«ខ្ញុំមិនកុហកទេ» គឺជាការឆ្លើយតបរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ នៅឯសន្និសីទកាសែតនាសេតវិមានកាលពីថ្ងៃព្រហស្បតិ៍ម្សិលមិញបន្ទាប់ពីអ្នកយកព័ត៌មានម្នាក់បានសួរលោកថា «ហេតុអ្វីបានជាលោកភូតកុហកពលរដ្ឋអាមេរិកាំង?»។
សំណួរនេះត្រូវបានចោទសួរដោយលោក Jon Karl អ្នកយកព័ត៌មានរបស់ទូរទស្សន៍ ABC ប្រចាំសេតវិមានបន្ទាប់ពីខ្សែអាត់ថតសំឡេងមួយត្រូវបានចេញផ្សាយដោយលោក Bob Woodward ដែលជាអ្នកកាសែតនិងអ្នកនិពន្ធ។ នៅក្នុងខ្សែអាត់សំឡេងនោះ លោកប្រធានាធិបតី ត្រាំ បានទទួលស្គាល់នៅដើមឆ្នាំនេះថា លោកចង់បន្ធូបន្ថយការគំរាមកំហែងពីវីរុសកូរ៉ូណា។
លោកប្រធានាធិបតី ត្រាំ បានឆ្លើយកាលពីថ្ងៃព្រហស្បតិ៍ម្សិលមិញដើម្បីបង្ហាញអំពីមូលហេតុដែលនាំឲ្យលោកបំភ័ន្តមតិជាតិដោយចេតនាអំពីគ្រោះថ្នាក់ដ៏ធ្ងន់ធ្ងរនៃជំងឺកូវីដ១៩ ដោយលោកនិយាយ «ខ្ញុំមិនចង់ហក់ចុះហក់ឡើងហើយស្រែកថា ស្លាប់! ស្លាប់! នោះទេ»។
លោកប្រធានាធិបតី ត្រាំ ក៏បានស្វះស្វែងធ្វើឲ្យស្ងប់ដល់ការរិះគន់អំពីកិច្ចសម្ភាសន៍ចំនួន១៨ដែលលោកបានធ្វើជាមួយលោក Woodward ដែលបានលេចចេញនៅក្នុងសៀវភៅរបស់លោកដែលមានចំណងជើងថា « Rage»ឬ«កំហឹង»។
លោកប្រធានាធិបតី ត្រាំ បាននិយាយថា ប្រសិនបើលោក Woodward គិតថាអត្ថាធិប្បាយរបស់លោកអំពីវីរុសកូរ៉ូណា ជាការអាក្រក់ខ្លាំង លោក Woodward គួរប្រាប់សាធារណជនឲ្យដឹងភ្លាមៗ ជាជាងរង់ចាំជាច្រើនខែដើម្បីបញ្ចេញខ្សែអាត់ថតសំឡេងនោះ។
បេក្ខជនប្រធានាធិបតីគណបក្សប្រជាធិបតេយ្យ លោក Joe Biden បានថ្លែងកាលពីថ្ងៃព្រហស្សតិ៍ថា លោក ត្រាំ ភូតកុហកសាធារណជនអាមេរិកាំងដោយចេតនា អំពីគ្រោះថ្នាក់នៃវីរ៉ុសនេះអស់ពេលរាប់ខែ ហើយថាលោក ត្រាំ បរាជ័យក្នុងការបំពេញការងាររបស់លោកដោយចេតនា៕
