អាជ្ញាធរចិនកាលពីថ្ងៃពុធម្សិលមិញ បានបិទខ្ទប់សាកលវិទ្យាល័យដ៏សំខាន់មួយក្នុងរដ្ឋធានីប៉េកាំង ប្រទេសចិន បន្ទាប់ពីបានរកឃើញការឆ្លងជំងឺកូវីដ១៩ មួយករណី ខណៈដែលចិននៅតែអនុវត្តខ្ជាប់ខ្ជួនទៅលើគោលការណ៍«គ្មានជំងឺកូវីដ» (Zero COVID) របស់ខ្លួន បើទោះបីជាមានការថ្នាំងថ្នាក់ពីសាធារណជនចិនយ៉ាងណាក្តី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AP។
និស្សិតសាកលវិទ្យាល័យប៉េកាំងនិងបុគ្គលិកសិក្សា មិនត្រូវបានអនុញ្ញាតឱ្យចាកចេញពីទីតាំងដែលពួកគេកំពុងស្ថិតនៅ លើកលែងតែចាំបាច់។ ហើយថ្នាក់រៀននៅបរិវេណអគារ ដែលជាទីដែលគេរកឃើញករណីឆ្លងជំងឺកូវីដនោះ ត្រូវបានប្តូរទៅរៀនតាមប្រព័ន្ធអនឡាញវិញ រហូតដល់ថ្ងៃសុក្រខាងមុខនេះ។ នេះបើតាមសេចក្តីជូនដំណឹងរបស់សាកលវិទ្យាល័យនេះ។ ទោះជាយ៉ាងនេះក្តី ក៏គេនៅតែឃើញនិស្សិតចេញចូលនៅបរិវេណអគារសិក្សាចម្បង កាលពីថ្ងៃពុធ។
រដ្ឋធានីប៉េកាំង បានរាយការណ៍ពីការរកឃើញអ្នកឆ្លងជំងឺកូវីដ១៩ប្រមាណជាង៣៥០ករណីថ្មីៗ នៅក្នុងរយៈពេល២៤ម៉ោង ដែលជាចំនួនតូចមួយប៉ុណ្ណោះបើប្រៀបនឹងប្រជាជនសរុបក្នុងរដ្ឋធានីប៉េកាំងទាំងមូលចំនួន២១លាននាក់នោះ ប៉ុន្តែនេះជាចំនួនគ្រប់គ្រាន់ដើម្បីនាំឱ្យមានការបិទខ្ទប់និងការធ្វើចត្តាឡីស័ក នៅក្រោមយុទ្ធសាស្ត្រគ្មានជំងឺកូវីដ១៩របស់ចិន។
ក្រុមអាជ្ញាធរចិនចង់បញ្ចៀសនូវការបិទខ្ទប់ដូចក្នុងទីក្រុងសៀងហៃកាលពីពេលកន្លងទៅក្នុងឆ្នាំនេះដែលធ្វើឱ្យមានការជាប់គាំងការដឹកជញ្ជូន និងមានការប្រឆាំងតវ៉ាពីសំណាក់ប្រជាពលរដ្ឋនៅទីនោះផងដែរ។ សេចក្តីណែនាំដែលត្រូវបានកែសម្រួលកាលពីសប្តាហ៍មុន បានអំពាវនាវដល់អាជ្ញាធរមូលដ្ឋាន ឱ្យអនុវត្តគោលការណ៍ដែលមានលក្ខណៈវិទ្យាសាស្ត្រនិងបិទខ្ទប់តែភូមិសាស្ត្រជាក់លាក់ ដើម្បីបញ្ចៀសនូវវិធានការមិនចាំបាច់នានា។
សាកលវិទ្យាល័យក្រុងប៉េកាំង មាននិស្សិតប្រមាណជាង៤ម៉ឺននាក់ ដែលសិក្សានៅក្នុងបរិវេណអគារផ្សេងៗគ្នា ដែលភាគច្រើនស្ថិតនៅក្នុងក្រុងប៉េកាំង។ គេនៅមិនទាន់ដឹងច្បាស់នៅឡើយទេថា តើមាននិស្សិតប៉ុន្មាននាក់ទទួលរងការប៉ះពាល់ដោយសារការបិទខ្ទប់នេះ។
សាកលវិទ្យាល័យប៉េកាំងនេះមានអាយុកាលប្រមាណ១២៤ឆ្នាំមកហើយ និងជាសាកលវិទ្យាល័យល្បីឈ្មោះមួយរបស់ចិន និងក៏ធ្លាប់ជាចំណុចកណ្តាលនៃការផ្ទុះបាតុកម្មប្រឆាំងតវ៉ារបស់និស្សិតចិនកាលពីអតីតកាលកន្លងទៅផងដែរ។ និស្សិតដែលបានរៀនចប់នៅទីនោះ បានក្លាយជាបញ្ញវន្តដឹកនាំ អ្នកនិពន្ធ អ្នកនយោបាយ និងអ្នកធ្វើជំនួញជាដើម៕
