការសំខាន់ដើម្បីរារាំងការរាលដាលនៃមេរោគនេះនៅក្នុងទីក្រុងនានាដែលមានមនុស្សដ៏ច្រើនណាន់តាន់តាប់នោះ៕
