ភ្ជាប់​ទៅ​គេហទំព័រ​ទាក់ទង

ភាពរាំងស្ងួតនិងទំនប់វារីអគ្គិសនីនាំឲ្យពលរដ្ឋបារម្ភខ្លាចខ្វះត្រីធ្វើប្រហុក


អ្នកស្រី ហា កុំ រស់នៅ​ក្បែរ​ដង​ទន្លេ​មេគង្គ​ក្នុង​ខេត្តស្ទឹងត្រែង​ ហើយ​អ្នកស្រី​ជា​អ្នកលក់​ប្រហុក​ធំ​ជាងគេ​ក្នុង​ខេត្ត​មួយ​នេះ។ (ស៊ុន ណារិន/VOA)

ជា​រៀង​រាល់​ឆ្នាំ​ ប្រជាជន​ ​ជាពិសេស​អ្នករស់​នៅ​ក្នុង​រាជធានីភ្នំពេញ​ មក​ផែ​ទន្លេ​ក្នុង​ខណ្ឌ​ឫស្សី​កែវ​ ចម្ងាយ​​ប្រហែល​៨​គីឡូម៉ែត្រ​ពីរាជ​ធានី​ភ្នំពេញ​​នេះ​ ​ដើម្បី​ទិញ​ និង​លក់​ត្រី​សម្រាប់​ធ្វើ​ប្រហុក។ ​​ត្រី​ធ្វើ​ប្រហុក​បាន​ឡើង​ថ្លៃ​នៅ​ឆ្នាំ​នេះ។​​

ស្លៀកពាក់​អាវ​ក្រឡាការ៉ូ​ ដៃ​វែង​ និង​ខោជើងវែង​ បុរស​ជន​ជាតិ​មូស្លីម​ម្នាក់​នេះ​បាន​ចំណាយ​ពេល​ពី​៤ទៅ​៥​ថ្ងៃ​ក្នុង​មួយ​ខែ​ធ្វើ​ការ​នៅ​កន្លែង​រក​ត្រី​នៅ​ក្នុ​ង​ខណ្ឌ​ឫស្សី​កែវ ​រាជ​ធានី​ភ្នំពេញ។ ​លោក​សុខ ហ្វឺត ​អាយុ​៤៨​ឆ្នាំ​ ជា​អ្នក​កាត់​ក្បាល​ត្រី​ និង​ដក​ខ្លាញ់​ពោះ​ត្រីសម្រាប់​ធ្វើ​ប្រហុក។​

លោក​ហ្វឺត​មាន​ការ​ងារ​ប្រចាំ​ថ្ងៃ​ជា​អ្នក​រត់​ម៉ូតូ​ឌុប​ តែ​លោកមក​ធ្វើ​ត្រី​ក្នុង​រដូវធ្វើប្រហុក។ ​លោកនិយាយ​ថា ​ឆ្នាំ​នេះ​ត្រី​ប្រហុក​មាន​ភាព​ល្អ​ប្រសើរ​ជាង​ឆ្នាំ​មុន។​ លោក​និយាយ​នៅ​កន្លែង​ធ្វើ​ត្រី​ថា៖​

លោក សុខ ហ្វឺត ត្រូវ​បាន​ជួល​ឲ្យ​ធ្វើ​ត្រីប្រហុក​នៅ​ច្រាំងចំរេះ​ក្នុង​ខណ្ឌឬស្សីកែវ រាជធានី​ភ្នំពេញ​នៃ​ប្រទេស​កម្ពុជា។ (ស៊ុន ណារិន/VOA)
លោក សុខ ហ្វឺត ត្រូវ​បាន​ជួល​ឲ្យ​ធ្វើ​ត្រីប្រហុក​នៅ​ច្រាំងចំរេះ​ក្នុង​ខណ្ឌឬស្សីកែវ រាជធានី​ភ្នំពេញ​នៃ​ប្រទេស​កម្ពុជា។ (ស៊ុន ណារិន/VOA)

