លោកនាយករដ្ឋមន្ត្រី ហ៊ុន សែន នៅថ្ងៃអង្គារនេះផ្តល់ការបកស្រាយអំពីអន្តរាគមន៍របស់លោកក្នុងការផ្តល់សេវាផ្លូវច្បាប់ដល់និស្សិតស្ត្រីមួយរូបដែលលោកថា បានរងការបំពានពីអ្នកមានទ្រព្យស្តុកស្តម្ភម្នាក់តាមរយៈការចោទប្រកាន់ ទាក់ទងនឹងការប្រើអំពើហិង្សាដែលបានកើតឡើងកាលពីឆ្នាំមុន។
បុគ្គលដែលលោកនាយករដ្ឋមន្ត្រីថា បានបង្កអំពើអយុត្តិធម៌លើស្ត្រីរូបនោះ ត្រូវគេស្គាល់ថា ជាលោកឧកញ៉ាហេង សៀដែលជាអគ្គនាយកក្រុមហ៊ុនដឹកជញ្ជូននិងនាំចេញនាំចូលគ្រឿងសំណង់ ហេង ស្រេងហុង និងក្រុមហ៊ុនលក់កញ្ចក់ Cambopura Glass។ លោកឧកញ៉ារូបនោះត្រូវប្រព័ន្ធផ្សព្វផ្សាយរាយការណ៍កាលពីឆ្នាំ២០២១ថា មានទំនាក់ទំនងស្នេហាជាមួយពិធីការិនីស្ថានីយទូរទស្សន៍ MyTV។
នៅក្នុងពិធីផ្តល់រង្វាន់លើកទឹកចិត្តដល់សិស្សដែលទទួលបាននិទ្ទេស A ចំនួនជាង១៧០០នាក់ ពីការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប កាលពីឆ្នាំ២០២១ដែលធ្វើឡើងក្នុងទីក្រុងភ្នំពេញកាលពីព្រឹកថ្ងៃអង្គារ លោកនាយករដ្ឋមន្ត្រី ហ៊ុន សែន បានប្រាប់ក្រុមមន្ត្រីរដ្ឋាភិបាលថា លោកមិនអាចមើលរំលងអំពើដែលលោកចាត់ទុកថាជាទង្វើ «តិរច្ឆាន»បង្កឡើងដោយមនុស្សវ័យចំណាស់មកលើក្មេងស្រីនោះទេ។
បើតាមលោក ហ៊ុន សែន និស្សិតស្រីរូបនោះ ត្រូវបានអាជ្ញាធរចាប់ឃុំខ្លួន ក្រោយរងការចោទប្រកាន់ថា បានបង្កហិង្សាលើលោកឧកញ៉ា ហេង សៀ។ នៅក្នុងរឿងនេះ លោក ហ៊ុន សែនអះអាងថា មានឧកញ៉ា៤ទៅ៥នាក់បានចូលធ្វើអន្តរាគមន៍។ លោកនាយករដ្ឋមន្ត្រីថ្លែងថា៖
«បញ្ហាវាស្ថិតនៅត្រង់អំពើអយុត្តិធម៌។ ស្ត្រី…ក្មេងស្រីជានិស្សិតនេះ កំពុងជាប់នៅក្នុងមន្ទីរឃុំឃាំង ក្រោមអន្តរាគមន៍របស់ឧកញ៉ាបួន ប្រាំនាក់ឯណោះ ….ជាប់នៅក្នុងមន្ទីរឃុំឃាំងតើ! ក្មេងស្រីនេះកំពុងជាប់នៅក្នុងមន្ទីរឃុំឃាំង។ តើឱ្យខ្ញុំនៅស្ងៀមទេ រឿងនេះ? ខ្ញុំមិនមែនតិរច្ឆានទេ។ បើអ្នកជាតិរច្ឆាន សូមអ្នកធ្វើតិរច្ឆានខ្លួនអ្នកចុះ។ ប៉ុន្តែក្នុងឋានៈជានាយករដ្ឋមន្ត្រីខ្ញុំត្រូវតែមានការទទួលខុសត្រូវដើម្បីយុត្តិធម៌សម្រាប់ពលរដ្ឋរបស់ខ្លួនដែលត្រូវគេបំពាន»។
