ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ធនាគារ​ពិភពលោក​ព្រមាន​ជា​ថ្មី​ថា​ លទ្ធភាព​នៃ​ការ​ដក ​EBA ​អាច​ប៉ះ​ទង្គិច​សេដ្ឋកិច្ច​កម្ពុជា


កិច្ចពិភ្សា​អំពី​បច្ចុប្បន្នភាព​សេដ្ឋកិច្ច​កម្ពុជា​ នៅ​ទីក្រុង​ភ្នំពេញ​ ថ្ងៃ​ទី​២៧​ ខែ​វិច្ឆិកា​ ឆ្នាំ​២០១៩។ (ហ៊ុល រស្មី/VOA)
កិច្ចពិភ្សា​អំពី​បច្ចុប្បន្នភាព​សេដ្ឋកិច្ច​កម្ពុជា​ នៅ​ទីក្រុង​ភ្នំពេញ​ ថ្ងៃ​ទី​២៧​ ខែ​វិច្ឆិកា​ ឆ្នាំ​២០១៩។ (ហ៊ុល រស្មី/VOA)

ប៉ុន្តែ​មន្ត្រី​​ជំនាញ​កម្ពុជា​​បាន​សម្រាល​ការ​ព្រមាន​នេះ​​ ដោយ​ប្រដូច​ប្រព័ន្ធ​អនុគ្រោះ​ EBA ទៅ​នឹង​ «អាវ​ពោង​សង្គ្រោះ​ជីវិត» ​ដែល​​កម្ពុជា​នឹង​ឈប់​ប្រើ​​ ដើម្បី​បញ្ជាក់​ថា​ ​កម្ពុជា​អាច​រស់​ដោយ​គ្មាន​អាវពោង​នេះ​បាន។

ធនាគារ​ពិភពលោក​នៅ​ថ្ងៃ​ពុធ​នេះ​បាន​ព្រមាន​ម្តង​ទៀតថា​ លទ្ធភាព​នៃ​ការ​បាត់​បង់​ប្រព័ន្ធ​ឋានៈ​អនុគ្រោះ​ពន្ធ​ «គ្រប់​មុខ​ទំនិញ​លើកលែង​តែ​សព្វាវុធ» ឬ​ហៅ​ថា​ EBA ​អាច​នឹង​ក្លាយ​ជា​បច្ច័យ​មិន​ល្អ​ទៅ​លើ​កំណើន​សេដ្ឋកិច្ច​ប្រទេស​កម្ពុជា​ ដែល​ធនាគារ​នេះ​ អះអាង​ថា​ នឹង​ចុះ​ថមថយ​ល្បឿន​មក​នៅ​ត្រឹម​៧​ភាគរយ​ក្នុង​ឆ្នាំ​២០១៩​នេះ ពោល​គឺ​ចុះ​ពី​៧,៥​ភាគរយ​ក្នុង​ឆ្នាំ​២០១៨។

ប៉ុន្តែ​មន្ត្រី​ជាន់ខ្ពស់​ក្រសួង​សេដ្ឋកិច្ច​ និង​ហិរញ្ញវត្ថុ​កម្ពុជា​ បាន​សម្រាល​ការ​ព្រមាន​របស់​ធនាគារ​ពិភពលោក​ថា​ ប្រព័ន្ធ​ឋាៈអនុគ្រោះ​ EBA របស់​សហគមន៍​អឺរ៉ុប​ ​គឺ​ប្រៀប​ដូច​ជា​ «អាវ​ពោង​សង្គ្រោះ​ជីវិត» ​ដែលកម្ពុជា​នឹង​ឈប់​ប្រើ​វា​ ដើម្បី​បញ្ជាក់​ថា​ ​កម្ពុជា​អាច​រស់​ដោយ​គ្មាន​អាវពោង​នេះ។