«ឆ្នាំ​នេះ​ ពួក​គេ​អាច​ចាប់​បាន​ត្រី​ច្រើន​សម្រាប់​ធ្វើ​ប្រហុក​ ប៉ុន្តែ​ចំនួន​ត្រី​វា​ខុស​គ្នា​ ពី​មួយ​ថ្ងៃ​ទៅ​មួយ​ថ្ងៃ​ ដោយ​សារ​កម្រិត​ទឹក»។​

នៅ​រដូវ​ធ្វើប្រហុកឆ្នាំ​នេះ​ ​ លោក​ហ្វឺត​អាច​រក​ប្រាក់​ចំណូល​បាន​ពី​១៥​ទៅ​២០​ម៉ឺន​រៀល​ក្នុង​មួយ​ថ្ងៃ។​

អ្នក​នេសាទ​ចាប់ត្រី​ប្រហុកក្នុង​បឹង​ទន្លេសាប​នៅរដូវ​នេសាទ​ ជា​ធម្មតា ​រយៈពេលបីខែ​ក្នុង​មួយ​ឆ្នាំ ​ចាប់​ពី​ខែ​ធ្នូ​ដល់​ខែ​កុម្ភៈ។ ​ក្រសួង​កសិកម្ម​ រុក្ខា​ប្រមាញ់​ ​និង​នេសាទ​បាន​ប្រកាស​ថា​ នៅ​ថ្ងៃ​ទី​៨ ​ខែ​កុម្ភៈ​ ជា​ពេល​បញ្ចប់​រដូវប្រមូល​ត្រី​ប្រហុក​សម្រាប់​ឆ្នាំ​២០១៧​នេះ។​ នៅ​រដូវ​ធ្វើ​ត្រី​ប្រហុក​ ​ប្រភេទ​ត្រី​រៀល​ ត្រីលេញ ហើយ​នឹងត្រី​ផ្សេងៗ​ទៀត​រាប់​ពាន់​ម៉ឺន​ក្បាល ​ត្រូវ​បាន​នេសាទ​សម្រាប់​ធ្វើ​ប្រហុក។​

ជា​រៀង​រាល់​ឆ្នាំ​ ប្រជាជន​ ​ជាពិសេស​អ្នករស់​នៅ​ក្នុង​រាជធានីភ្នំពេញ​ មក​ផែ​ទន្លេ​ក្នុង​ខណ្ឌ​ឫស្សី​កែវ​ ចម្ងាយប្រហែល​៨​គីឡូម៉ែត្រ​ពីរាជ​ធានី​ភ្នំពេញនេះ​ ​ដើម្បី​ទិញ​ និង​លក់​ត្រី​សម្រាប់​ធ្វើ​ប្រហុក។ ត្រី​ធ្វើ​ប្រហុក​បាន​ឡើង​ថ្លៃ​នៅ​ឆ្នាំ​នេះ។

លោក​ហ្វឺត​បាន​ប្រាប់​ VOA​ កាល​ពី​ចុង​ខែ​មករា​ថា​ ដោយ​សារ​មនុស្ស​ជា​ច្រើន​បាន​មក​រក​ទិញ​ត្រី​ប្រហុក​ ​ទើប​ធ្វើ​ឲ្យ​ត្រី​ប្រហុកឡើង​ថ្លៃ។​ លោក​មាន​ប្រសាសន៍​ថា៖​

«គេ​អត់​សូវ​ចុះ​មក​ធ្វើ​កាល​ពី​ឆ្នាំ​មុន​ ដល់ឆ្នាំ​នេះ​គេ​ចុះ​មក​ធ្វើ​ច្រើន​ ផ្អើល​មនុស្ស​មក​ធ្វើ​ច្រើន​ ​ ត្រី​ឡើង​ថ្លៃ»។​

អ្នកស្រីខ្ចឹង សីហា ​អាយុ​២៨​ឆ្នាំ ​ដែល​ជា​អ្នក​លក់​ត្រី​នៅ​កន្លែង​ទិញ​ត្រី​ធ្វើប្រហុក ​បាន​និយាយ​ថា​ ត្រី​ឆ្នាំ​នេះ​មាន​ច្រើនជាង​ឆ្នាំ​មុន ​ប៉ុន្តែ​តម្លៃ​ខ្ពស់​ជាង​ ឆ្នាំ​មុនៗ។​ ​អ្នកស្រី​លក់​បាន​តម្លៃ​៣៥០០​រៀលសម្រាប់​ត្រី​ធ្វើ​រួច។​ អ្នកស្រីនិយាយ​ថា៖​