លោកនាយករដ្ឋមន្ត្រីបន្តថា ក្នុងរឿងដដែលនេះ កូនប្រសាររបស់លោកឧកញ៉ា ហេង សៀព្យាយាមទិញទឹកចិត្តក្រុមមេធាវីរបស់លោក។ ប៉ុន្តែដោយសារការរាយការណ៍របស់ក្រុមមេធាវី និងការតាមដានសារឆ្លើយឆ្លងអេឡិចត្រូនិកជាបន្តបន្ទាប់នោះ លោកបានស្នើឱ្យមានការធានានិស្សិតស្ត្រីរូបនោះ បានស្ថិតនៅក្រៅឃុំ។ លោក ហ៊ុន សែន រំឭកឡើងវិញផងដែរថា ស្ត្រីវ័យក្មេងរូបនោះ ក៏រងការរំលោភបំពានដោយសារការកាត់តរូបភាពអាសអាភាស។ លោកថ្លែងថា៖
«បន្ទាប់ទៅកូនប្រសាររបស់ឧកញ៉ានេះទៅទិញរហូតដល់មេធាវីរបស់ខ្ញុំទៅទៀត! មេធាវីរបស់ខ្ញុំរាយការណ៍ឱ្យ មេធាវី… ប្រធានក្រុមមេធាវីរបស់ខ្ញុំ ដោយលើកឡើងថា នាយករដ្ឋមន្ត្រីនៅខាងឧកញ៉ាហើយ! សារសំឡេងឆ្លើយឆ្លងទាំងប៉ុន្មាន គេបាញ់ forward ចូលគ្នាទៅវិញទៅមក។ ទីចុងបំផុតបានយើងបញ្ជាក់បានថា ខ្ញុំត្រូវឱ្យមេធាវីរបស់ខ្ញុំ… ក្រុមមេធាវីសម្តេចតេជោ ទៅធ្វើការធានា ឱ្យនិស្សិតជានារីនោះមកនៅក្រៅឃុំ បន្ទាប់ទៅ ដោយមានការរៀបចំបំបិទមាត់អ្នកសារព័ត៌មានទាំងអស់»។
លោកបន្ថែមថា៖ «ខ្ញុំបានបញ្ជាឱ្យនាំខ្លួនកូនប្រសាររបស់ឧកញ៉ាហ្នឹង...នៅក្នុងទូរស័ព្ទរបស់កូនប្រសារនោះ ពោរពេញទៅដោយរូបភាពកាត់ត អាសអាភាស យកស្ត្រីនេះ ដាក់រូបភាពអាសអាភាសលើគ្រែជាមួយនឹងឧកញ៉ា…ជារូបភាពកាត់តទាំងអស់។ អ៊ីចឹង តើខ្ញុំអង្គុយមើលសុខចិត្តឱ្យ…. បើខ្ញុំមិនធ្វើអន្តរាគមន៍ ពេលនេះម៉ោងនេះ ចៅស្រីនោះ កំពុងស្ថិតនៅក្នុងគុកនៅឡើយទេ។ សូមកុំច្រឡំ! ឧកញ៉ាប្រាំរូបបានចូលរួមព្រឹត្តិការណ៍នេះ»។
កាលពីអំឡុងខែឧសភា ឆ្នាំ២០២១ លោក ហេង សៀ ត្រូវបានបណ្តាញព័ត៌មានក្នុងស្រុករាយការណ៍អំពីទំនាក់ទំនងស្នេហាលួចលាក់របស់លោក ជាមួយពិធីការិនីរបស់ស្ថានីយទូរទស្សន៍ MyTV គឺកញ្ញា មាន ពេជ្ររីតា និងទំនាស់បង្ករបួសស្នាមក្នុងរថយន្តមួយដ៏ចម្រូងចម្រាស។
ប៉ុន្តែពិធីការិនីរូបនោះបានច្រានចោលការចោទប្រកាន់ទំនាក់ទំនងស្នេហាដែលនាងថា «មានអាយុដូចជាចៅនិងជីតា» បើទោះបីជាលោក ហេង សៀ បានចេញលិខិតបំភ្លឺដល់សាធារណជនថា លោកមានលួចលាក់ស្នេហាជាមួយនាង មាន ពេជ្ររីតា។ លោក ហេង សៀ បានពណ៌នាថា រឿងរ៉ាវប្តឹងផ្តល់គ្នាធ្វើឱ្យលោកសោកស្តាយបំផុត។
