ភាពយន្តឯករាជ្យដែលត្រូវបានចំណាយប្រាក់តិចតួចក្នុងការផលិតនៅទីក្រុងហុងកុង ទទួលបានប្រជាប្រិយភាពដ៏គួរឲ្យភ្ញាក់ផ្អើលមួយ ហើយសាច់រឿងស្តីពីការស្វែងរកអំពីការផ្លាស់ប្តូរផ្នែកនយោបាយនៅក្នុងទីក្រុងហុងកុង កំពុងទទួលបានការសរសើរពីអ្នកទស្សនា និងមានការខឹងសម្បារពីរដ្ឋាភិបាលកណ្តាលរបស់ចិន។
ភាពយន្តដ៏ល្បីលក្ខណៈអន្តរជាតិ ដែលមានចំណងជើងថា Star Wars ធ្វើឲ្យកក្រើកក្នុងប្រទេសស្ទើរតែទាំងអស់នៅក្នុងពិភពលោក ប៉ុន្តែ យ៉ាងហោចណាស់នៅក្នុងរោងភាពយន្តមួយនៅកោះហុងកុង ភាពយន្តផលិតក្នុងស្រុក Ten Years បានស្ថិតនៅចំណាត់កំពូលលើភាពយន្ត Star Wars។ ភាពយន្ត Ten Years ពិពណ៌នាពីទិដ្ឋភាពនៃកោះអតីតអាណានិគមរបស់ចក្រភពអង់គ្លេសមួយនេះអាចទៅជាយ៉ាងណាក្នុងឆ្នាំ២០២៥ នៅក្រោមឥទ្ធិពលរបស់រដ្ឋាភិបាលផ្តាច់ការរបស់ចិនដីគោក។
លោក Joseph Cheung ដែលជាសកម្មជននយោបាយម្នាក់និយាយថា ភាពជោគជ័យរបស់ភាពយន្តនេះឆ្លុះបញ្ចាំងពីអារម្មណ៍ដែលពលរដ្ឋមានចំពោះអតីតកាលរបស់ហុងកុង និងការភ័យខ្លាចនាពេលអនាគត។
«ដូច្នេះ យើងឃើញថា ពលរដ្ឋហុងកុងជាច្រើនចង់ធានាឲ្យបានថា ពួកគេអាចប្រើប្រាស់ឱកាសទាំងអស់ដើម្បីបំពេញនូវក្តីប្រាថ្នា ក៏ដូចជាគោលបំណងរបស់ពួកគេ ដើម្បីការពារគុណតម្លៃមូលដ្ឋាន និងរបៀបរស់នៅរបស់ពួកគេ។ ខ្ញុំជឿថា អត្រានៃអ្នកទៅបោះឆ្នោតចំនួន៤៧ភាគរយសម្រាប់ការបោះឆ្នោតក្រុមប្រឹក្សាស្រុកកាលពីខែវិច្ឆិកា ឆ្នាំមុនជាទកល្ហីករស្រាប់»។
ភាពយន្តនេះត្រូវបានផលិត និងដឹកនាំដោយក្រុមអ្នកស្ម័គ្រចិត្តជាច្រើន ហើយរួមមានរឿងខ្លីៗចំនួន៥ ដែលទស្សន៍ទាយពីអនាគតខ្មៅងងឹតសម្រាប់ទីក្រុងនេះ។ រឿងមួយក្នុងចំណោមរឿងទាំងនោះបង្ហាញពីអ្នកតវ៉ាម្នាក់ដែលបានធ្វើអត្តឃាតនៅពីមុខកុងស៊ុលរបស់ចក្រភពអង់គ្លេស ហើយរឿងផ្សេងទៀតបង្ហាញពីការវាយកម្ទេចតូបសៀវភៅក្នុងស្រុករបស់មន្រ្តីប៉ូលិសក្មេងៗ និងការមិនយកចិត្តទុកដាក់លើកម្មករដែលនិយាយភាសាចិនកាតាំង (Cantonese)។
លោក Andrew Choi ដែលជាផលិតករភាពយន្តនេះបាននិយាយថា លោក និងក្រុមការងាររបស់លោកមិនបានគិតថា វាទទួលជោគជ័យឬទាក់ទាញការចាប់អារម្មណ៍ខ្លាំងបែបនេះទេ។
