លោកប្រធានាធិបតីអាមេរិក ដូណាល់ ត្រាំ កាលពីថ្ងៃច័ន្ទ បានរំឭកគុណដល់អ្នកស្នេហាជាតិអាមេរិកជំនាន់ថ្មី ដែលលោកនិយាយថា កំពុងតែប្រយុទ្ធដើម្បីយកឈ្នះនៅក្នុងសមរភូមិនៃអំពើភេរវកម្ម។
លោកប្រធានាធិបតី ត្រាំ បានបន្ថែមថា៖ «ពួកគេកំពុងតែប្រថុយប្រថានជីវិតរបស់ខ្លួនដើម្បីការពារពលរដ្ឋរបស់យើងពីសត្រូវដែលប្រើប្រាស់ឃាតកម្មលើអ្នកគ្មានកំហុសដើម្បីបង្កសង្គ្រាមទៅលើមនុស្សជាតិខ្លួនឯង»។
លោកបានថ្លែងយ៉ាងដូច្នេះនៅក្នុងសុន្ទរកថាក្នុងទិវារំឭកគុណូបការៈយុទ្ធជនពលី ដែលហៅថា Memorial Day នៅកន្លែងបញ្ចុះសពយុទ្ធជន National Cemetery នៅទីក្រុង Arlington បន្ទាប់ពីលោកដាក់កម្រងផ្កាដើម្បីរំឭកវិញ្ញាណក្ខន្ធយុទ្ធជនពលីជីវិតជាង៣សែននាក់ ដែលត្រូវបានបញ្ចុះនៅទីនោះ។
គេរំពឹងថា លោក ត្រាំ នឹងប្រកាសអំពីការសម្រេចចិត្តរបស់លោកទៅលើសំណើរបស់ក្រសួងការពារប្រទេសអាមេរិកចំពោះការបង្កើនចំនួនកងកម្លាំងអាមេរិក សម្រាប់ការបន្តសង្គ្រាមនៅក្នុងប្រទេសអាហ្វហ្កានីស្ថាន។
លោក បារ៉ាក់ អូបាម៉ា នៅក្នុងរយៈពេលប៉ុន្មានខែចុងក្រោយដែលលោកនៅកាន់តំណែងជាប្រធានាធិបតីអាមេរិក មិនបានធ្វើសេចក្តីសម្រេចចិត្តទៅលើសំណើរបស់ក្រសួងការពារប្រទេសរបស់អាមេរិកនោះទេ ដោយលោកទុកសេចក្តីសម្រេចចិត្តនេះឲ្យប្រធានាធិបតីថ្មី ដែលនឹងក្លាយជាមេបញ្ជាការកំពូលរបស់អាមេរិក៕