ធនាគារ​ពិភពលោក​បាន​ថ្លែង​នៅ​ក្នុង​របាយការណ៍​ស្តី​ពី​ «បច្ចុប្បន្នភាព​សេដ្ឋកិច្ច​កម្ពុជា» ចេញ​ផ្សាយ​នៅ​ថ្ងៃទី​២៧​ ខែ​វិច្ឆិកា​នេះ​ថា​ «លទ្ធភាព​នៃ​ការ​ដក​ចេញ​ភាព​អនុគ្រោះ​ពាណិជ្ជកម្ម​ក្រោម​ប្រព័ន្ធ​ EBA​ និង​ការ​ធ្លាក់​ចុះ​យ៉ាង​គំហុក​ណា​មួយ​នៃ​សេដ្ឋកិច្ច​របស់​ប្រទេស​ចិន​ អាច​បង្ក​ផល​ប៉ះទង្គិច​យ៉ាង​ខ្លាំង​លើ​ទស្សនវិស័យ​កំណើន​សេដ្ឋកិច្ច​របស់​កម្ពុជា»។

ជា​ផ្នែក​មួយ​នៃ​ការពង្រឹង​សមត្ថភាព​ប្រកួត​ប្រជែង​ក្រៅ​ប្រទេស​ ​ធនាគារ​ពិភពលោក​បាន​ឲ្យ​ដឹង​ថា​ អាជ្ញាធរ​កម្ពុជា​បាន​ដាក់​ចេញ​វិធានការ​មួយ​ចំនួន​សំដៅ​ជួយ​សម្រួល​ដល់​ការ​ធ្វើ​ពាណិជ្ជកម្ម​ ដោយ​បន្ទាប​ថ្លៃ​ចំណាយលើ​ការ​ដឹកជញ្ជូន​ កាត់​បន្ថយ​ការិយាធិបតេយ្យ​ និង​ជួយ​ដល់​ធុរកិច្ច​ដោយ​កាត់​បន្ថយ​ថ្ងៃ​ឈប់​សម្រាក​ផ្លូវការ​ចំនួន​៦ថ្ងៃ​ នៅ​ក្នុង​ឆ្នាំ​២០២០។

ធនាគារ​ពិភពលោក​ ដែល​មាន​មូលដ្ឋាន​នៅ​សហរដ្ឋ​អាមេរិក​ ក៏​បាន​ឲ្យ​ដឹង​ក្នុង​របាយការណ៍​ខ្លួន​ទៀត​ថា​ វិធានការ​កញ្ចប់​ហិរញ្ញវត្ថុ​ធំ​គួរ​សម​មួយ​សម្រាប់​ទ្រទ្រង់​សេដ្ឋកិច្ច​ដោយ​ប្រើ​ប្រាក់​សន្សំ​របស់​រដ្ឋ​ នឹង​អាច​ត្រូវ​បាន​ដាក់​ចេញ​នៅ​ក្នុង​ឆ្នាំ​២០២០ «ដើម្បី​ជួយ​សម្រាល​ផលប៉ះ​ទង្គិច​អវិជ្ជមាន​ដែល​បណ្តាល​មក​ពី​ការ​ដក​ EBA ​ប្រសិន​បើ​វា​នឹង​កើត​ឡើង​មែន»។

តាម​ទិន្នន័យ​ដែល​ផ្តល់​ដោយ​ធនាគារ​ពិភពលោក​ ការ​នាំចេញ​ផលិតផល​សម្លៀក​បំពាក់​ និង​ស្បែក​ជើង​ ដែល​មាន​ទំហំ​ប្រហែល​៧០​ភាគរយ​នៃ​ទំនិញ​នាំ​ចេញ​គ្រប់​មុខ​បាន​កើន​ចំនួន​១៧,៧​ភាគរយ​ ក្នុង​ឆ្នាំ​២០១៨​ ប៉ុន្តែ​ស្រុត​ចុះ​មក​វិញ​មក​នៅ​ត្រឹម​១៥,៣​ភាគរយ​ គិត​ត្រឹម​ខែ​មិថុនា​ឆ្នាំ​២០១៩។