«ខ្ញុំគ្រាន់តែគិតថា បរិយាកាសទូទៅនៅក្នុងក្រុងហុងកុងគឺថា ពលរដ្ឋកំពុងបាត់បង់ក្តីសង្ឃឹមទៅលើរដ្ឋាភិបាលហុងកុង ព្រមទាំងរដ្ឋាភិបាលចិនផងដែរ ហើយខ្ញុំគិតថា នេះជាមូលហេតុមួយដែលវាធ្វើឲ្យមានការពិភាក្សាទៅលើប្រធានបទនេះ»។
កាសែត Global Times ដែលជាកាសែតគ្រប់គ្រងដោយរដ្ឋរបស់ចិន បានរិះគន់លើភាពយន្តនេះ ដោយបានហៅភាពយន្តនេះថា ជាភាពយន្ត «ឆ្កួតៗ» ហើយបានព្រមានថា «ប្រសិនបើផលិតករខ្សែភាពយន្តនេះចង់បំភ័យសាធារណជននៅក្នុងក្រុងហុងកុង និងបង្កភាពវឹកវរ ពួកគេគួរគិតពីផលលំបាកអ្វីដែលវាមានទៅលើទីក្រុងនេះ»។
លោក Choi និយាយថា ទន្ទឹមនឹងការបង្ហាញអំពីអនាគតខ្មៅងងឹងរបស់ក្រុងហុងកុង ភាពយន្តនេះក៏ជាការដាស់តឿនដល់សេរីភាពដែលពលរដ្ឋហុងកុងមាននាពេលសព្វថ្ងៃ។
«ខ្ញុំគិតថា យើងចង់មើលបញ្ហានេះក្នុងផ្លូវវិជ្ជមាន ដោយសារតែនៅហុងកុង ប្រសិនបើយើងផលិតខ្សែភាពយន្តនេះ វាមានន័យថា យើងនៅតែមានសេរីភាព។ យើងចង់ឲ្យមានសេរីភាព ហើយបន្តមានសេរីភាពនេះនៅហុងកុង»។
ការចេញផ្សាយភាពយន្តនេះ ត្រូវបានធ្វើឡើង នៅពេលដែលអ្នកបោះពុម្ពសៀវភៅលក់ក្នុងក្រុងហុងកុងមួយចំនួនបានបាត់ខ្លួន ដោយសារតែបានបោះពុម្ពសៀវភៅរិះគន់រដ្ឋាភិបាលចិនដីគោក។ សកម្មជននយោបាយក៏បានរិះគន់ពេលថ្មីៗនេះ ទៅលើការវាយប្រហារនាប្រឆាំងនឹងអ្នកកាសែតហុងកុង និងការរឹតត្បិតខ្លឹមសារមួយចំនួនទៅលើកាសែតក្នុងស្រុក។ ភាពយន្តនេះបានទាក់ទាញចំណាប់អារម្មណ៍ពីនិស្សិត ដែលមានវ័យ២០ឆ្នាំមួយចំនួនដូចជា Nora Lam ដែលជាសិក្សានៅសកលវិទ្យាល័យហុងកុង។
«ខ្ញុំគិតថា វាពេញនិយម ដោយសារយើងមិនដែលបានឃើញភាពយន្តបែបនេះ អស់រយៈពេលជាយូរមកហើយ។ មុនឆ្នាំ១៩៩៧ មានភាពយន្តក្នុងស្រុកជាច្រើនអំពីនយោបាយរបស់ចិនដីគោក។ ប៉ុន្តែ ក្រោយឆ្នាំ១៩៩៧ បញ្ហានេះមិនដែលត្រូវបានគេលើកមកនិយាយនោះទេ ដូច្នេះ ខ្ញុំគិតថា នេះជាមូលហេតុដែលភាពយន្តនេះល្បី»។
ពីដំបូង ភាពយន្តនេះត្រូវបញ្ចាំងក្នុងរោងភាពយន្តតែមួយប៉ុណ្ណោះ ក្នុងក្រុងហុងកុង ប៉ុន្តែ ឥឡូវនេះកំពុងចាក់បញ្ចាំងនៅក្នុងរោងភាពយន្តមួយចំនួន ហើយផលិតករនិយាយថា ពួកគេកំពុងចរចាជាមួយអ្នកចែកចាយអន្តរជាតិ៕
ប្រែសម្រួលដោយ ប៊ុន ប៉េងហ៊ុយ