បើតាមលិខិតរបស់លោក ហេង សៀ កន្លងមកនោះ ជម្លោះកើតឡើងដោយសារនាង រីតា ទាមទារប្រាក់សុំផ្តាច់ចំណងស្នេហាច្រើនហួសប្រមាណ ប៉ុន្តែលោកមិនបានបញ្ជាក់ចំនួននោះទេ។
ដំណាលគ្នានឹងពេលមានទំនាស់នោះ កញ្ញា មាន ពេជ្ររីតា ដែលក្នុងអំឡុងឆ្នាំ២០២១ មានអាយុ២០ឆ្នាំនោះ ត្រូវបានចៅក្រមស៊ើបសួរ លោក កូយ សៅ ចោទប្រកាន់ពីបទលួចមានស្ថានទម្ងន់ទោសនិងប្រើកាំបិតចាក់លោកឧកញ៉ា ហេង សៀ ចំនួន២កាំបិត រួចលួចយកទូរស័ព្ទ iPhone មួយគ្រឿង។ ការចោទប្រកាន់នេះ ផ្តើមចេញពីសម្មភាពទាស់ទែងគ្នានៅក្នុងរថយន្តដែលបានកើតឡើងកាលពីដើមខែឧសភាឆ្នាំ២០២១។
ក៏ប៉ុន្តែក្រោយមកតុលាការក្រុងភ្នំពេញបានសម្រេចច្រានចោលការចោទប្រកាន់នោះ ដោយថា នាងមិនបានធ្វើសកម្មភាព ដែលអាចត្រូវបានចាត់ទុកថា ជាបទល្មើសលួចនោះទេ។ នេះបើតាមសេចក្តីរាយការណ៍របស់កាសែតភ្នំពេញប៉ុស្តិ៍។
នៅក្នុងកម្មវិធីផ្តល់រង្វាន់ជូនសិស្សនិន្ទេស A ដដែលនោះ លោកនាយករដ្ឋមន្ត្រី ហ៊ុន សែន ថា ភាគីឧកញ៉ា និងស្ត្រីដែលគេដឹងថា ជាពិធីការិនីរូបនោះ បានសម្រេចដោះស្រាយបញ្ចប់រឿងដោយស្ងៀមស្ងាត់ ដោយសារពួកគេត្រូវការការពារមុខមាត់កិត្តិយសរៀងៗខ្លួន។
វីអូអេមិនទាន់អាចសុំការអត្ថាធិប្បាយពីភាគីលោកឧកញ៉ា ហេង សៀ និងកញ្ញា មាន ពេជ្ររីតាបានទេនៅថ្ងៃអង្គារនេះ។
នាយិកាមជ្ឈមណ្ឌលសិទ្ធិមនុស្សកម្ពុជាអ្នកស្រី ចក់ សុភាព ថ្លែងថា ករណីដែលមានការពាក់ព័ន្ធនឹងបុគ្គលមានងារឧកញ៉ាជាទូទៅត្រូវបានគេសង្កេតឃើញថា មានការសម្របសម្រួលបញ្ចប់នៅដើមដំបូងនៃដំណាក់កាលស៊ើបសួរ។
អ្នកស្រីលើកឡើងថា៖ «នៅពេលណាដែលមានករណី ដែលពាក់ព័ន្ធនឹងឧកញ៉ាអីហ្នឹង គឺយើងឃើញហើយ ជាទូទៅតែងតែមានការសម្របសម្រួលឬក៏បញ្ចប់ត្រឹមតែដំណាក់កាលដំបូងនៃការស៊ើបសួរអីប៉ុណ្ណឹង។ ប៉ុន្តែមិនមានដំណើរការវិវឌ្ឍទៅមុខទេ»។
អ្នកស្រីបន្ថែមថា កិច្ចខិតខំរបស់អាជ្ញាធរក្នុងការប្រយុទ្ធប្រឆាំងនឹងអំពើនិទណ្ឌភាពនឹងមិនមានភាពចម្រើនទៅមុខទេ បើសិនជាអ្នកជាប់ពាក់ព័ន្ធក្នុងសំណុំរឿងណាមួយមិនត្រូវបាននាំខ្លួនមកទទួលខុសត្រូវតាមច្បាប់នោះ៕
