កូនប្រុសច្បងរបស់លោកនាយករដ្ឋមន្ត្រី ហ៊ុន សែន គឺ លោក ហ៊ុន ម៉ាណែត បានច្រានចោលនូវការចេញផ្សាយសេចក្តីរាយការណ៍របស់សារព័ត៌មានឌឹ ខេមបូឌា ដេលី (The Cambodia Daily) ដែលថាលោកជា «មេក្លោង» នៅពីក្រោយឈ្មួញរកស៊ីឈើខុសច្បាប់មួយក្រុមក្នុងខេត្តស្ទឹងត្រែង និងបានទាមទារឱ្យស្ថាប័នព័ត៌មាននោះបង្ហាញភស្តុតាងឱ្យបានជាក់លាក់ ដើម្បីបញ្ចៀសការភាន់ច្រឡំជាសាធារណៈ។
ការប្រតិកម្មយ៉ាងដូច្នេះរបស់ លោក ហ៊ុន ម៉ាណែត ដែលជាមន្ត្រីយោធាជាន់ខ្ពស់កម្ពុជា និងជាអនាគតបេក្ខជនសម្រាប់តំណែងនាយករដ្ឋមន្ត្រី កើតមានឡើងក្រោយការផ្សាយរបស់កាសែត The Cambodia Daily កាលពីថ្ងៃទី១៦ ខែមីនា ឆ្នាំ២០២៣ ក្រោមចំណងថា៖« «សារព័ត៌មានអន្តរជាតិលាតត្រដាងពីបណ្ដាញរកស៊ីឈើខុសច្បាប់របស់ លោក ហ៊ុន ម៉ាណែត»។
ការចុះផ្សាយរបស់សារព័ត៌មាន The Cambodia Daily តាមប្រព័ន្ធអនឡាញ គឺយោងតាមប្រភពកាសែតអន្តរជាតិមួយឈ្មោះថា Mongabay ដែលមានមូលដ្ឋាននៅប្រទេសអង់គ្លេស។
បើតាម លោក ហ៊ុន ម៉ាណែត កាសែត Mongabay បានលាតត្រដាងបុគ្គលមួយចំនួនដែលពាក់ព័ន្ធនឹងការរកស៊ីឈើខុសច្បាប់នោះ ហើយកាសែតដែលមានមូលដ្ឋាននៅប្រទេសអង់គ្លេសនោះបានបង្ហាញរូបថតពួករកស៊ីឈើទាំងនោះជាមួយលោក ប៉ុន្តែសារព័ត៌មានអន្តរជាតិនោះមិនបានលើកឡើងថាលោកជាមេក្លោងរកស៊ីឈើនោះឡើយ។
លោកបញ្ជាក់ថា៖ «ខ្ញុំសួរ Cambodia Daily តើមានភស្តុតាងកន្លែងណាដែលលោកឯងថាកាសែតសារព័ត៌មាន Mongabay ហ្នឹង បង្ហាញខ្ញុំមកនៅក្នុងអត្ថបទហ្នឹង ស្ក្រ៊ីនស៊ត់ឱ្យខ្ញុំមក ថាតើនៅទំព័រទីប៉ុន្មាន ដែលសារព័ត៌មានហ្នឹងថា ហ៊ុន ម៉ាណែត ជាមេក្លោងនៃបណ្តាញកាប់ឈើខុសច្បាប់នៅកម្ពុជាដូចCambodia Daily បាននិយាយ»។
លោក ហ៊ុន ម៉ាណែត បន្ថែមថា៖ «បង្ហាញខ្ញុំមក ព្រោះសារព័ត៌មានហ្នឹងគេអត់មានសរសេរអីចោទថាខ្ញុំជាមេក្រុមទេ។ អ៊ីចឹងសួរថាសារព័ត៌មាន Cambodia Daily ថាយកសារព័ត៌មានដែលចុះ ខ្ញុំមើលទៅវាអត់មាន។ អ៊ីចឹងតើ Cambodia Daily យកភស្តុតាងមកពីណា ហើយចោទប្រកាន់ខ្ញុំ?»។
វីអូអេព្យាយាមសុំការអត្ថាធិប្បាយពី លោក តាំង សារ៉ាដា អ្នកសារព័ត៌មានរបស់កាសែត The Cambodia Daily ប្រចាំនៅរដ្ឋធានីវ៉ាស៊ីនតោន សហរដ្ឋអាមេរិក តែលោកមិនទាន់មានការឆ្លើយតបតាមប្រព័ន្ធទំនាក់ទំនងសង្គមហ្វេសប៊ុក។
អ្នកជំនាញផ្នែកប្រព័ន្ធផ្សព្វផ្សាយព័ត៌មានថា គោលការណ៍នៃការរាយការណ៍ព័ត៌មានគឺត្រូវពឹងផ្អែកលើប្រភពច្បាស់លាស់ និងមានការត្រួតពិនិត្យឱ្យបានត្រឹមត្រូវ ជាពិសេសព័ត៌មានណាដែលមានលក្ខណៈរសើប។
