លោកនាយករដ្ឋមន្ត្រី ហ៊ុន សែន បានបញ្ជាក់នៅថ្ងៃច័ន្ទនេះថា វប្បធម៌សន្ទនារវាងគណបក្សប្រជាជនកម្ពុជា និងគណបក្សជំទាស់គឺមិនមានវិសាលភាពគ្របដណ្តប់លើច្បាប់នានា និងអំណាចធំៗទាំងបី គឺនីតិបញ្ញត្តិ នីតិប្រតិបត្តិ និងប្រព័ន្ធតុលាការកម្ពុជានោះទេ។ ប៉ុន្តែវាហាមប្រាមមិនឲ្យមានការជេរប្រមាថ និងគំរាមគ្នាដើម្បីផលចំណេញនយោបាយ។
«វប្បធម៌សន្ទនានេះគឺអត់ទៅលុបច្បាប់ អត់ទៅលុបរដ្ឋធម្មនុញ្ញ និងអត់បំពានទៅលើអំណាចណាទាំងអស់ គឺគ្រាន់តែកម្រិតមន្ត្រីទាំងអស់របស់គណបក្សកុំជេរប្រទេចគ្នា កុំប្រមាថគ្នា កុំគំរាមគ្នា។ ឯយន្តការដទៃប្រើប្រាស់ទៅ ដូចជាសភាភាគតិច ភាគច្រើន ហៅរដ្ឋមន្រ្តីទៅសួរផ្តល់មតិឲ្យគ្នា»។
លោកនាយកមន្ត្រីបានថ្លែងដូច្នោះ នៅក្នុងពិធីចែកសញ្ញាប័ត្រមួយដល់និស្សិតនៅក្នុងរាជធានីភ្នំពេញនាព្រឹកថ្ងៃច័ន្ទនេះ។
លោកនាយករដ្ឋមន្រ្តី ដែលកាន់អំណាចជាង៣០ឆ្នាំរូបនេះបានលើកឡើងដូច្នេះមិនបានប៉ុន្មានថ្ងៃផង ក្រោយពីគណបក្សប្រជាជនកម្ពុជា និងគណបក្សសង្រ្គោះជាតិ បានចេញសេចក្តីថ្លែងការណ៍រួមស្នើសុំឲ្យដៃគូសន្ទនានេះ និងសមាជិករបស់ខ្លួនបញ្ឈប់ការលាបពណ៌គ្នា ចៀសវាងការញុះញង់ និងការប្រើពាក្យអសុរស ការជេរប្រមាថ ដោយប្រើពាក្យដូចជា «ពួកកុម្មុយនីស្តផ្តាច់ការ» «អាយ៉ងយួន» «អាក្បត់ជាតិ» «អាលក់ជាតិ» «អាមេចោរ» និង«អាកូនចោរ»ជាដើម។
សេចក្តីថ្លែងការណ៍រួមនេះក៏ឈប់ឱ្យមានការគំរាម និងការបំភិតបំភ័យថានឹងមានសង្គ្រាម ដូចដែលលោក ហ៊ុន សែន ធ្លាប់បានឃោសនាក្នុងពេលកន្លងមក និងការគំរាមចាប់ដាក់ពន្ធនាគារជាដើម។ គណបក្សប្រជាជនកម្ពុជា និងគណបក្សសង្រ្គោះជាតិដែលជាគណបក្សប្រឆាំងនោះធ្លាប់មានអរិភាពនឹងគ្នាក្រោយការបោះឆ្នោតឆ្នាំ២០១៣។
ថ្លែងទៅកាន់និស្សិតជិត២០០០នាក់ ដែលបញ្ចប់ការសិក្សាកាលពីព្រឹកមិញនេះ លោក ហ៊ុន សែន បានបញ្ជាក់ចំៗម្តងហើយម្តងទៀតថា មន្ត្រីរបស់គណបក្សទាំងពីរត្រូវតែបញ្ឈប់រាល់ការជេរប្រមាថ ញុះញង់ និងលាបពណ៌គ្នាគ្រប់បែបយ៉ាងមិនត្រឹមតែប៉ុន្មានពាក្យដែលសរសេរនៅក្នុងសេចក្តីថ្លែងការណ៍ដែលចេញផ្សាយកាលពីថ្ងៃសុក្រនោះទេ។