កាល​ពី​ខែ​ឧសភា ​ធនាគារ​ពិភពលោក​បាន​ចេញ​សេចក្តី​វិភាគមួយ​ ទាក់ទង​នឹង​ការ​ខាតបង់​ប្រាក់​រាប់រយ​លាន​ដុល្លារ​ផងដែរ​ បើ​សិន​ប្រទេសក្នុង​តំបន់​អាស៊ី​អាគ្នេយ៍​មួយ​នេះ​ របូត​ឋានៈ​អនុគ្រោះ​ EBA​នោះ។ ធនាគារ​ពិភពលោក វិភាគ​ឃើញ​ថា​ កម្ពុជា​អាច​នឹង​ខាត​បង់​ទឹកប្រាក់​យ៉ាង​ហោច​ណាស់​ចន្លោះ​ពី​ ៥០០​លាន​ដុល្លារ​អាមេរិក​ទៅ​ជាង​ ៦០០​ លាន​ដុល្លារ​អាមេរិក​ ក្នុង​មួយ​ឆ្នាំ ​ប្រសិន​បើ​សហភាព​អឺរ៉ុប​សម្រេច​ព្យួរ​ការ​អនុគ្រោះ​ពន្ធ​ EBA ​ដល់​កម្ពុជា។

លោក ​ជា សុភ័ក្ត្រ នាយក​រង​នាយកដ្ឋាន​នយោបាយ​សារពើ​ពន្ធ​ និង​ម៉ាក្រូ​សេដ្ឋកិច្ច​ នៃ​ក្រសួង​សេដ្ឋកិច្ច​ និង​ហិរញ្ញវត្ថុ​ បាន​ប្រាប់​សន្និសីទ​ព័ត៌មាន​ស្តី​ពី​របាយការណ៍​បច្ចុប្បន្នភាព​សេដ្ឋកិច្ច​កម្ពុជា​ថា​ ប្រព័ន្ធឋានៈ​អនុគ្រោះ EBA គឺប្រៀប​ដូច​ជាអាវ​ពោង​សង្គ្រោះជីវិត​ ដែល​កម្ពុជា​ត្រូវការ​នៅ​ពេល​ប្រទេស​នេះ​ មិន​ទាន់​អាច​ឈរ​ដោយ​ខ្លួន​ឯងបាន។ លោក​បន្ថែម​ថា​ កម្ពុជា​នឹង​ឈប់​ប្រើអាវ​ពោង​នេះ​ ដើម្បី​បង្ហាញ​ថា​ កម្ពុជា​អាច​សង្គ្រោះខ្លួន​ឯង​បាន។

«EBA ​គឺដូច​ជា​ អាវ​ពោង​សង្គ្រោះ​ជីវិត។ ពេលខ្លះ​ បើគ្មាន​ការ​ពាក់​អាវពោង​សង្គ្រោះជីវិត​ទេ​ យើង​នឹង​មិនដឹង​ថា​ យើង​អាច​ហែល​ទឹក​បាន​ទេ។ ឬ​ក៏​យើង​ប្រហែល​ជា​ មិន​អាចហែល​ទឹក​បាន​ពេញមួយ​ជីវិត​របស់​យើង...ប្រហែល​ជាយើង​លេប​ទឹក​ខ្លះនៅពេល​ចាប់​ផ្តើម​ ប៉ុន្តែ​ក្រោយមក​ទៀត​ យើង​នឹង​អាច​ជា​ម្ចាស់​ខ្លួន​ឯងបាន​ហើយ»។

អ្នក​ជំនាញ​សេដ្ឋកិច្ច​ធ្លាប់​បាន​លើកឡើង​កាល​ពី​ពេល​កន្លង​មក​ថា​ កម្ពុជា​មិន​ទាន់​អាច​បោះបង់​ប្រព័ន្ធ​ឋានៈ​អនុគ្រោះ​ EBAបាន​ទេ​ ព្រោះ​ការ​បាត់​បង់​ឋានៈអនុគ្រោះនេះ​ ​អាច​ប៉ះពាល់​ដល់​សមត្ថភាព​ប្រកួត​ប្រជែង​ប្រទេស​កម្ពុជា​ ខណៈដែល​ថ្លៃ​ដើម​ផលិត​នៅ​ក្នុង​ប្រទេស​នេះ​នៅ​មាន​កម្រិត​ខ្ពស់​ បើ​ធៀប​នឹង​ប្រទេស​ក្បែរ​ខាង។