ថ្លែងនៅក្នុងបទសម្ភាសន៍ជាមួយវីអូអេ លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លើកឡើងថា មុននឹងចុះផ្សាយព័ត៌មានណាមួយ អ្នកសារព័ត៌មានត្រូវតែទាក់ទងភាគីពាក់ព័ន្ធទាំងអស់ដើម្បីទទួលបានការពន្យល់ក៏ដូចជាបកស្រាយ ដើម្បីកុំឱ្យមានការភាន់ច្រឡំ។
លោកបញ្ជាក់ថា៖ «ខ្ញុំចង់ឃើញអ្នកសារព័ត៌មានយើងអនុវត្តនៅក្នុងគោលការណ៍ក្របខណ្ឌវិជ្ជាជីវៈបានកាន់តែច្បាស់លាស់ កាន់តែសុក្រឹតត្រឹមត្រូវ ដើម្បីយើងធ្វើ យ៉ាងម៉េចក៏ដោយធានាអ្វីដែលយើងបានផ្សព្វផ្សាយ អ្វីដែលយើងបានសរសេរនៅក្នុងព័ត៌មានរបស់យើង គឺថាមិនមានធ្វើឱ្យប៉ះពាល់ទៅដល់នរណាមួយដោយមិនមានមូលដ្ឋានគ្រប់គ្រាន់ ដោយមិនមានភស្តុតាងគ្រប់គ្រាន់»។
អ្នកនាំពាក្យក្រសួងព័ត៌មាន លោក មាស សុភ័ណ្ឌ ប្រាប់វីអូអេតាមប្រព័ន្ធតេឡេក្រាមថា ក្រសួងគាំទ្រនូវការលើកឡើងរបស់ លោក ហ៊ុន ម៉ាណែត ដែលទាមទារឱ្យសារព័ត៌មាន The Cambodia Daily បង្ហាញភស្តុតាង និងបញ្ជាក់ពីភាពត្រឹមត្រូវនៃការធ្វើសេចក្តីរាយការណ៍របស់ខ្លួន។
បើតាមអ្នកនាំពាក្យរូបនេះ សារព័ត៌មាននេះមិនមែនជាស្ថាប័នដែលធ្វើការប្រកបដោយវិជ្ជាជីវៈ និងគោរពទៅតាមក្រមសីលធម៌របស់អ្នកសារព័ត៌មានឡើយ ខណៈថាសារព័ត៌មាន The Cambodia Daily ដែលផ្សាយជាប្រចាំថ្ងៃតាមប្រព័ន្ធទំនាក់ទំនងសង្គមហ្វេសប៊ុកពីក្រៅប្រទេសមកនោះ គ្រាន់តែជា«ឧបករណ៍ឃោសនា»ប៉ុណ្ណោះ។
លោកបញ្ជាក់ក្នុងន័យដើមថា៖ «សារព័ត៌មានមួយដែលទទួលបានការជឿជាក់គឺជាសារព័ត៌មានដែលផ្សព្វផ្សាយតែព័ត៌មានពិត មានប្រភពច្បាស់លាស់ និងគ្រប់ជ្រុង ជ្រោយ ព្រមទាំងត្រូវគោរពឱ្យបានត្រឹមត្រូវ និងមានការទទួលខុសត្រូវខ្ពស់តាមក្រមសីលធម៌ វិជ្ជាជីវៈសារព័ត៌មាន មិនមែនជាសារព័ត៌មានដែលផ្សព្វផ្សាយព័ត៌មាន ប្រតិដ្ឋ បំភ្លៃខុសពីការពិតនោះទេ»។
ក្រៅពីការចេញផ្សាយអត្ថបទព័ត៌មានដែលនិយាយពីបុគ្គលមានអំណាច និងឥទ្ធិពលនៅកម្ពុជាដូចជា លោក ហ៊ុន ម៉ាណែត នោះ កាសែត The Cambodia Daily ក៏ធ្លាប់បានចេញផ្សាយសេចក្តីរាយការណ៍ អំពីបុគ្គលមានទ្រព្យស្តុកស្តម្ភនៅកម្ពុជា ក្នុងនោះគឺមាន លោក ឡេង ណាវ៉ាត្រា ដែលជាអ្នកជំនួញវ័យក្មេងលេចធ្លោមួយរូបក្នុងវិស័យអចលនទ្រព្យនៅប្រទេសកម្ពុជា។
កាលពីខែកុម្ភៈ ឆ្នាំ២០២៣ នេះ លោក ឡេង ណាវ៉ាត្រា ដែលមានងារជា ឧកញ៉ាផងនោះ បានច្រានចោលការចេញផ្សាយដំណឹងរបស់កាសែត The Cambodia Daily ក្រោមចំណងជើងថា តើអ្នកឧញ៉ា ឡេង ណាវ៉ាត្រា ជាអ្នកណា? ដោយបានលើកឡើងអំពីមន្ទិលសង្ស័យថា ឧកញ៉ា ឡេង ណាវ៉ាត្រា កំពុងធ្វើសកម្មភាពលាងលុយកខ្វក់ឱ្យអ្នកមានអំណាចនៅក្នុងប្រទេសកម្ពុជា ជាពិសេសត្រកូលហ៊ុន។
លោក ឡេង ណាវ៉ាត់ត្រា បានចាត់ទុកថា ការផ្សាយនោះមិនពិត និងការពារខ្លួនថា លោកមិនបានជាប់ពាក់ព័ន្ធនឹងសកម្មភាពលាងលុយកខ្វក់នោះឡើយ៕