«អ្នកខ្លះថា គេដាក់ពាក្យប៉ុន្មានគឺយើងកុំជេរតែអាហ្នឹងទៅបានហើយ!» មានពាក្យ «អាក្បាលយួនខ្លួនខ្មែរ» «ពួកកុម្មុយនីស្តផ្តាច់ការ» «អាយ៉ងយួន» «អាក្បត់ជាតិ» «អាលក់ជាតិ» «អាមេចោរ» និង«អាកូនចោរ»។ ប៉ុន្តែ សូមផ្តាំមានពាក្យពីរពាក្យទៀតនៅខាងក្រោយ ជៀសវាងឲ្យខានតែបាននូវការប្រើពាក្យ«ញុះញង់»មួយទៀត ពាក្យថា «ការលាបពណ៌គ្នា» ការប្រើពាក្យ«អសុរស និងការជេរប្រមាថគ្នា»។ បើមិនបានជេរ វារន្ទះបាញ់ឬអី!»។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានថ្លែងថា កិច្ចសន្ទនានិងវប្បធម៌សន្ទនានេះគឺផ្តល់ផលចំណេញដល់ប្រជាពលរដ្ឋច្រើនជាងគណបក្សទាំងពីរ ដោយវប្បធម៌សន្ទនាមួយនេះបានបង្កឲ្យមានស្ថិរភាពផ្នែកនយោបាយ និងសន្តិភាពនៅកម្ពុជា។ ហើយមន្ត្រីរបស់គណបក្សសង្គ្រោះជាតិ និងបន្តកិច្ចសន្ទនានេះ។
«សូមឲ្យថ្នាក់ដឹកនាំគណបក្សទាំងពីរ ហើយសកម្មជន ថ្នាក់ដឹកនាំមូលដ្ឋាននៃគណបក្សទាំងពីរ គ្រប់ជាន់ថ្នាក់ គោរពឲ្យបានត្រឹមត្រូវនូវសេចក្តីថ្លែងការណ៍ដែលបានចែងរួចហើយ។ ហើយគណបក្សសង្គ្រោះជាតិ និងថ្នាក់ដឹកនាំគណបក្សសង្គ្រោះជាតិកំពុងតែធ្វើការទិតៀនលើអ្វី ដែលរដ្ឋាភិបាលនៅមានចំណុចខ្វះខាត ផ្តល់យោបល់ក្នុងន័យរិះគន់ស្ថាបនា ដើម្បីផលប្រយោជន៍សង្គមទាំងអស់គ្នា»។
គណបក្សនយោបាយធំៗទាំងពីរគឺគណបក្សប្រជាជនកម្ពុជា និងគណបក្សសង្គ្រោះជាតិបានបង្កើតការសន្ទនាមួយ ដើម្បីបញ្ចប់អរិភាពផ្នែកនយោបាយនឹងគ្នា ក្រោយពីការជាប់គាំងនយោបាយជិត១ឆ្នាំ ក្រោយពេលបោះឆ្នោតនាឆ្នាំ២០១៣។ ការស្រុះស្រួលផ្នែកនយោបាយជាមួយគ្នាក្រោមការសន្ទនានេះ បានឈានទៅដល់ការបង្កើតគណៈកម្មាធិការជាតិរៀបចំការបោះឆ្នោតថ្មីមួយ ដែលមានសមាសភាពចម្រុះ៩រូប នាដើមខែមេសា ដែលធ្វើឲ្យសភាពការណ៍នយោបាយនៅកម្ពុជាមានភាពល្អប្រសើរឡើងវិញ។
ជាមួយគ្នានោះដែរ សកម្មជនគណបក្សសង្គ្រោះជាតិ និងសកម្មជនដីធ្លីមួយចំនួនត្រូវបានដោះលែង និងលើកលែងទោស។ ក៏ប៉ុន្តែលោក ហ៊ុន សែន បានព្រមានមន្ត្រីគណបក្សប្រឆាំងថា វប្បធម៌សន្ទនាមួយនេះមិនអាចជួយពួកគាត់ឲ្យរួចពីចំណាត់ការតុលាកាមួយណានោះទេ ប្រសិនបើពួកគេធ្វើខុសនឹងច្បាប់នោះ។
«តិចថា បានវប្បធម៌សន្ទនា ទៅបង្កើតរឿង។ ហើយតុលាការគេកោះ គេយកទៅកាត់ទោស ហៅវប្បធម៌សន្ទនាទៅធានា។ អត់ទេ អាហ្នឹងអត់ទេ។ សូមប្រាប់ឲ្យហើយ ព្រោះឥឡូវចាប់ផ្តើមមានការបកស្រាយតែពីសតែពាស»។
កាលពីចុងខែមេសាកន្លងមកនេះ លោក ហ៊ុន សែន បានចោទអនុប្រធានគណបក្សជំទាស់គឺលោកកឹម សុខាថា បានព្យាយាមរកកិច្ចកលនយោបាយ និងប្រើពាក្យប្រមាថមកលើគណបក្សប្រជាជនកម្ពុជា និងរូបលោក។ លើសពីនេះទៀត លោក ហ៊ុន សែន ក៏បានគំរាមចំៗថា នឹងអាចមានសង្គ្រាមស៊ីវិលកើតឡើងប្រសិនបើមានការសងសឹកណាមួយកើតឡើង៕