ដោយ​ឡែក​ ធនាគារ​ពិភព​លោក​បាន​កត់​សម្គាល់​ភាព​វិជ្ជមាន​មួយ​ផ្នែក​របស់​កម្ពុជា សម្រាប់ការ​ចូល​រួម​នៅ​ក្នុង​សេដ្ឋកិច្ច​សាកល​តាម​រយៈ​ ខ្សែ​សង្វាក់​តម្លៃ​សាកល​ (ឬ​ GVCs)​ ដែល​មាន​សន្ទុះ​លឿន​ជាង​ប្រទេស​ប្រហាក់​ប្រហែល​គ្នា​ផ្សេងៗ​ទៀត​ បើ​ទោះ​ជា​ការ​ចូលរួម​នោះ​ចាប់ផ្តើម​ពីមូលដ្ឋាន​ទាប​ក៏​ដោយ។

ក៏ប៉ុន្តែ​ ការ​ជំរុញ​សមាហរណកម្ម​យ៉ាង​លឿន​របស់​កម្ពុជា​ចូល​ទៅ​ក្នុង​ខ្សែ​សង្វាក់​តម្លៃ​សាកល​នោះ​ សុទ្ធតែ​បាន​មក​ពី​ការ​ហូរចូល​នៃការ​វិនិយោគ​ផ្ទាល់​ពីបរទេស​ ភាពសម្បូរ​នៃពលកម្ម​មាន​ជំនាញ​ទាប និងពលកម្ម​មាន​ប្រាក់​ឈ្នួល​ទាប​ និង​លទ្ធភាព​ទទួល​បាន​ភាព​អនុគ្រោះ​នាំ​ទំនិញ​ចេញ​ទៅ​កាន់​ទីផ្សារ​ធំៗ។

អ្នកស្រី ​អ៊ិនហ្គូណា ដូប្រាចា​ ប្រធាន​គ្រប់​គ្រង​ធនាគារ​ពិភពលោក​សម្រាប់ប្រទេស​កម្ពុជា​ ថ្លែង​ពីបច្ចុប្បន្នភាពសេដ្ឋកិច្ច​កម្ពុជា​ នៅទីក្រុង​ភ្នំពេញ​ ថ្ងៃ​ទី​២៧​ ខែ​វិច្ឆិកា​ ឆ្នាំ​២០១៩។ (ហ៊ុល រស្មី/VOA)
អ្នកស្រី ​អ៊ិនហ្គូណា ដូប្រាចា​ ប្រធាន​គ្រប់​គ្រង​ធនាគារ​ពិភពលោក​សម្រាប់ប្រទេស​កម្ពុជា​ ថ្លែង​ពីបច្ចុប្បន្នភាពសេដ្ឋកិច្ច​កម្ពុជា​ នៅទីក្រុង​ភ្នំពេញ​ ថ្ងៃ​ទី​២៧​ ខែ​វិច្ឆិកា​ ឆ្នាំ​២០១៩។ (ហ៊ុល រស្មី/VOA)

អ្នកស្រី​ អ៊ីនហ្គូណា​ ដូប្រាចា​ (Inguna Dobraja) ប្រធាន​គ្រប់គ្រង​ធនាគារ​ពិភពលោក​សម្រាប់​ប្រទេស​កម្ពុជា​ លើកឡើង​ថា​ ដើម្បី​ឲ្យ​កម្ពុជា​ឈាន​ឡើង​ទៅ​កាន់​ដំណាក់​កាល​មួយ​ទៀត​នៃការ​ចួលរួម​ខ្សែ​សង្វាក់​តម្លៃ​សាកល​បាន​ ប្រទេស​កម្ពុជា​ ចាំបាច់​ត្រូវ​តែ​មាន​ល្បាយ​គោលនយោបាយ​កាន់​តែ​ទំនើប​ជឿន​លឿន​ច្រើន​ថែម​ទៀត។