«ក្នុង​មួយ​ថ្ងៃ​ យើង​ទិញ​ត្រី​ ពេល​ខ្លះ​ទិញមួយ​តោន។ ពេល​ខ្លះ​ទៅ​ ​ត្រី​ត្រូវ​ទិញ​១​តោន​កន្លះ​ទៅ​២​តោន»។​

អ្នកស្រីបញ្ជាក់​បន្ថែម​ថា​ អ្នក​រក​ត្រី​និយាយ​ថា​ ឆ្នាំ​នេះមានត្រីច្រើនជាង​ឆ្នាំ​មុន ​ព្រោះ​កម្ពស់​ទឹកឆ្នាំ​នេះឡើង​ច្រើន​ជាងឆ្នាំ​ទៅ។ ​អ្នកស្រី​សន្និដ្ឋានថា​ ​បរិមាណ​ត្រី មាន​ច្រើន ​ឬតិច​ទាក់ទង​នឹងកម្ពស់​ទឹក​ ​ ហើយ​ថា ​ទំនប់​វារី​អគ្គិសនី​អាច​ជា​មូលហេតុ​ចម្បង។​

អ្នកស្រី សាន សន និង​ស្វាមី រស់នៅ​ក្បែរ​ដងទន្លេ​សេសាន ក្នុង​ភូមិ​ភ្លុក ស្រុក​សេសាន ខេត្តស្ទឹងត្រែង​នៃ​ប្រទេស​កម្ពុជា។ ពួកគាត់​រៀបចំ​ទៅ​នេសាទ​ត្រី​នៅ​ម៉ោង​ប្រមាណ​៣​រសៀល។ (ស៊ុន ណារិន/VOA)
អ្នកស្រី សាន សន និង​ស្វាមី រស់នៅ​ក្បែរ​ដងទន្លេ​សេសាន ក្នុង​ភូមិ​ភ្លុក ស្រុក​សេសាន ខេត្តស្ទឹងត្រែង​នៃ​ប្រទេស​កម្ពុជា។ ពួកគាត់​រៀបចំ​ទៅ​នេសាទ​ត្រី​នៅ​ម៉ោង​ប្រមាណ​៣​រសៀល។ (ស៊ុន ណារិន/VOA)

ប្រហុក​ជា​គ្រឿង​សំខាន់​សម្រាប់​ធ្វើ​ម្ហូប​របស់​ប្រជាជន​ខ្មែរ​ ហើយប្រជា​កសិករ​ចាត់​ទុក​ជា​ប្រហុក​ប្រភព​ប្រូតេអ៊ីនប្រចាំ​ថ្ងៃ។​ ប្រជាជន​រស់​នៅ​តាម​ដង​ទន្លេ​តែង​តែ​រក​ត្រី​ធ្វើប្រហុក​ ជា​រៀង​រាល់​ឆ្នាំ ​ដើម្បី​ទុក​ធ្វើ​ម្ហូប​ពេញ​មួយ​ឆ្នាំ។​ កាល​ពី​ឆ្នាំ​មុន​ បរិមាណ​ត្រី​ប្រហុក​បាន​ធ្លាក់​ចុះ​ ដោយ​សារ​បញ្ហា​រាំង​ស្ងួត ហើយ​ទឹក​មាន​ម្រិត​ទាប។​

