លោកនាយករដ្ឋមន្ត្រី ហ៊ុន សែន នៅថ្ងៃពុធនេះ បានចោទអង្គការសង្គមស៊ីវិលមួយចំនួនដោយមិនបញ្ចេញឈ្មោះថា ពួកគេមានបំណងផ្តួលរំលំរដ្ឋាភិបាលរបស់លោក និងចង់បំបាត់របបរាជានិយមក្នុងប្រទេសកម្ពុជា។
លោក ហ៊ុន សែន បានថ្លែងបែបនេះ ក្នុងពេលចុះជួបប្រជាកសិករដែលរងគ្រោះដោយសារទឹកជំនន់ក្នុងខេត្តកំពង់ឆ្នាំង កាលពីព្រឹកថ្ងៃពុធ ខណៈលោកបានប្រតិកម្មនឹង លោក សម រង្ស៊ី មេដឹកនាំបក្សប្រឆាំង ក្នុងសំណុំរឿងប្រមាថព្រះមហាក្សត្រ។
លោក ហ៊ុន សែន បានភ្ជាប់អង្គការសង្គមស៊ីវិលមួយចំនួនថា ប្រហែលមិនហ៊ានរិះគន់ លោក សម រង្ស៊ី ដោយលោកហៅអង្គការទាំងនោះថាប្រឆាំងនឹងរដ្ឋាភិបាល។
លោក ហ៊ុន សែន ថ្លែងថា៖ «ខ្ញុំជឿថា ក្នុងចំណោមអង្គការដែលប្រឆាំងរដ្ឋាភិបាល គឺមិនអះអាងទេ ព្រោះគេក៏ចូលរួមចំណែកដើម្បីចង់ផ្តួលរំលំរដ្ឋាភិបាល និងប្តូររបបរាជានិយមនេះផងដែរ»។
មួយរយៈចុងក្រោយនេះ សារព័ត៌មាន Fresh News ដែលស្និទ្ធនឹងរដ្ឋាភិបាល បានផ្សព្វផ្សាយវីដេអូមួយរយៈពេល ២៣ វិនាទីតែប៉ុណ្ណោះ ដែលបង្ហាញការថ្លែងរបស់ លោក សម រង្ស៊ី ដោយមានការប្រើប្រាស់ពាក្យពេចន៍មួយចំនួន ដូចជា «ស្តេចសព្វថ្ងៃនេះ អត់មានមនសិការជាតិ» ហើយ «ស្តេចរាល់ថ្ងៃក្បត់ជាតិ»។
លោក ហ៊ុន សែន បានប្រតិកម្មប៉ុន្មានថ្ងៃជាប់គ្នា ក្នុងពេលលោកចុះទៅជួបកសិករដែលរងគ្រោះដោយសារទឹកជំនន់ ក្នុងខេត្តមួយចំនួន។
លោក អំ សំអាត នាយករងទទួលបន្ទុកឃ្លាំមើលសិទ្ធិមនុស្សអង្គការលីកាដូ ប្រាប់វីអូអេថា អង្គការសង្គមស៊ីវិលជាដៃគូអភិវឌ្ឍន៍របស់រដ្ឋាភិបាល ហើយជួយបំពេញចំណុចខ្វះចន្លោះដែលអង្គការមើលឃើញ។
លោកបន្ថែមថា អង្គការសង្គមស៊ីវិលចូលរួមចំណែកក្នុងការអភិវឌ្ឍប្រទេសដូចគ្នា គ្រាន់តែមានទស្សនៈវិស័យ និងគោលការណ៍លើវិស័យផ្សេងៗគ្នា តែគោលដៅរួមចង់បានប្រទេសកម្ពុជាប្រកបដោយសន្តិភាព សុខសុវត្ថិភាព ប្រជាធិបតេយ្យ នីតិរដ្ឋ និងមានយុត្តិធម៌ក្នុងសង្គម។
លោកថ្លែងថា៖ «បើដូចអង្គការផ្នែកសិទ្ធិមនុស្ស យើងចូលរួមចំណែកក្នុងការលើកកម្ពស់ទៅលើសេរីភាពជាមូលដ្ឋាន និងលើកកម្ពស់ទៅលើបញ្ហាសិទ្ធិមនុស្សនៅក្នុងប្រទេសកម្ពុជា មិនមានបំណងអ្វីក្រៅពីនោះទេ»។
លោក អំ សំអាត មានការព្រួយបារម្ភថា អាជ្ញាធរមានការភ័ន្តច្រឡំ ក្រោយការថ្លែងរបស់នាយករដ្ឋមន្ត្រី ដោយចាប់ផ្តើមរឹតបន្តឹងអង្គការសង្គមស៊ីវិលទូទៅ ហើយសកម្មភាពរបស់អង្គការត្រូវបានឃ្លាំមើល និងត្រួតពិនិត្យយ៉ាងដិតដល់៕