អ្នកស្រី​បញ្ជាក់​ថា៖ «ទីមួយ​កម្ពុជា​ គួរ​តែ​ពង្រីក​កិច្ច​ព្រមព្រៀង​ពាណិជ្ជកម្ម​ និង​ធ្វើ​វា​ឲ្យ​កាន់​តែ​ស៊ី​ជម្រៅ​ ដើម្បី​ឲ្យ​ផុត​ពី​បញ្ហា​នៃការ​ចូល​ទៅ​ក្នុង​ទីផ្សារ​ និង​ការ​យក​ចិត្តទុក​ដាក់​លើ​អ្នក​វិនិយោគ​ក្នុង​ស្រុក។ ទី​ពីរ​ គឺ​ការ​បន្ទាប​របារ​ពាណិជ្ជកម្ម​ និង​ភ្ជាប់​ទៅទី​ផ្សារ​ឯទៀត​ ដើម្បី​ពង្រីក​ទំហំតូច​នៃ​ទីផ្សារ​ក្នុង​ស្រុក​របស់​កម្ពុជា​ និង​ធ្វើ​ឲ្យ​ប្រសើរ​ឡើង​នូវ​ការ​ទទួល​បាន​កាន់​តែ​ច្រើន​ឡើង​នូវ​ធាតុ​ចូល​ដែល​ត្រូវការ​សម្រាប់​ផលិតកម្ម។ ទី​បី​ គឺ​ការ​បន្ត​ការ​កែ​លម្អ​គុណភាព​វិស័យ​អប់រំ​ និង​ជំនាញ​របស់​កម្លាំង​ពលកម្ម»។

របាយការណ៍​របស់​ធនាគារ​ពិភពលោក​ ក៏​បាន​ឲ្យដឹង​ពី​ហានិភ័យ​ផ្សេង​ទៀត​ ដែល​អាច​បន្ត​កើន​ឡើង​សម្រាប់​វិស័យ​ហិរញ្ញវត្ថុ។ ហានិភ័យ​ទាំងនោះ​ មាន​ការ​ពាក់​ព័ន្ធ​ច្រើន​ជាមួយ​វិស័យ​សំណង់​ និង​អចលនទ្រព្យ​ អម​ដោយ​ការ​ពូន​គរ​របស់​បំណុលផង​ ដែល​ក្នុង​នោះ​ទំហំ​នៃការ​ខ្ចីបុល​សរុប​រួម​គ្នា​ពី​ធនាគារ​ និង​ពីស្ថាប័ន​មីក្រូ​ហិរញ្ញវត្ថុ​ មាន​ជាង​១០០ភាគរយ​ នៃ​ផលិតផល​សរុប​ក្នុងស្រុក​ទៅ​ទៀត។

សម្រាប់​ការ​ខ្ចីបុល​របស់​កម្ពុជា​ ធនាគារ​ពិភពលោកបាន​ឲ្យ​ដឹង​ថា​ មក​ដល់​ដំណាច់​ឆ្នាំ​២០១៨​នេះ​ ប្រទេស​កម្ពុជា​មាន «បំណុល​សាធារណៈ​ ដែល​ពុំទាន់​សង​ ក្នុង​ទំហំ​ទឹកប្រាក់​ ៧,០២​ពាន់​លាន​ដុល្លារ​អាមេរិក»។ ពាក់កណ្តាល​នៃ​បំណុល​ដែល​ពុំ​ទាន់​សង​នោះ​ គឺជា​របស់​ប្រទេស​ចិន៕

អត្ថបទ​ទាក់ទង

XS
SM
MD
LG