ពិធីការិនីទូរទស្សន៍ម្នាក់ បានសម្រេចដាក់ពាក្យបណ្តឹងប្រឆាំងនឹងឧកញ៉ាម្នាក់ឈ្មោះ ហេង សៀ ដោយចោទពីបទ«ប៉ុនប៉ងរំលោភសេពសន្ថវៈ» ក្រោយមានបញ្ហាចម្រូងចម្រាសនៃការប្តឹងផ្តល់ពីសំណាក់ឧកញ៉ារូបនោះថា នាងបង្ករបួសស្នាមនិងលួចទូរស័ព្ទ។
បន្ទាប់ពីមានការផ្សព្វផ្សាយពាក្យបណ្តឹងរបស់ពិធីការិនីទូរទស្សន៍ MyTV គឺកញ្ញា មាន ពេជ្ររីតា អាយុ២០ឆ្នាំ ព័ត៌មានមួយចំនួនត្រូវបានចែករំលែក រួមមានពាក្យបណ្តឹងរបស់លោក ហេង សៀ ដែលបានប្តឹងនាងកាលពីសប្តាហ៍មុន ហើយតុលាការសម្រេចឲ្យនាំខ្លួននាងចូលតុលាការ និងបញ្ជូនទៅឃុំខ្លួនជាបណ្តោះអាសន្ន។
ក្នុងពាក្យបណ្តឹងដាក់ចូលទៅសាលាដំបូងរាជធានីភ្នំពេញ ចុះថ្ងៃទី១១ ខែឧសភា កញ្ញា មាន ពេជ្ររីតា បានរៀបរាប់ថា លោក ហេង សៀ ដែលជាអគ្គនាយកក្រុមហ៊ុននាំចូលគ្រឿងសំណង់ ឈ្មោះ ហេង ស្រេងហុង បានប្រើវិធីលួងលោម ដោយព្យាយាមទាក់ទងនាង តាមរយៈប្រព័ន្ធ Telegram ទូរស័ព្ទ និងផ្ញើលុយ ចូលគណនី ABA របស់នាងជាបន្តបន្ទាប់។
កញ្ញា មាន ពេជ្ររីតា ដែលជានិស្សិតឆ្នាំទីពីរ ផ្នែកជំនួញពាណិជ្ជកម្ម បានចោទលោក ហេង សៀ ថា បានលូកលាន់កេរ្តិ៍ខ្មាស់របស់នាងជាញឹកញាប់ពេលនៅក្នុងរថយន្តកាលពីថ្ងៃ៤ ខែឧសភា ឆ្នាំ២០២១ ហើយអះអាងថា លោក ហេង សៀ ក៏ចង់យកនាងទៅផ្ទះសំណាក់ផងដែរ។ នេះបើតាមពាក្យបណ្តឹង។ នាងបញ្ជាក់ថា នាងបានបើកទ្វារឡានរត់ចេញពីគាត់ ត្រឡប់ទៅផ្ទះ។
វីអូអេមិនទាន់អាចសុំការអធិប្បាយពីនាង មាន ពេជ្ររីតា និងសាច់ញាតិរបស់នាងបានទេនៅថ្ងៃពុធនេះ។
វីអូអេក៏មិនទាន់អាចទាក់ទងសុំការអធិប្បាយពីលោក ហេង សៀ បានដែរនៅថ្ងៃពុធនេះ។ បុគ្គលិកស្ត្រីដែលលើកទូរស័ព្ទរបស់ក្រុមហ៊ុន ហេង ស្រេងហុង ដែលមានលោក ហេង សៀ ជាម្ចាស់ក្រុមហ៊ុនបាននិយាយថា នាងមិនបានដឹងរឿងក្តីក្តាំរបស់អគ្គនាយកក្រុមហ៊ុននាងទេ។
បើតាមពាក្យបណ្តឹងនោះ នាងពេជ្ររីតា បានអះអាងថា ក្រោយមកប៉ូលិសអធិការដ្ឋានខណ្ឌទួលគោក បានរកនាងនៅផ្ទះ ហើយនាំនាងមកឃុំខ្លួនចំនួនពីរថ្ងៃ រួចបញ្ជូនមកសាលាដំបូងរាជធានីភ្នំពេញ។