អ្នកស្រី សូ អៃសាស់ ដែលជា​ស្រ្តី​ខ្មែរឥស្លាម អាយុ​៣៧​ឆ្នាំ​ ​ទទូរ​ក្រណាត់​ ​ នៅ​ពេល​អ្នកស្រីរៀប​រាប់​ថា​ កាល​ពី​ឆ្នាំ​ទៅ ​អ្នកស្រី​មិន​អាច​ធ្វើ​ប្រហុក​បាន​ទេ​ ប៉ុន្តែ​ឆ្នាំ​នេះ អ្នកស្រី​ធ្វើ​ប្រហុក​ពី​៣០​ទៅ​៤០​គីឡូ​ក្រាមទុក​ ​សម្រាប់ធ្វើម្ហូបក្នុង​គ្រួសារ។​ ពេល​កំពុង​អង្គុយ​ធ្វើ​ត្រី​នៅ​ផ្ទះ​របស់អ្នកស្រី​ក្បែរ​បឹង​ទន្លេ​សាប អ្នកស្រីនិយាយ​ថា៖​

«ឆ្នាំ​មុន​អត់ ​បើ​ត្រី​ប៉ុនៗ​ចង្កឹះ​អីចឹង​ វាយ​ទៅ​ ​វា​ជ្រុះ​អស់​បាត់»។​

អ្នកស្រី​ក៏បាន​ប្រាប់​ VOA​ ឲ្យដឹង​ដែរ​ថា​ អ្នកស្រីមាន​ការប្រុង​ប្រយ័ត្នក្នុងការ​ទិញ​ប្រហុកនៅ​តាម​ផ្សារ​ ដោយ​សារវា​អាច​មាន​ជាតិ​គីមី​ច្រើន។​

ដោយ​សារ​ឆ្នាំ​នេះ​ទឹក​ធំ​ ​ ​ទិន្នផល​នេសាទមាន​ការ​កើន​ឡើង។ ​ក្រសួង​កសិកម្ម​បាន​ប្រកាស​ថា​ ត្រី​នៅ​ទន្លេ​សាប​ឆ្នាំ​នេះមាន​ការ​កើន​ឡើង ​ដោយ​សារ​ភាព​ល្អ​ប្រសើរ​នៃ​កម្រិត​កម្ពស់​ទឹក​ និង​ការ​ចុះ​បង្រ្កាប​យ៉ាង​សកម្ម និង​ជា​បន្ត​បន្ទាប់​ ប្រឆាំងបទ​ល្មើស​នេសាទ។​

ថ្មីៗ​នេះ​ រដ្ឋាភិបាល​បាន​បង្កើន​កម្លាំង​បេសក​កម្ម​ចុះ​បង្រ្កាប​បទ​ល្មើស​នេសាទ​ខុស​ច្បាប់។​ បេសក​កម្ម​នេះ​រួម​មាន​ការជិះ​ឧទ្ធម្ភាគ​ចក្រ​ និង​ទូក​ល្បឿន​លឿន​ដើម្បី​ពិនិត្យ​មើល​បទ​ល្មើស​នេសាទ​នៅ​ទន្លេ​សាប។

លោក ណៅ ធួក ​ ប្រធាន​នាយក​ដ្ឋាន​រដ្ឋបាល​ជល​ ​បាន​មាន​ប្រសាសន៍​ថា​ដោយសារ​ឆ្នាំ​នេះ​ទឹក​មាន​ភាព​ល្អ​ប្រសើរ​ច្រើន​ គួប​ផ្សំ​ជាមួយ​ការ​ចុះ​បង្រ្កាប​យ៉ាង​ក្តៅ​គគុកប្រឆាំងបទ​ល្មើស​នេសាទ​ផង​នោះ ​ហេតុនេះ​ហើយ​បាន​ជាផល​នេសាទត្រី​សម្រាប់​ធ្វើ​ប្រហុក​មាន​ការ​កើន​ឡើង។​ លោក​មាន​ប្រសាសន៍​ថា៖​

«ឆ្នាំនេះ​កម្រិត​ទឹក​ខ្ពស់​ជាង​ឆ្នាំ​មុន ​គឺ​កើន​ឡើង​ទៅ​ដល់​៦​ពាន់​លាន​ម៉ែត្រ​គូប​ច្រើន​ជាង​ឆ្នាំមុន​ នៅ​ក្នុង​បឹង​ទន្លេ​សាប។ ​វា​ល្អ​សម្រាប់​ត្រី​ពង…»។​

