ប្រទេសឥណ្ឌានឹងមិនអនុញ្ញាតឲ្យនាំចេញវ៉ាក់សាំងបង្ការជំងឺកូវីដ១៩ របស់ក្រុមហ៊ុនឱសថ AstraZeneca សហការនឹងសាកលវិទ្យាល័យ Oxford ក្នុងរយៈពេលជាច្រើនខែ។ នេះបើតាមការបញ្ជាក់របស់ប្រធានវិទ្យាស្ថាន Serum ឥណ្ឌា កាលពីថ្ងៃអាទិត្យ។ វិទ្យាស្ថាននេះបានចុះកិច្ចសន្យាផលិតវ៉ាក់សាំងចំនួន១ពាន់លានដូស សម្រាប់ប្រទេសកំពុងអភិវឌ្ឍន៍។
ដោយក្រុមប្រទេសអ្នកមានបានបញ្ជាកក់វ៉ាក់សាំងបង្ការជំងឺកូវីដ១៩ភាគច្រើនបំផុត ដែលត្រូវផលិតក្នុងឆ្នាំនេះ ដូច្នេះវិទ្យាស្ថាន Serum របស់ឥណ្ឌា ដែលជាកន្លែងផលិតវ៉ាក់សាំងដ៏ធំបំផុតមួយរបស់ពិភពលោកនោះ ទំនងជាអាចផ្តល់វ៉ាក់សាំងបង្ការភាគច្រើន ដល់ប្រទេសដែលកំពុងអភិវឌ្ឍន៍ជាច្រើន។ ទោះបីជាយ៉ាងណាក្តី ការដាក់បំរាមដល់ការនាំចេញវ៉ាក់សាំងនេះ មានន័យថា ប្រទេសក្រីក្រជាច្រើនរបស់ពិភពលោក នឹងត្រូវរង់ចាំពី២ទៅ៣ខែទៀត ទម្រាំទទួលបានវ៉ាក់សាំងបង្ការជំងឺកូវីដ១៩ ក្នុងដូសទីមួយរបស់ខ្លួន។
វ៉ាក់សាំងនេះបានទទួលការយល់ព្រមឲ្យប្រើប្រាស់ក្នុងគ្រាបន្ទាន់ ដោយនិយ័តករឥណ្ឌា កាលពីថ្ងៃអាទិត្យ ដោយស្ថិតក្រោមលក្ខខណ្ឌថា វិទ្យាស្ថាន Serum របស់ឥណ្ឌា នឹងមិននាំចេញវ៉ាក់សាំងបង្ការនេះទេ រហូតដល់ពលរដ្ឋឥណ្ឌាទាំងឡាយ ដែលងាយនឹងទទួលរងគ្រោះដោយសារជំងឺកូវីដ១៩បានទទួលវ៉ាក់សាំងការពារជាមុនសិន។ នេះបើតាមកិច្ចសម្ភាសន៍តាមទូរស័ព្ទរបស់លោក Adar Poonawalla ប្រធានប្រតិបត្តិនៃវិទ្យាស្ថាន Serum ឥណ្ឌា ជាមួយទីភ្នាក់ងារសារព័ត៌មានAP។
លោកក៏បានបញ្ជាក់ផងដែរថា ក្រុមហ៊ុននេះ ក៏ត្រូវបានហាមប្រាមផងដែរ មិនឲ្យលក់វ៉ាក់សាំងនេះទៅឲ្យទីផ្សារឯកជននោះទេ៕
