នៅក្នុងសេចក្តីរាយការណ៍ថ្មីមួយនៅថ្ងៃពុធនេះដោយអង្គការសិទ្ធិមនុស្ស Human Rights Watch បាននិយាយថា កងទ័ពនិងកងជីវពលអ៊ីរ៉ាក់ ដែលបានវាយកំចាត់ក្រុមសកម្មប្រយុទ្ធរដ្ឋអ៊ីស្លាមចេញពីទីក្រុង Amerli ភាគខាងជើងកាលពីខែកញ្ញាមុន បានចូលលួចអីវ៉ាន់និងដុតផ្ទះអ្នកស្រុកនិងហាងលក់អីវ៉ាន់។
ដោយផ្អែកលើសេចក្តីសម្ភាសន៍ជាមួយជនរងគ្រោះនិងសាក្សី រួមជាមួយរូបភាពតាមផ្កាយរណប សេចក្តីរាយការណ៍នោះនិយាយថាកងជីវពលអ៊ីរ៉ាក់បានលួចយកទូរទស្សន៍ សម្លៀកបំពាក់ និងខ្សែអគ្គិសនី មុននឹងដុតអគារទាំងនោះ។ ការចូលលួចអីវ៉ាន់និងការដុតបំផ្លាញបានបន្តធ្វើនៅក្នុងភូមិចំនួន ៤៧ នៅជុំវិញទីក្រុង Amerli។
អង្គការ Human Rights Watch និយាយថា បុគ្គលិករបស់ខ្លួនមិនបានចងក្រងឯកសារពីការសម្លាប់មនុស្សទេ តែថាមានបុរស១១នាក់ត្រូវចាប់ពង្រត់នៅក្នុងប្រតិបត្តិការនេះ។
លោក Joe Stork អនុប្រធានអង្គការ Human Rights Watch ប្រចាំមជ្ឈិមបូព៌ាប្រទេសនិងអាហ្វ្រិកខាងជើងថ្លែងថា «អ៊ីរ៉ាក់មិនអាចឈ្នះការវាយប្រយុទ្ធប្រឆាំងអំពើឃោរឃៅរបស់ក្រុមរដ្ឋអ៊ីស្លាមបានទេ ដោយធ្វើការវាយប្រហារទៅលើជនស៊ីវិល ដែលជាការរំលោភទៅលើច្បាប់សង្គ្រាម និងសុភាវធម៌នោះទេ៕