ទាក់​ទង​នឹង​ការ​កើន​ឡើង​តម្លៃ​ត្រី​ប្រហុក​ ​ លោក​បាន​បកស្រាយ​ថា ​គឺ​ដោយ​សារ​ឈ្មួញ​កណ្តាល​ដំឡើងថ្លៃ។ ​ទោះ​ជាយ៉ាង​ណា​ លោក​ថ្លែង​ថា ​រដ្ឋាភិបាល​បាន​ព្យាយាម​ធ្វើ​ឲ្យ​តម្លៃ​នេះ​ធ្លាក់​ចុះ​វិញ។ ​លោក​បញ្ជាក់​ថា៖

«នៅ​ពេល​មាន​មនុស្ស​ច្រើន​មក​ទិញ​ត្រី​ តម្លៃ​កើន​ឡើង​បន្តិច។​ ប៉ុន្តែ​យើង​ជួយ​អន្តរាគមន៍​ឲ្យ​តម្លៃ​ចុះ​ដែរ»។​

ក្រសួង​កសិកម្ម​រំពឹង​ថា ​បរិមាណ​ត្រី​ប្រហុកនឹង​មាន​ទៅ​ដល់​ប្រមាណ​១៣០០០​តោន​នៅឆ្នាំ​២០១៧​នេះ ​គឺ​មាន​ការ​កើន​ឡើង​ប្រមាណ​៥០០​តោន​ បើ​ប្រៀប​ធៀប​នឹង​ឆ្នាំមុន។​ ផល​នេសាទ​ត្រី​នៅ​ទូទាំង​ប្រទេស​អាច​ឡើង​ទៅ​ដល់​៨០០.០០០​តោន​ រួម​មាន​ត្រី​បាន​ពី​ការ​ធ្វើ​វារី​វប្បកម្ម​ និង​ការ​ចាប់​ពី​ផែ​ត្រី​ និង​វាល​ស្រែ​ជាដើម។​ នេះ​បើ​យោង​តាម​លោក​ណៅ ធួក។​

លោក​បង្ហាញ​ក្តី​បារម្ភ​ពី​ភាព​រាំង​ស្ងួត​នៅ​ឆ្នាំ​នេះ ​តែ​លោក​សង្ឃឹម​ថា ភាព​រាំង​ស្ងួត​នៅឆ្នាំ​នេះនឹង​មិន​អាក្រក់​ដូចឆ្នាំមុន​នោះ​ទេ។​ លោក​មាន​ប្រសាសន៍​ថា៖​

«បម្រែ​បម្រួល​អាកាស​ធាតុ​ពិត​ជា​ប៉ះពាល់​ផល​នេសាទ​ ដោយ​សារ​តែ​ភាព​រាំង​ស្ងួត ​ដែល​នាំ​ឲ្យ​មាន​កង្វះ​ទឹក ​និង​ត្រីងាប់...»។​

បើ​ក្រឡេក​មើល​ពីបញ្ហា​ធ្វើ​ទំនប់​វារី​អគ្គិសនី​វិញ​ ​ប្រជាជន​មួយ​ចំនួន​ដែល​រស់​នៅ​ស្រុក​សេសាន​ ​ខេត្តស្ទឹងត្រែង ​ដែល​រង​ឥទ្ធិពល​ពីការធ្វើ​ទំនប់​វារី​អគ្គិសនី​សេសាននេះ ​យល់​ឃើញ​ថា ​ផល​នេសាទ​ត្រី​មាន​ការ​ធ្លា​ក់​ចុះ​ជា​បន្ត​បន្ទាប់ ​ដោយ​ពួក​គេ​យល់​ថា ​ដោយ​សារ​ការ​សាងសង់​ទំនប់​វារី​អគ្គិសនី ​ដែល​គ្រោង​នឹងបើក​ឲ្យ​ប្រើ​ប្រាស់​នៅ​ឆ្នាំ​២០១៧​នេះ។​

អ្នក​ស្រី​ សាន សន ​អាយុ​៥៥​ឆ្នាំ​ រស់​នៅ​ក្បែរ​ទន្លេ​សេសាន​ ក្នុង​ភូមិ​ភ្លុក​នៃ​ស្រុក​សេសាន ​បាន​ត្អូញត្អែរ​អំពីកង្វះ​ត្រី ​ដោយសារ​ការ​ស្ថាបនា​ទំនប់​វារី​អគ្គិសនី។​ អ្នក​ស្រី​មាន​ប្រសាសន៍​ថា៖​