ស្របពេលជាមួយគ្នានោះ អង្គភាពព័ត៌មានក្នុងស្រុកកម្ពុជាថ្មី បានផ្សព្វផ្សាយដីការបស់ចៅក្រមស៊ើបសួរលោក កូយ សៅ ចុះថ្ងៃទី១១ ខែឧសភា ដែលបង្គាប់ឲ្យឃុំខ្លួននាង មាន ពេជ្ររីតា ក្រោមបទលួចមានស្ថានទម្ងន់ទោស និងប្រើកាំបិទចាក់ជនរងគ្រោះចំនួនពីរកំាបិត រួចយកទូរស័ព្ទដៃ Iphone ទំនើបមួយគ្រឿង។
នាង មាន ពេជ្ររីតា បានច្រានចោលក្នុងបណ្តឹងរបស់នាងចំពោះការចោទប្រកាន់នេះ ហើយថា នាងមានមុខរបរអាចរកប្រាក់កម្រៃបាននិងជានិស្សិត ដែលមិនអាចទៅប្រព្រឹត្តបទឧក្រិដ្ឋនេះទេ។ ក្នុងបណ្តឹងរបស់នាង មាន ពេជ្ររីតា ពិធីការិនីរូបនោះ បានអំពាវនាវឲ្យអាណាព្យាបាលរបស់ប្រជាពលរដ្ឋក្នុងរាជធានីភ្នំពេញ ជួយរកយុត្តិធម៌ឲ្យនាង។
អ្នកនាំពាក្យពីររូបរបស់សាលាដំបូងរាជធានីភ្នំពេញ គឺលោក គុជ គឹមឡុង និងលោក អ៊ី រិន្ទ បដិសេធមិនផ្តល់ការអធិប្បាយ។
អ្នកប្រើប្រាស់បណ្តាញសង្គមហ្វេសប៊ុកមួយចំនួនក៏ចែករំលែកឃ្លីបវីដេអូ ដែលឃើញបុរសម្នាក់ចាក់សំឡេងស្រែកយំរបស់នាង មាន ពេជ្ររីតា ថា នាងស្អប់ខ្ពើមខ្លួនឯង ពេលមានមនុស្សប្រុសចំណាស់មកលូកលាន់និងស្ទាបអង្អែលរាងកាយនាង។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា ប្រាប់វីអូអេនៅថ្ងៃពុធនេះថាមន្ត្រីអនុវត្តច្បាប់ត្រូវចាត់ការរឿងនេះ ឲ្យបានត្រឹមត្រូវតាមផ្លូវច្បាប់។
អ្នកស្រីមានប្រសាសន៍ថា៖ «ការឆ្លើយតបដោយឈរលើគតិយុត្តិហើយនិងការផ្តល់នូវយុត្តិធម៌ដល់ជនរងគ្រោះ នោះនឹងអាចចូលរួមកាត់បន្ថយ ហើយនិងឆ្លើយតបចំពោះបញ្ហាកន្លងមក ដែលពាក់ព័ន្ធនឹងបញ្ហានិទណ្ឌភាព ហើយនិងការរំលោភបៀតបៀន ផ្អែកលើយេនឌ័រនេះ ដែលយើងឃើញកន្លងមកមានការកើតឡើង ហើយដែលយន្តការផ្នែកច្បាប់នេះ ហាក់ដូចជា មិនទាន់បានឆ្លើយតបឲ្យបានមានប្រសិទ្ធភាពនៅឡើយទេ ដែលភាគច្រើនជនល្មើសហ្នឹង គឺតែងតែរួចផុតពីសំណាញ់ច្បាប់។ អីចឹងយើងសង្ឃឹមថា ចំពោះករណីនេះនឹងមានការឆ្លើយតបដោយយុត្តិធម៌ចំពោះជនរងគ្រោះ»។
ក្នុងបញ្ហាបំពារបំពានផ្លូវភេទស្ត្រី ឬប្រើហិង្សាលើស្ត្រីនេះ មានមន្ត្រីជាន់ខ្ពស់របស់រដ្ឋាភិបាលមួយចំនួន ក្នុងនោះមានកម្លាំងនគរបាល បានបង់បាត់មុខតំណែង ឬឧកញ៉ាខ្លះត្រូវបានដកគោរម្យងា តែកម្រទទួលការដាក់ទោសទណ្ឌធ្ងន់ធ្ងរតាមផ្លូវច្បាប់ដែលជាការបារម្ភនៃការកើនឡើងអំពើនិទណ្ឌភាព។ នេះបើតាមការតានដានរបស់ក្រុមអ្នកការពារសិទ្ធិស្ត្រី៕