«ត្រី​តិច​ណាស់ ​ចាប់​មិន​បាន​មួយ​គីឡូក្រាម​ផង... ​បាន​ម៉ា​ស្ល។ ​ពី​មុន​រក​បាន​ច្រើន»។​

អ្នក​ភូមិ​ម្នាក់​ទៀត​ លោក​សិដ្ឋ សុខា ​អាយុ​៥១​ឆ្នាំ ​រស់នៅ​ភូមិ​បាដឺម​ ស្រុក​សេសាន​ ​បាន​និយាយ​ថា​ លោក​កម្រ​ចុះ​ទៅ​នេសាទត្រី​ណាស់​ ឥឡូវ​នេះ។ ​លោក​បាន​បន្ទោស​ថា​ គឺ​ការ​ធ្វើ​ទំនប់​វារី​អគ្គិសនីនេះ​ហើយ​ដែល​ធ្វើ​ឲ្យ​បរិមាណ​ត្រី​ធ្លាក់​ចុះ។ ​លោក​និយាយ​ថា៖​

«បង្កើត​ទំនប់​វារី​អគ្គិសនី​ហ្នឹង​មក ​បាន​ត្រី​វា​ចុះ​ថយ»។​

ទោះ​ជាយ៉ាង​ អ្នក​ស្រី​ ហា​ កុំ ​អាយុ​៦៥​ឆ្នាំ​ ដែល​រស់នៅ​តាម​ដង​ទន្លេ​មេ​គង្គ​ក្នុង​ខេត្ត​ស្ទឹងត្រែង​ ហើយ​ជា​អ្នក​រក​ត្រី​ និង​លក់​ប្រហុក​ធំ​ជាង​គេ​ក្នុង​ខេត្តនេះ បាន​ឲ្យ​ដឹង​ថា​ រដូវ​នេសាទ​ត្រី​សម្រាប់​លក់​ និង​ធ្វើ​ប្រហុក​នៅ​ក្នុង​ទន្លេមេ​គង្គ​ ក្នុង​ខេត្ត​ស្ទឹងត្រែង​គឺ​ខុស​ពី​ទន្លេសាប​ ​មាន​ន័យ​ថា ការ​នេសាទ​ធ្វើ​ប្រហុក​ក្នុង​ខេត្ត​ស្ទឹងត្រែង ​អាច​ធ្វើ​ឡើង​នៅ​ក្នុង​ខែ​កុម្ភៈ​ ឬ​មីនា​ និង​មួយ​រដូវ​ទៀត​នៅ​ក្នុង​ខែ​ឧសភា​ ក្រោយ​ចូល​ឆ្នាំ​ប្រពៃណី​ខ្មែរ។​

​អ្នកស្រី​បន្ត​ថា ​គេនៅ​តែ​ឆ្ងល់​ថា តើ​បរិមាណត្រី​ធ្លាក់​ចុះ​ ដោយ​សារ​ទំនប់​នេះ​ ឬ​យ៉ាងណា។ ​អ្នក​ស្រី​មាន​ប្រសាសន៍ថា៖​

«វា​(ទំនប់)​អត់​ទាន់​កើត!​ ​បើ​វា​កើត​ហើយ​ទៅ នោះ​យើង​ដឹង។​ បើ​គេ​ធ្វើ​ទំនប់​វារី​អគ្គិ​សនី​ហ្នឹង​ទៅ​ ​ហើយ​ពី​មុន​មក​យើង​រក​ត្រី​បាន​១​តោន​ក្នុង​មួយ​រដូវ​ មួយ​ខែ​ និង​ ដល់​ពេល​ឥឡូវ​វា​បាន​តែពីរ​បីគីឡូក្រាម ​ឧបមា​អីចឹង​ចុះ»។​

លោក​ណៅ ធួក​បាន​និយាយ​ថា​ តាម​ការ​សិក្សា​ ​ទំនប់​វារីអគ្គិសនី​នៅ​ក្នុង​ខេត្ត​ស្ទឹងត្រែង​អាច​ប៉ះ​ពាល់ត្រី​ជាង​២០​ភាគរយ។​ លោក​និយាយ​ថា៖​

«យើងថ្លឹង​ថ្លែង​ថា​ ​វា​ប៉ះ​ពាល់​តូច​ ឬ​ធំ។​ យើង​បាន​សិក្សាហើយ។ ​ការ​ប៉ះពាល់​វា​មាន​ខ្លះ ​ហើយយើង​រក​វិធី​សាស្រ្តក្នុង​ការ ​Mitigate ​ក្នុង​ការ​ដោះ​ស្រាយទប់​ទល់​នឹង​វា»។

កាល​ពីឆ្នាំ​២០០៥​ លោក​នាយក​រដ្ឋមន្រ្តី​ ហ៊ុន សែនបាន​និយាយ​ថា​ ទំនប់​វារី​អគ្គិសនី​សេសាន​ក្រោម​២​នេះ​មិន​មាន​បញ្ហា​សម្រាប់​ប្រជាជន​នោះ​ទេ។​

ទោះ​ជា​យ៉ាង​ណា ​លោក ​ឱម សាវ៉ាត​ នាយក​ប្រតិបត្តិ​អង្គការ​សម្ព័ន្ធ​ភាព​ដើម្បី​អភិរក្ស​ធនធានជលផល​ បាន​លើក​ឡើង​ពី​ការ​ព្រួយ​បារម្ភ​ទាក់ទង​នឹងឥទ្ធិពលរបស់​ទំនប់​វារី​អគ្គិសនី​លើ​បរិមាណ​ត្រី។ ​លោក​មាន​ប្រសាសន៍​ថា៖​

«អីចឹងបាន​ថា ​អា​នេះ​ជា​ការ​គំរាម​កំហែង​សំខាន់​មួយ​ទាក់​ទង​នឹង​ខេត្ត​ស្ទឹងត្រែង ​ដែល​ទំនប់​ទាំង​ពីរ​ហ្នឹង​ចាប់​ផ្តើម​ដំណើរ​ការ​ (ទំនប់​សេ​សាន​ក្រោម​២ ​និង​ទំនប់​ដនសាហុងនៅ​ប្រទេស​ឡាវ)​ កំពុង​សា​ង​សង់»។​

បន្ថែម​ពី​ការ​បរិភោគ​ប្រហុក​នៅក្នុង​ស្រុក​ ​កម្ពុជា​ក៏​នាំ​ចេញ​ប្រហុក​ទៅ​ក្រៅ​ប្រទេស​ផង​ដែរ​ ជា​ពិសេសទៅ​ប្រទេស​ថៃ។ ​ទោះ​ជា​យ៉ាង​ណា ​លោក​ណៅ ធួក​បាន​និយាយ​ថា​ ការ​ពិនិត្យ​គុណភាព​នៅ​មិន​ទាន់​គ្រប់​គ្រាន់​តាម​ស្តង់ដារ​ទីផ្សារ​អន្តរ​ជាតិ​នោះ​ទេ។​ ​លោក​បន្ថែមថា៖​

«យើង​អត់​ទាន់​មាន​រោង​ចក្រ​កែ​ច្នៃ​ឲ្យ​បាន​ត្រឹម​ត្រូវ។ ​យើង​នាំ​ទៅ​ប្រទេស​ថៃ​សព្វ​ថ្ងៃ​ គេ​ហៅ​ថា ​ពាក់​កណ្តាល​ហើយ។​ គេ​ត្រូវ​យក​ទៅ​កែ​ម្តង​ទៀត​ ទើប​អាច​យក​ទៅ​ប្រើ​ប្រាស់​បាន។ ​យើង​មិន​អាច​នាំ​ចេញ​បាន​ទេ ព្រោះ​យើង​មិន​ទាន់​មាន​ការ​ពិនិត្យគុណ​ភាពត្រឹម​ត្រូវ»៕​

XS
SM
MD
LG